الماتىدا كاسىپورىنداردى ىسكە قوسۋ كارانتين جاعدايىندا بارلىق تالاپتارعا سايكەستىگىنە اۋديت جۇرگىزىلگەننەن كەيىن عانا جۇرگىزىلەدى. بۇل تۋرالى قالا اكىمدىگىنىڭ باسپا ءسوز قىزمەتى حابارلادى. 

مەملەكەتتىك كوميسسيانىڭ شەشىمى بويىنشا، 20 ساۋىردەن باستاپ، الماتى قالاسىندا كاسىپورىنداردىڭ جۇمىسىن كەزەڭ-كەزەڭمەن ىسكە قوسۋ شەڭبەرىندە: ونەركاسىپتىك كاسىپورىنداردىڭ، قۇرىلىس كومپانيالارىنىڭ، سونداي-اق الدىن الا جازىلۋ بويىنشا نوتاريۋستاردىڭ جانە الماتى قالاسىنىڭ ناۋرىزباي اۋدانىنداعى حقكو ءبىر بولىمشەسىنىڭ (تەك قانا بيزنەسكە قىزمەت كورسەتۋ ءۇشىن) قىزمەتىنە رۇقسات ەتىلدى.

وسىلايشا، قالادا جۇمىسپەن قامتىلعانداردىڭ جالپى سانى بىرتىندەپ، ءبىر ايدىڭ ىشىندە تاعى دا 90 مىڭعا جۋىق ادامعا كوبەيەدى. كاسىپورىنداردى ىسكە قوسۋ ولاردىڭ جۇمىسىنىڭ ەرەكشەلىگىنە بايلانىستى، كەزەڭ-كەزەڭمەن جۇرگىزىلەتىن بولادى.

– ءوز قىزمەتىن باستايتىن كاسىپورىندار سانيتارلىق-ەپيدەميولوگيالىق تالاپتاردى ورىنداپ، جۇمىس كوميسسياسىنان جۇمىسقا رۇقسات الۋى كەرەك ەكەنىن تۇسىندىرگىم كەلەدى. كوميسسيا قۇرامىنا سەس، "اتامەكەن" ۇلتتىق كاسىپكەرلەر پالاتاسى جانە قالانىڭ كاسىپكەرلىك جانە ينۆەستيسيا باسقارماسىنىڭ وكىلدەرى كىرەدى. بۇل دەگەنىمىز، كاسىپورىندار بىردەن جۇمىسىن باستاي المايدى. رۇقساتتى ولار جاريالانعان جانە جۇمىسقا دايىن بولعان كەزدە عانا الۋعا بولادى. ءبىز جۇمىس ورنىنا بارىپ تەكسەرىپ، سودان كەيىن عانا ىسكە قوسامىز، – دەپ اتاپ ءوتتى الماتى قالاسى كاسىپكەرلىك جانە ينۆەستيسيالار باسقارماسىنىڭ باسشىسى ەركەبۇلان ورازالين.

سونداي-اق، ىسكە قوسىلعاننان كەيىن جۇمىس ىستەپ تۇرعان كاسىپورىندارعا مونيتورينگ جۇرگىزىلەتىن بولادى جانە ەرەجە بۇزۋشىلىقتار انىقتالعان جاعدايدا، ولاردىڭ قىزمەتىن توقتاتا تۇرۋعا دەيىنگى شارالار قولدانىلادى.
قىزمەتكەرلەردى COVID-19 ينفەكسياسىنان قورعاۋ جونىندەگى ءىس-شارالاردىڭ تولىق تىزبەسى قالانىڭ بارلىق ونەركاسىپ جانە قۇرىلىس نىساندارى ءۇشىن ازىرلەندى. جۇمىس بەرۋشىلەر قاتاڭ سانيتارلىق نورمالاردىڭ ساقتالۋىنا دەربەس جاۋاپكەرشىلىكتە بولادى.

سونىمەن، نىسانداردا قىزمەتكەرلەردىڭ جاي-كۇيىنە ساۋالناما جۇرگىزىپ جانە ولاردى جۋرنالعا تىركەي وتىرىپ، سونداي-اق تەپلوۆيزورلاردىڭ كومەگىمەن بايلانىسسىز تەرمومەتريا ارقىلى كۇندەلىكتى اۋىسىم الدىنداعى مەديسينالىق تەكسەرۋ جۇرگىزۋ تالاپ ەتىلەدى. بارلىق قىزمەتكەرلەردى مەديسينالىق ماسكالارمەن جانە قولعاپتارمەن، دەزينفەكسيالاۋشى مايلىقتارمەن نەمەسە تەرى انتيسەپتيكتەرىمەن، سانيتايزەرلەرمەن قامتاماسىز ەتۋ قاجەت.

قىزمەتكەرلەر اراسىندا، ونىڭ ىشىندە اسحانالاردا، قاشىقتىقتى ساقتاۋ، كەڭەستەردىڭ سانىن، سونداي-اق ادامداردىڭ ءبىر جەردە كوپ شوعىرلانۋىن بارىنشا قىسقارتۋ ماڭىزدى. ءۇي-جايلاردا ۇنەمى دەزينفەكسيا جانە ىلعالدى جيىستىرۋ، جەلدەتۋ جانە اۋا باپتاۋ جۇيەلەرى، سونداي-اق جەكە گيگيەنا جانە ت.ب. ارنالعان سانيتارلىق توراپتار جۇمىس ىستەۋى ءتيىس.

اسقىنعان رەسپيراتورلىق جۇقپالار (جوعارى تەمپەراتۋرا، جوتەل، تۇماۋ) جانە باسقا دا جۇقپالى اۋرۋلار ايقىندالعان قىزمەتكەرلەردى جۇمىسقا جىبەرۋگە تىيىم سالىنادى. بۇل جاعدايدا، قىزمەتكەردى دەرەۋ وقشاۋلاپ، جەدەل مەديسينالىق جاردەم بريگاداسىن شاقىرۋ قاجەت.

وسىعان بايلانىستى، ءتيىستى اۋديت جۇرگىزىلگەننەن كەيىن جانە كاسىپورىننىڭ كارانتين جاعدايىندا جۇمىس ىستەۋگە دايىندىعى تۋرالى قورىتىندى بەرىلگەننەن كەيىن عانا ولاردى قىزمەتكەرلەر مەن كولىك قۇرالدارى تۋرالى دەرەكتەردى infoalmaty.kz بازاسىنا ەنگىزە وتىرىپ، الماتى قالاسى بويىنشا ءجۇرىپ-تۇرۋعا رۇقسات بەرىلەتىن بولادى.