الماتىدا COVID-19 ىندەتىن جۇقتىرعان 669 جاعداي تىركەلدى.  ال سوڭعى تاۋلىكتە قالادا 145 جاڭا جاعداي انىقتالعان. بۇل تۋرالى اكىمدىكتىڭ باسپا ءسوز قىزمەتى حابارلادى.

ولاردىڭ 104ء-ى ورتالىق قالالىق كلينيكالىق اۋرۋحانانىڭ، 12ء-ى №12 قالالىق ەمحانانىڭ، 11ء-ى قازىرگى ۋاقىتتا پروۆيزورلىق ورتالىق بولىپ تابىلاتىن قالالىق پاللياتيۆتىك كومەك ورتالىعىنىڭ قىزمەتكەرلەرى. سونداي-اق قالعان 18 ادام ۆيرۋس جۇقتىرعان ناۋقاستارمەن بايلانىستا بولعان جاندار.

بۇگىندە قالاداعى جۇقپالى اۋرۋلار ستاسيونارلارىندا الماتى وبلىسىنىڭ ءبىر ناۋقاسىن قوسا العاندا 577 ادام ءقاۋىپتى ىندەتتەن ەمدەلىپ جاتىر.

ەكى ناۋقاستىڭ جاي-كۇيى – وتە اۋىر، 6 ادامدا – اۋىر، 168ء-ى اۋىرلىقتىڭ ورتاشا دارەجەسىندە، ال قالعاندارىنىڭ دەنساۋلىعى قاناعاتتانارلىق.

جالپى 88 ناۋقاس ءقاۋىپتى ىندەتتەن ساۋىعىپ شىقتى. پروۆيزورلىق گوسپيتالداردا 452 ادام، كارانتيندىك وقشاۋلاۋدا 352 جانە ءۇي كارانتينىندە 9950 ادام بار.

مەگاپوليستەگى بوستاندىق اۋدانىنىڭ باس سانيتارلىق دارىگەرىنىڭ قاۋلىسىنا سايكەس №12 قالالىق ەمحانا كارانتينگە جابىلدى.

ورتالىق قالالىق كلينيكالىق اۋرۋحاناعا قاتىستى ايتار بولساق، ستاسيونار تازا جانە ۆيرۋس جۇقتىرعان ايماقتارعا بولىنگەن. بۇگىندە ەمحانادا قوسىمشا 150 جۇقپالى، 60 پروۆيزورلىق جانە 150 كارانتيندىك توسەك-ورىن اشىلدى. ەم قابىلداپ جاتقان ناۋقاستارعا مەديسينالىق كومەك وباعا قارسى كيىم-كەشەك كيىلىپ كورسەتىلەدى. بۇل رەتتە ەم جۇرگىزىپ جاتقان مەديسينا قىزمەتكەرلەرىنىڭ بارلىعىندا تالداۋ ناتيجەلەرى تەرىس.

تالداۋلارى وڭ ناتيجە بەرگەن مەديسينا قىزمەتكەرلەرى جۇمىستان شەتتەتىلىپ، ينفەكسيالىق ستاسيونارلار مەن بولىمشەلەردە ەم-دوم قابىلداۋدا.

اكىمشىلىك قىزمەتكەرلەردى الەۋمەتتىك قورعاۋ بويىنشا تۇراقتى جۇمىس جۇرگىزۋدە. كارانتين جانە جابىق كەڭىستىك ادامداردىڭ پسيحولوگيالىق جاعدايىنا كەرى اسەر ەتۋى مۇمكىن. وسىنى ەسكەرگەن ماماندار ۇجىمداعى قارىم-قاتىناس ءادىسىن دە دۇرىس جولعا قويۋدا.

ايتا كەتۋ كەرەك، قالاداعى بارلىق مەديسينالىق ۇيىمدار قاجەتتى جەكە قورعانۋ قۇرالدارىمەن تولىق قامتىلعان.