پرەزيدەنت كوروناۆيرۋس جاعدايىنا قاتىستى كەزەكتى تەليەۆيزيالىق ۇندەۋ جاريالايدى. بۇل تۋرالى پرەزيدەنتتىڭ باسپا ءسوز حاتشىسى بەرىك ءۋالي Facebook جەلىسىندە جازدى.

– سوڭعى كەزدەرى قازاقستان پرەزيدەنتىنىڭ جۇمىس كەستەسى مەيلىنشە وزگەرگەنى جاسىرىن ەمەس. ەلىمىزدە توتەنشە جاعداي ەنگىزىلدى، وسىعان بايلانىستى قاسىم-جومارت كەمەل ۇلىنىڭ جۇمىس كەستەسى دە توتەنشە جاعداي رەجيمىنە كوشتى. پرەزيدەنتكە كەلەتىن شۇعىل ءارى ساراپتامالىق اقپاراتتاردىڭ سانى كۇرت ءوستى. ال بۇعان دەر كەزىندە جاۋاپ بەرىپ، شارا قولدانۋ كەرەك. مەملەكەت باسشىسى جاڭارتىلعان فورماتتا جۇمىس ىستەپ جاتىر. بۇگىندە كوپتەگەن جيىندار مەن كەزدەسۋلەر ۆيدەو بايلانىس ارقىلى وتكىزىلۋدە. كوروناۆيرۋسقا قارسى كۇرەس – كۇن تارتىبىندە قاراستىرىلاتىن نەگىزگى ماسەلە، – دەپ جازدى بەرىك ءۋالي.

سونىمەن قاتار ول ءوز جازباسىندا قاسىم-جومارت كەمەل ۇلىنىڭ كۇن سايىن ۇكىمەتتىڭ، توتەنشە جاعداي جونىندەگى مەملەكەتتىك كوميسسيا مۇشەلەرىنىڭ، ءوڭىر باسشىلارىنىڭ ەسەپتەرىن تىڭدايتىنىن اتاپ ءوتتى.

– جاقىندا عانا پرەزيدەنت بارلىق وبلىستاردىڭ جانە رەسپۋبليكالىق ماڭىزى بار قالالاردىڭ اكىمدەرىنە تەلەفون شالىپ، شاعىن جانە ورتا بيزنەستى قولداۋعا، حالىقتى الەۋمەتتىك قورعاۋعا، كوكتەمگى ەگىس ناۋقانىنا جانە سۋ تاسقىنىنا قارسى جۇمىستارعا بايلانىستى ناقتى تاپسىرما بەردى. لىمىزدەگى جانە الەمدەگى ەپيدەميولوگيالىق احۋال ۇنەمى وزگەرۋدە. جۋىردا تۇسكەن اقپاراتتار نەگىزىندە توتەنشە جاعداي رەجيمىنىڭ جانە كارانتين شارالارىنىڭ ۇزارتىلۋىنا قاتىستى ءتيىستى شەشىم قابىلداناتىن بولادى. وسى رەتتە مەملەكەت باسشىسى داعدارىسقا قارسى مەنەدجمەنتتەن بولەك، ستراتەگيالىق جوسپارلاۋعا دا ءمان بەرىپ وتىرعانىن ەستە ۇستاۋىمىز كەرەك. ەرتە مە، كەش پە، توتەنشە جاعداي بىتەدى. سودان كەيىن الدىمىزدان ەكونوميكانىڭ قۇرىلىمىن قايتا قاراۋ مىندەتى شىعادى، – دەدى ب. ءۋالي.

ول وسى كارانتين بىتكەننەن كەيىن الدىمىزدان ەكونوميكانىڭ قۇرىلىمىن قايتا قاراۋ مىندەتى شىعاتىنىن دا ايتىپ، ورتا جانە ۇزاق مەرزىمگە ارنالعان جاڭا ماقساتتار قويۋ كەرەكتىگىن اتادى.

– پرەزيدەنت كوپتەگەن باعدارلامالار مەن تۇجىرىمدامالاردى جاڭارتۋ قاجەتتىگىن ايتتى. مۇناي باعاسىنىڭ بىردەن قۇلدىراۋى ەكونوميكا مەن قارجى سەكتورىنا رەفورما جۇرگىزىپ، يندۋستريالاندىرۋ مەن سيفرلاندىرۋدى ناقتى جۇزەگە اسىرۋ كەرەك ەكەنىن كورسەتىپ وتىر. دەنساۋلىق ساقتاۋ جانە ءبىلىم سالالارىن دا ۇلكەن وزگەرىس كۇتىپ تۇر. مەملەكەت باسشىسى جاڭا تالاپتارعا جاۋاپ بەرەتىن ستراتەگيالىق شەشىمدەر ازىرلەۋدى تاپسىردى، – دپ جازدى پرەزيدەنتتىڭ باسپا ءسوز حاتشىسى.

سونداي-اق حالىقارالىق بايلانىستارعا دا توقتالىپ، قازىرگى ۋاقىتتا بۇل ماسەلە نەگىزىنەن تەلەفون ارقىلى نەمەسە ۆيدەو كونفەرەنسيا فورماتىندا ءجۇرىپ جاتقانىن اتاپ ايتتى.

– اتاپ ايتقاندا، جۋىردا ەۋرازيالىق ەكونوميكالىق وداق پەن تۇركى تىلدەس مەملەكەتتەرى ىنتىماقتاستىق كەڭەسىنىڭ سامميتتەرى ونلاين رەجيمدە وتكىزىلدى. نەگىزگى سەرىكتەستەرىمىزبەن جانە كورشىلەس ەلدەرمەن جەدەل اقپارات الماسۋ اسا ماڭىزدى. ءبىر ايدىڭ ىشىندە قاسىم-جومارت كەمەل ۇلى رەسەي، جۇڭگو، وزبەكستان، قىرعىزستان، تاجىكستان، يزرايل مەملەكەتتەرىنىڭ پرەزيدەنتتەرىمەن، بۇۇ جانە ەۋروپالىق وداقتىڭ باسشىلارىمەن، اقش-تىڭ مەملەكەتتىك حاتشىسىمەن تەلەفون ارقىلى سويلەستى. اتالعان كەلىسسوزدەر ازاماتتارىمىزدى شەت ەلدەردەن الىپ كەلۋگە، ءوزارا گۋمانيتارلىق قولداۋعا، ۇزدىكسىز كولىك قاتىناستارىن قامتاماسىز ەتۋگە، ازىق-تۇلىك پەن مەديسينالىق قۇرال-جابدىقتاردى جەتكىزۋگە بايلانىستى ءبىرقاتار ماڭىزدى ماسەلەلەردى شۇعىل ءارى ەشقانداي بيۋروكراتيالىق كەدەرگىلەرسىز شەشۋگە مۇمكىندىك بەردى، –دەيدى باسپا ءسوز حاتشىسى.

مەملەكەت باسشىسى ازاماتتارىمىزدىڭ دەنساۋلىعىن ساقتاۋ مەن قاۋىپسىزدىگىن قامتاماسىز ەتۋدى ەڭ باستى مىندەت سانايدى. ول بارلىق وتانداستارىمىزدى توتەنشە جاعداي رەجيمىنىڭ تالاپتارىن ساقتاۋعا شاقىرادى. جاقىندارىمىزدىڭ دەنساۋلىعى ءۇشىن سابىر ساقتاپ، جاۋاپكەرشىلىكتى سەزىنۋىمىز كەرەك. قاسىم-جومارت كەمەل ۇلىنىڭ ايتۋىنشا، «حالىقسىز ەكونوميكا بولمايدى».

سوندىقتان ەشكىم دە مەملەكەتتىڭ نازارىنان تىس قالمايدى. پرەزيدەنتتىڭ تىكەلەي تاپسىرماسى بويىنشا ازاماتتارعا قولداۋ كورسەتۋ ءۇشىن بيۋدجەتتەن جانە ۇلتتىق قوردان قاراجات بولىنۋدە. مەملەكەت باسشىسى وسى ايتىلعان ماسەلەلەردىڭ وڭ شەشىلۋىن ۇنەمى باقىلاۋدا ۇستاپ وتىر.

سونىمەن قاتار كەلەسى اپتادا پرەزيدەنت ەلىمىزدەگى كوروناۆيرۋس جاعدايىنا قاتىستى كەزەكتى تەليەۆيزيالىق ۇندەۋىن جاريالايدى.