قالاداعى ءدارىحانا ۇيىمدارى ءوز قىزمەتكەرلەرىن جەكە قورعانىس قۇرالدارىمەن قامتاماسىز ەتەدى. بۇل تۋرالى قالالىق اكىمدىكتىڭ باسپا ءسوز ورتالىعىندا وتكەن بريفينگ كەزىندە قازاقستان رەسپۋبليكاسى فارماسيەۆتيكالىق قىزمەتتى قولداۋ جانە دامىتۋ قاۋىمداستىعىنىڭ پرەزيدەنتى مارينا دۋرمانوۆا ايتتى.
ونلاين بريفينگ كەزىندە قاۋىمداستىق پرەزيدەنتى COVID-19 ينفەكسياسى فارماسيەۆتتەر اراسىندا تىركەلمەگەنىن اتاپ ءوتتى. ويتكەنى، ءار ءدارىحانا ۇيىمى ءوز قىزمەتكەرلەرىن بارلىق قورعانىس قۇرالدارىمەن قامتاماسىز ەتەدى دەدى.
– دارىگەرلەر سياقتى فارماسيەۆتتەر دە قاۋىپ-قاتەردىڭ باسىندا ءجۇر. الماتى قالاسىنىڭ باس سانيتارلىق دارىگەرىنىڭ ءدارىحانالىق ۇيىمدارداعى فارماسيەۆتتەردى قورعاۋ جونىندەگى قاۋلىسىنا سايكەس، ارنايى تالاپتار – قولعاپتار، باس كيىمدەر جانە بەتپەردە بولۋى ءتيىس. ءار ءدارىحانا ۇيىمى ءوز قىزمەتكەرلەرىن بارلىق قورعانىس قۇرالدارىمەن قامتاماسىز ەتەدى، سونىمەن قاتار ءدارىحانالاردىڭ ءىشى مەن سىرتى، كىرە بەرىس توسەنىشتەرىنە دەيىن وڭدەلەدى، – دەدى مارينا دۋرمانوۆا.
ايتا كەتەيىك، كارانتين ەنگىزىلگەلى بەرى اتالعان قاۋىمداستىق پەن قالا اكىمدىگى بىرلەسىپ، قالادا تاپشىلىق بولماس ءۇشىن بارلىق مەديسينالىق كەرەك-جاراقتاردىڭ ۇزدىكسىز جەتكىزىلۋىن قامتاماسىز ەتۋدە.
پىكىر قالدىرۋ