ەلدە توتەنشە جاعداي مەرزىمى 15 كۇنگە سوزىلۋىنا بايلانىستى ازاماتتارعا الەۋمەتتىك تولەم ەكىنشى رەت بەرىلەدى.
توتەنشە جاعداي العاشقىداعىداي 1 اي ەمەس، 15 كۇندى قۇراعانىمەن، 42500 مولشەرىندەگى الەۋمەتتىك تولەم تولىق مولشەردە بەرىلەدى.
ءبىرىنشى اي ءۇشىن تولەم الماعاندار 15 ساۋىرگە دەيىن ءوتىنىش ءبىلدىرىپ ۇلگەرسە، العاشقى اي ءۇشىن دە، ەكىنشى اي ءۇشىن دە تولەم الا الادى.
ەسەپشوتى جوق ازاماتتار دا ءوتىنىش بىلدىرە الاتىنىن ەسكەرگەن ءجون. ولار ءوتىنىش بەرگەن كەزدە ەسەپشوت ءنومىرىن جازباي، ءبىر اي ىشىندە ەسەپشوت اشىپ، تولەمدى الا الادى. الەۋمەتتىك ساقتاندىرۋ قورىنان ءوتىنىش بىلدىرگەن ازاماتقا 3 كۇن سايىن "شوت اشتىڭىز با؟" دەگەن مازمۇنداعى حات جولدانىپ وتىرادى. شوت اشىلعان ساتتە ازامات ءوزىنىڭ ەسەپشوت ءنومىرىن سمس-كە جاۋاپ رەتىندە جازىپ جىبەرەدى. سودان سوڭ، تولەم سول شوتقا اۋدارىلادى. ءوتىنىم بىلدىرۋدە وزگە ادامنىڭ شوتىن كورسەتۋگە بولمايدى.
بۇگىنگە دەيىن 1 ملن 779 مىڭ ادامعا 42 500 تەڭگە تاعايىندالعان.
