الماتى قالاسىنىڭ اكىمى باقىتجان ساعىنتايەۆتىڭ تاپسىرماسىنا سايكەس شاھار باسشىسىنىڭ ورىنباسارى ەرجان باباقۇماروۆ باستاعان جۇمىس توبى مەديسينا قىزمەتكەرلەرىنىڭ كارانتين كەزەڭىندە ۋاقىتشا تۇرىپ جاتقان جەرىندەگى تۇرمىس جاعدايلارىن تەكسەردى.

جۇمىس توبىنىڭ قۇرامىندا Nur Otan پارتياسى الماتى قالالىق فيليالى ءتوراعاسىنىڭ ءبىرىنشى ورىنباسارى س. كانكۋروۆ، قالالىق قوعامدىق دەنساۋلىق باسقارماسى باسشىسىنىڭ ورىنباسارى ا. بيسەنبايەۆا مەن تاۋارلار مەن كورسەتىلەتىن قىزمەتتەردىڭ ساپاسى مەن قاۋىپسىزدىگىن باقىلاۋ دەپارتامەنتى باسشىسىنىڭ ورىنباسارى ن. دياگيليەۆا، سىبايلاس جەمقورلىققا قارسى ءىس-قيمىل اگەنتتىگى جانىنداعى ارنايى مونيتورينگتىك توپ ءتوراعاسىنىڭ ورىنباسارى، «جاستارعا جول» قوعامدىق قورىنىڭ پرەزيدەنتى ر. گاسانوۆ بار.

توتەنشە جاعداي كەزىندە 3،5 مىڭعا جۋىق مەديسينا قىزمەتكەرى ءوز قالاۋلارى بويىنشا جەرگىلىكتى بيۋدجەتتىڭ قارجىلاندىرۋ ەسەبىنەن 13 قوناق ءۇي كەشەنى مەن 11 جاتاقحاناعا ورنالاستىرىلدى.

جۇمىس توبى 503 مەديسينالىق قىزمەتكەر تۇرىپ جاتقان 5 قوناق ءۇي كەشەنى مەن 2 جاتاقحاناعا باردى. مۇندا جەدەل جاردەم، بالالار جۇقپالى اۋرۋلار مەن قالالىق جۇقپالى اۋرۋلار اۋرۋحانالارىنىڭ، پسيحيكالىق دەنساۋلىق ورتالىعى مەن №2 پەرزەنتحانانىڭ، №5 قالالىق كلينيكالىق اۋرۋحاناسىنىڭ قىزمەتكەرلەرى تۇرىپ جاتىر.

تەكسەرۋ بارىسىندا تۇرعىلىقتى جەردىڭ جاعدايى، قىزمەتكەرلەردىڭ بولمەلەرى، ونداعى سانيتارلىق-ەپيدەميولوگيالىق قاۋىپسىزدىك نورمالارىنىڭ ساقتالۋى، اسىرەسە بولمەلەردەگى دەزينفەكسيا جۇمىستارىنىڭ دەر كەزىندە جۇرگىزىلۋىنە ەرەكشە كوڭىل ءبولىندى. سونداي-اق جەكە قورعانۋ مەن جەكە گيگيەنا قۇرالدارىنىڭ جەتكىلىكتى دەڭگەيدە بولۋى تەكسەرىلدى.

«ەڭ باستىسى – تۇرمىس جاعدايى. دارىگەرلەر مەن مەديسينا قىزمەتكەرلەرى الدىڭعى شەپتە، ياعني قاۋىپ-قاتەر ايماعىندا جۇمىس ىستەيدى. ولارعا ىڭعايلى بولۋ ءۇشىن تۇرمىستا دا، جۇمىستا دا دۇرىس جۇيە قالىپتاستىرىلدى. بارلىق قاۋىپسىزدىك شارالارىن ساقتاۋ ماڭىزدى»، – دەپ اتاپ ءوتتى ە.باباقۇماروۆ.

قالا باسشىسىنىڭ ورىنباسارى ەرجان باباقۇماروۆ مەدقىزمەتكەرلەردى ساپالى ازىق-تۇلىكپەن قامتاماسىز ەتۋ ماسەلەسىنە دە توقتالدى. بۇل رەتتە COVID-19-عا قارسى ءىس-قيمىلعا جۇمىلدىرىلعان جانە مەديسينا قىزمەتكەرلەرىنە جاعداي جاساۋ ءۇشىن جان-جاقتى قولداۋ كورسەتۋگە دايار كاسىپكەرلەردىڭ ءرولى ەرەكشە اتاپ ءوتىلدى. ازىق-تۇلىكتىڭ جەتكىزىلۋى مەن ونىڭ ساپاسىن باقىلاۋ ەرىكتىلەردىڭ قالالىق شتابىمەن جۇزەگە اسىرىلادى.

مەديسينا قىزمەتكەرلەرىن جۇمىس ورنىنا دەيىن جەتكىزىپ، قايتا ۇيىنە اپارۋ ماسەلەسى دە پىسىقتالدى.

ساپار بارىسىندا ەرجان باباقۇماروۆ قوناق ۇيلەر مەن جاتاقحانالاردا ۋاقىتشا تۇرىپ جاتقان مەدقىزمەتكەرلەرمەن تىلدەستى. تاماقتانۋ، جۇمىسقا تاسىمالداۋ بويىنشا كورسەتىلەتىن قىزمەتتەردىڭ ساپاسى، سونىمەن قاتار جۇمىس ورىندارىنداعى ەڭبەك جاعدايلارى دا تالقىلاندى.

«ءقازىر ەلىمىز قيىن-قىستاۋ كەزەڭدى باستان كەشىرۋدە. ءبىز، مەديسينا قىزمەتكەرلەرى، قولىمىزدان كەلگەنشە ايانباي جۇمىس ىستەۋدەمىز. الماتى اكىمدىگىنە بەرىلگەن مۇمكىندىكتەر ءۇشىن العىس بىلدىرەمىز. قاجەت زاتتاردىڭ بارلىعى بار، بولمەلەر تازا، تاماقتارى دا جاقسى. قازىرگى ۋاقىتتا دارىگەر رەتىندە زور جاۋاپكەرشىلىكتى سەزىنەمىز. بىرلەسە بۇل دەرتتى جەڭەتىنىمىزگە سەنەمىن»، –  دەدى بالالار جۇقپالى اۋرۋلار اۋرۋحاناسىنىڭ رەنتگەنولوگ-لابورانتى س. ەركىنبەكوۆ.

«ەڭ الدىمەن بۇل – ءبىزدىڭ مىندەتىمىز. ءبىز حالىقتىڭ دەنساۋلىعىنا جاۋاپتىمىز. ءقاۋىپتى ىندەتتى جەڭۋ ءۇشىن جۇمىستا قالدىق. بارشاڭىزعا دەنساۋلىق تىلەيمىز، سونداي-اق باسشىلىعىمىزعا جانە قولداۋ كورسەتكەندەرگە العىس بىلدىرەمىز. ءبىز اۋرۋدى جەڭەمىز»، – دەدى №2 پەرزەنتحانانىڭ اعا مەدبيكەسى ا. توپاروۆا.

«ءبىزدىڭ جاعدايىمىز جاقسى. تازا سۋ، تازا بولمە. مۇندا كۇنىنە ەكى ۋاقىت دەزينفەكسيا جۇمىستارى جۇرگىزىلەدى. ءۇش مەزگىل تاماقتاندىرادى. كولىكتەن باس تارتىپ، جۇمىسقا جاياۋ بارامىز. اكىمدىك تاراپىنان بارلىق جاعداي جاسالعان»، – دەيدى قالالىق جەدەل جاردەم اۋرۋحاناسىنىڭ گينەكولوگيا ءبولىمىنىڭ مەڭگەرۋشىسى ق. جۇمابايەۆا.

تەكسەرۋ جۇمىستارى كەزىندە تكقسبد وكىلى بارلىق سانيتارلىق-ەپيدەميولوگيالىق نورمالاردىڭ ساقتالعانىن اتاپ ءوتتى.

«ءبىز قالانىڭ پروۆيزورلىق جانە كارانتيندىك ستاسيونارلارىندا جۇمىس ىستەيتىن مەديسينا قىزمەتكەرلەرى تۇراتىن قوناق ۇيلەر مەن جاتاقحانالاردى تەكسەردىك. بارلىق قاجەتتى شارالاردىڭ ورىندالاتىنىنا كوز جەتكىزدىك»، – دەدى ن. دياگيليەۆا.