مەملەكەت باسشىسىمەن تەلەفون ارقىلى سويلەسۋ بارىسىندا باقىتجان ساعىنتايەۆ الماتىداعى قازىرگى سانيتارلىق-ەپيدەميولوگيالىق جاعداي، كوروناۆيرۋس ىندەتىنىڭ تارالۋىنا جول بەرمەۋ، سونداي-اق كارانتين رەجيمىن قامتاماسىز ەتۋ جانە الەۋمەتتىك كومەككە مۇقتاج تۇرعىندارعا قولداۋ كورسەتۋ ماقساتىندا قابىلدانىپ جاتقان شارالار تۋرالى باياندادى.

– قازىرگى تاڭدا ينفەكسيانىڭ جاسىرىن وشاقتارىن انىقتاۋ ءۇشىن ىندەت جۇقتىرۋى مۇمكىن دەگەن بارلىق تاۋەكەل توپ وكىلدەرىن جاپپاي تەستىلەۋدى جالعاستىرۋدامىز. پسر ادىسىمەن 26 مىڭعا جۋىق ادام تەستىلەۋدەن ءوتتى، تاعى 21 مىڭى جەدەل-تەستىلەۋدەن وتكىزىلدى. وسىنداي جەدەل قولعا الىنعان شارالاردىڭ ناتيجەسىندە مەديسينا قىزمەتكەرلەرى مەن اسكەري قىزمەتشىلەردىڭ جەكەلەگەن توپتارى اراسىندا قاتەرلى ۆيرۋستى جۇقتىرۋ وشاقتارى انىقتالۋدا. ولاردىڭ ءبارى دەرەۋ وقشاۋلانىپ، ينفەكسيانىڭ ودان ءارى تارالىپ كەتپەۋى ءۇشىن ءتيىستى سانيتارلىق-ەپيدەميولوگيالىق شارالار قابىلدانۋدا، – دەپ اتاپ ءوتتى ب. ساعىنتايەۆ.

بۇدان باسقا، قالانىڭ ينفەكسيادان تازا اۋماعىن قورعاۋ ماقساتىندا ىندەت انىقتالىپ جاتقان توپتاعى ادامدار بولەك ورىندارعا ارنايى بولىنگەن تاسىمالداۋ كولىكتەرىمەن جەتكىزىلۋدە.

قازاقستان پرەزيدەنتىنىڭ تاپسىرماسىنا سايكەس مەگاپوليستىڭ ەكونوميكالىق بەلسەندىلىگىن كەزەڭ-كەزەڭىمەن جاڭعىرتۋ ستراتەگياسى ازىرلەندى. ول ءۇشىن قالانىڭ ەكونوميكاسىنا قان جۇگىرتىپ، قايتا قالپىنا كەلتىرۋ ءۇشىن الەۋەتى جوعارى كاسىپورىندار، سونداي-اق كوروناۆيرۋس ينفەكسياسىن تاراتۋ ءقاۋپى تومەن دەپ تانىلعان سەكتورلار انىقتالدى.

بيزنەس وكىلدەرى ءۇشىن بورىشكەرلىك جانە قارجىلىق قيىندىقتاردى ازايتۋ بويىنشا جۇيەلى شارالار قابىلدانۋدا. ەدب-مەن بىرلەسىپ بيزنەس سۋبەكتىلەرىنىڭ قارىزدارى بويىنشا توتەنشە جاعداي كەزىندە تولەمدەردى كەيىنگە قالدىرۋدى جەدەلدەتۋ ماسەلەسى پىسىقتالدى. بۇدان باسقا قالا ەكونوميكاسىن قالپىنا كەلتىرۋ ءۇشىن داعدارىسقا قارسى جوسپار ازىرلەنۋدە.

«جۇمىسپەن قامتۋدىڭ جول كارتاسى» باعدارلاماسى بويىنشا جوبالاردى ىسكە اسىرۋ كەزىندە شامامەن 26 مىڭ جۇمىس ورنى قۇرىلادى. قولدانىستاعى باعدارلامالاردى، اتاپ ايتقاندا، «الماتى بيزنەس – 2025» جانە ءىرى ينۆەستيسيالىق جوبالاردى ىسكە اسىرۋ جالعاسادى. ال بۇل ءوز كەزەگىندە تاعى 15 مىڭعا جۋىق جاڭا جۇمىس ورنىن قۇرۋعا مۇمكىندىك بەرەدى.

مەملەكەت باسشىسىنىڭ تاپسىرمالارىن ورىنداۋ ماقساتىمەن توتەنشە جاعداي كەزىندە حالىقتىڭ الەۋمەتتىك وسال توپتارىن جانە قالا تۇرعىندارىن قولداۋ ءۇشىن كەشەندى شارالار ىسكە اسىرىلۋدا.

مۇقتاجداردىڭ ءبىرىڭعاي ءتىزىمىن قالىپتاستىرۋ ءۇشىن وتىنىشتەر قابىلدايتىن كولل-ورتالىق قۇرىلدى. دەمەۋشىلەردىڭ قاراجاتى ەسەبىنەن ازىق-تۇلىك سەبەتىن جەتكىزۋ، 2 اەك كولەمىندە الەۋمەتتىك تولەمدەر، «Birgemiz» قق-نان 50 مىڭ تگ مولشەرىندەگى قايىرىمدىلىق كومەك، ۇوس قاتىسۋشىلارى مەن مۇگەدەكتەرىنە 1 ملن. تەڭگە، ولارعا تەڭەستىرىلگەن تۇلعالارعا 100 مىڭ تگ جانە ەڭبەك مايدانىنا قاتىسۋشىلارعا 50 مىڭ تگ مولشەرىندە ءبىرجولعى الەۋمەتتىك تولەم سەكىلدى كومەك تۇرلەرى ۇيىمداستىرىلدى.

ازىق-تۇلىك جيىنتىعىمەن 10 243 مۇقتاج وتباسى قامتاماسىز ەتىلدى. ال 2 اەك مولشەرىندەگى الەۋمەتتىك كومەكپەن 68،2 مىڭ ادام قامتىلدى. بۇگىنگى كۇنى 44،2 مىڭ ادامعا 246،2 ملن تگ كومەك كورسەتىلگەن. سونىمەن قاتار، رەسمي تۇردە جۇمىسسىز رەتىندە تىركەلگەن ءىىى توپتاعى 17،2 مىڭ مۇگەدەك جان 95،8 ملن تگ كومەك الدى.

توتەنشە جاعدايعا وراي تابىسىنان ايىرىلعان ازاماتتارعا تيەسىلى 42 500 تگ (1 ەتج) 333 215 تۇرعىنعا 14،2 ملرد تگ سوماسىندا تاعايىندالىپ، اۋدارىلدى.

تەلەفون ارقىلى سويلەسۋ بارىسىندا قازاقستان پرەزيدەنتى قاسىم-جومارت توقايەۆ قىزمەتىن قايتا باستايتىن كاسىپورىن قىزمەتكەرلەرىنىڭ سانيتارلىق قاۋىپسىزدىگىن قامتاماسىز ەتۋدى تاپسىردى. سونىمەن قاتار، قالا اكىمدىگى مۇقتاجدارعا الەۋمەتتىك كومەك كورسەتۋ شارالارىن ىسكە اسىرۋ جانە كوروناۆيرۋستىق ينفەكسيانىڭ تارالۋىنا جول بەرمەۋ ءۇشىن سانيتارلىق-ەپيدەميولوگيالىق جاعدايدى تۇراقتاندىرۋ جونىندەگى جۇمىستى جالعاستىرۋى قاجەت.