پەكين ماسكەۋدەن ورالعان جۇڭگو ازاماتتارى پاندەميانى قايتا ءورشىتۋى مۇمكىن ەكەنىن ايتىپ، شەكارا باقىلاۋىن كۇشەيتتى، – دەپ جازادى The Wall Street Journal.

جۇڭگو رەسمي اقپاراتتارى بويىنشا، ءساۋىر ايىنىڭ باسىنان باستاپ قىتايدا جاڭا ينفەكسيالاردىڭ جارتىسىنان كوبى شەتەلدەن كەلگەندەردەن انىقتالعان. سول سەبەپتى، جۇڭگو سوڭعى كۇندەرى رەسەيمەن شەكارالارىنىڭ ءبىر بولىگىن جاۋىپ تاستادى.

رەسمي مالىمەتتەرگە سايكەس، ءساۋىر ايىنىڭ باسىنان بەرى 658 كوروناۆيرۋس جۇقتىرۋشىنىڭ جارتىسى شەتەلدەن كەلگەن. ولار رەسەيدەن قىتايدىڭ حەيلۋنسزيان پروۆينسياسىنا كىرگەن جۇڭگو ازاماتتارى. ولار ماسكەۋدەن 27 ناۋرىزدان باستاپ ۆلاديۆوستوك ارقىلى قىتايعا كىرگەن، دەپ حابارلادى حەيلۋنسزيان دەنساۋلىق ساقتاۋ كوميسسياسى.

وتكەن اپتادا ماسكەۋ مەرى سەرگەي سوبيانين قالادا كارانتين جاريالانعان سوڭ ونداعان جۇڭگو ازاماتى كارانتين ەرەجەلەرىن بۇزعانى ءۇشىن دەپورتاسيالانعانىن حابارلاعان. الايدا دەپورتاسيالانعان ادامداردىڭ اراسىندا ۆيرۋس جۇقتىرۋشىلار بار-جوعى ايتىلمادى.

ءساۋىردىڭ ءبىرىنشى اپتاسىندا ۆيرۋس جۇقتىرۋشىلارلىڭ كوبەيۋى قىتايدى رەسەيمەن بارلىق شەكارالىق وتكىزۋلەرىن جابۋعا ءماجبۇر ەتتى، دەپ حابارلادى ماسكەۋدەگى جۇڭگو ەلشىلىگى.

5 ساۋىردە ماسكەۋدەن بەيجىڭگە ۇشقان Air China اۆياكومپانياسىنىڭ رەيسىنەن كوروناۆيرۋس جۇقتىرعان 35 جولاۋشى انىقتالعان، دەپ حابارلادى جۇڭگو دەنساۋلىق ساقتاۋ قىزمەتكەرلەرى. شانحاي قالالىق دەنساۋلىق ساقتاۋ كوميسسياسىنىڭ حابارلاۋىنشا، جۇڭگو بيلىك ورگاندارى 10 ساۋىردە ماسكەۋدەن شانحايعا رەسەيدىڭ جەتەكشى تاسىمالداۋشىسى «اەروفلوت» كومپانياسىنىڭ جولاۋشىلارىنان 60 جاڭا جاعدايدى تىركەدى. ەكى رەيستەن دە جولاۋشىلار كارانتينگە الىنعان.

رەسەيدەن كىرگەن جولاۋشىلار اراسىندا ۆيرۋس جۇقتىرۋشىلاردىڭ سانى كۇرت ارتۋىنا بايلانىستى، قىتايدىڭ رەسەيمەن شەكارا ايماعىنداعى سۋفەنحە قالاسىنىڭ ماڭىندا 330 باقىلاۋ-وتكىزۋ پۋنكتى قويىلعان جانە ونداعى بارلىق تۇرعىن ۇيلەر قايتا كارانتينگە جابىلعان. تۇرعىندارعا ازىق-تۇلىك الۋ ءۇشىن ءۇش كۇندە ءبىر رەت ۇيلەرىنەن شىعۋعا مۇمكىندىك بەرىلگەن. جاڭا ينفەكسيالاردىڭ الدىن الۋ ءۇشىن پروۆينسيالىق ۇكىمەت رەسەيمەن شەكارانى كەسىپ وتكەن زاڭسىز ارەكەتتەر تۋرالى حابارلاعان ازاماتتارعا سىياقى ۇسىناتىنىن مالىمدەگەن.