الماتىدا ءجۇرىپ-تۇرۋ رۇقساتىن پورتال ارقىلى الادى. بۇل ونلاين-بريفينگتە شاھار باسشىسىنىڭ ءبىرىنشى ورىنباسارى ساپاربەك تۇياقبايەۆ مالىمدەدى.

ايتۋىنشا، بۇدان بىلاي توتەنجە جاعدايى رەجيمى كەزىندە الماتىدا ءجۇرىپ-تۇرۋ رۇقساتى پورتال ارقىلى بەرىلمەك. بۇل سايت 14 ساۋىردە ىسكە قوسىلادى.

– جەدەل شتابتىڭ شەشىمىمەن قالاداعى ءبىرقاتار كاسىپورىندارعا جۇمىس ىستەۋگە رۇقسات بەرىلدى. بۇل كاسىپكەرلەردىڭ ءجۇرىپ-تۇرۋىنا رۇقسات وتكەن ايدا بەرىلدى. سونداي-اق قالانىڭ قالىپتى تىرشىلىگىن قامتاماسىز ەتۋگە قاتىسى بار تۇلعالاردىڭ دەرەكتەر بازاسى قۇرىلدى. ءبىراق تاجىريبە كورسەتكەندەي، كەيبىر كاسىپكەرلەر مۇمكىندىكتى پايدالانىپ، ءوز كاسىپورىندارىنىڭ تىزىمىنە كەيبىر اۆتوموبيلدەر مەن وسى جۇمىسقا مۇلدەم قاتىسى جوق ادامداردى ەنگىزگەن. سوندىقتان اشىقتىقتى قامتاماسىز ەتۋ ماقساتىندا ءبىز جاڭا پورتال ازىرلەدىك، – دەدى س. تۇياقبايەۆ.

بۇل رەتتە اتالعان سايت كاسىپورىن قىزمەتىنىڭ رۇقسات ەتىلمەگەن تۇرلەرىن انىقتاپ وتىرۋعا سەپتىگىن تيگىزبەك.

– ماسەلەن ءبىر كاسىپورىندا 50 ادام جۇمىس ىستەيدى دەلىك. ەندەشە پورتال بۇل مەكەمەدەن 50-دەن استام ادامدى قابىلدامايدى. ءوتىنىم مەكەمەنىڭ ءبىرىنشى باسشىسىنىڭ ەسق-سى ارقىلى قابىلدانادى. بۇل وعان جەكە جاۋاپكەرشىلىك جۇكتەيدى. جالعان اقپارات بەرگەن جاعدايدا جاۋاپقا ءبىرىنشى باسشى تارتىلادى، – دەدى ساپاربەك تۇياقبايەۆ.

ايتا كەتۋ كەرەك، بۇل پورتال infoalmaty.kz مەكەن-جايى بويىنشا قولجەتىمدى بولماق. ءسىزدىڭ قالادا ءجۇرىپ-تۇرۋعا رۇقساتىڭىزدىڭ بار-جوعىن ءبىلۋ ءۇشىن ءجسن-دى ەنگىزۋ كەرەك. ال كاسىپورىندار ءۇشىن ءبسن-دى ەنگىزسە جەتكىلىكتى.