ۇستەماقى مەديسينا قىزمەتكەرلەرىن جىگەرلەندىرەدى. بۇل تۋرالى اقمولا وبلىستىق كوپبەيىندى اۋرۋحاناسى جانىنداعى پروۆيزورلىق ستانسيوناردىڭ اعا مەيىربيكە ءلاززات ءبىلالوۆا ايتتى.

ونىڭ ايتۋىنشا، وسىنداي جاۋاپتى ساتتە اتى جامان ىندەتپەن كۇرەسىپ جاتقان دارىگەرلەردىڭ ەڭبەگىنىڭ ەلەنگەنى مەديسينا سالاسىنىڭ بارشا قىزمەتكەرلەرىنىڭ كوڭىلىنەن شىعىپ وتىر.

– مەملەكەت باسشىسى ءوزىنىڭ ۇندەۋىندە جاھاندى جايلاعان كوروناۆيرۋس ينفەكسياسىمەن كۇرەسۋدە دارىگەرلەر مەن مەديسينا قىزمەتكەرلەرىنە ۇلكەن سەنىم ارتىپ وتىرعاندىعىن ايتقان ەدى. وسى رەتتە، پرەزيدەنتتىڭ تاپسىرماسىمەن كورونۆيرۋس ينفەكسياسىنا قارسى كۇرەستىڭ الدىڭعى لەگىندە جۇرگەن مەديسينا سالاسىنىڭ قىزمەتكەرلەرىنە ۇستەمەاقىنىڭ تولەنۋى ولاردىڭ جاۋاپكەرشىلىگىن ارتتىپ، ودان سايىن جىگەرلەندىرە تۇسەدى، – دەيدى ءلاززات ءبىلالوۆا.

جوعارى ساناتتى، 25 جىلدىق تاجىريبەسى بار ءلاززات ءبىلالوۆا قازىرگى كەزدە، اقمولا وبلىستىق كوپبەيىندى اۋرۋحاناسى جانىنداعى پروۆيزورلىق ستانسيوناردا اعا مەيىربيكە بولىپ قىزمەت ىستەۋدە. اتالمىش پروۆيزورلىق ستانسيوناردا بارلىعى 36 ادام كارانتيندە جاتىر. ولارعا دارىگەر، مەيىربيكە، سانيتارى بار 30-دان استام مەديسينالىق قىزمەتكەر قىزمەت كورسەتۋدە. ونىڭ ۇيىنە بارماي، وسىنداي جۇمىس ىستەپ جاتقانىنا ءۇش اپتاداي بولىپتى.

– ارينە، وتباسىمدى ساعىندىم. ءبىر قالادا تۇرساق تا جاقىندارىممەن تەلەفون ارقىلى بەينەبايلانىس ارقىلى سويلەسەمىز. ەڭ باستىسى ساعىنىش ەمەس، دەرتتى جەڭىپ، ادامداردىڭ تەزىرەك ساۋىعىپ كەتۋى. بىزدەرگە مەملەكەت، باسشىلىق تاراپىنان بارلىق جاعداي جاسالىپ وتىر. وبلىستىق اۋرۋحانانىڭ جانىنداعى جاتاقحانادا تۇرىپ جاتىرمىز. مەديسينالىق قۇرال-جابدىقتارمەن قامتاماسىز ەتتى. وسىدان بىرەر كۇن بۇرىن 400 مىڭ تەڭگە شاماسىندا ۇستەمەاقى الدىق. سوندىقتان ەش الاڭسىز قىزمەتىمىزدى اتقارۋدامىز، – دەدى ءلاززات ءبىلالوۆا.

ايتا كەتەيىك، وسىعان دەيىن حابارلاعانىمىزداي، اقمولا وبلىسىندا 500-دەن استام دارىگەر ۇستەمەاقى العان بولاتىن.