قازاقستاندا كوروناۆيرۋستىڭ تارالۋىن بولدىرماۋ ماقساتىندا بۇگىنگى كۇنى 97 حالىقارالىق باعىت بويىنشا اپتاسىنا 438 رەيس (442-دەن 4 جيىلىككە دەيىن) نەمەسە بارلىق حالىقارالىق رەيستەردىڭ 99%-ى قىسقارتىلعان. 

بارلىق تۇراقتى ىشكى رەيستەر جابىلدى. قازىرگى ۋاقىتتا ەل اۋماعىندا تۇراقتى اۋە قاتىناسى جوق.

ەگەر 2020 جىلدىڭ 22 ناۋرىزىنا دەيىن 45 ىشكى باعىتتا اپتاسىنا 540 رەيس (تاۋلىگىنە 77 رەيس) ورىندالسا، 2020 جىلدىڭ 2 ساۋىرىنەن باستاپ قازاقستان قالالارى اراسىنداعى بارلىق ىشكى تۇراقتى رەيستەر توقتاتىلدى.

حالىقارالىق ازاماتتىق اۆياسيا ۇيىمىنىڭ (يكاو) بولجامىنا سايكەس، 2020 جىلدىڭ ءبىرىنشى جارتىجىلدىعىندا اۋە كومپانيالار ۇسىناتىن ورىندار سانى 51% قىسقارادى، سونداي-اق تاسىمالدانعان جولاۋشىلار سانى 500 ميلليونعا ازايادى. سونىمەن بىرگە اۋە كومپانيالاردىڭ وپەراسيالىق شىعىندارى 124 ملرد اقش دوللارىن قۇرايدى.

حالىقارالىق اۋە كولىگى قاۋىمداستىعى (IATA) 2020 جىلى جولاۋشىلاردان تۇسەتىن كىرىستىڭ جوعالۋىن 252 ملرد دوللارعا باعالايدى.

2020 جىلدىڭ ءناۋرىز-ساۋىر ايلارىندا قازاقستاندا تاسىمالداناتىن جولاۋشىلار سانى 70%-عا ازايدى. ۇشۋ رەيستەرىنىڭ قىسقارۋى مەن شەكتەلۋىنەن وتاندىق اۋە كومپانيالار 235 ملرد تەڭگەنى، اۋەجايلار 24،5 ملرد تەڭگەنى، «قازاەروناۆيگاسيا» رمك 28 ملرد تەڭگەنى جوعالتتى.

قازاقستاندىق تاسىمالداۋشىلار جابىق اۋەجايلاردان عانا ەمەس، ۇلتتىق ۆاليۋتا باعامىنىڭ السىرەۋىنەن دە زارداپ شەگۋدە.