كاسىپكەر مارعۇلان سەيسەمباي ۇيىندە 2 قىزى بار ەكەنىن ايتىپ، پوليسيا قىزمەتكەرلەرىنە جوعارىدان ءوزىن ۇستاۋ تۋرالى بۇيرىق كەلسە، ارەكەتتەرىن تىنىش جۇرگىزۋدى ءوتىندى. بۇعان دەيىن كاسىپكەر ءۇيىنىڭ ماڭىن پوليسيا قىزمەتكەرلەرى تورۋىلداپ جۇرگەنىن، وزىنە قارسى ساياسي استارى بار ءىس قوزعالۋى مۇمكىن ەكەنىن حابارلاعان.
"قايىرلى تاڭ، دوستار، سىزدەردىڭ وتىنىشتەرىڭىز بويىنشا جاعدايدىڭ بۇگىنگى تاڭداعى قالپىن باياندايىن. كەشەگى ءتۇن وڭاي بولمادى. ءۇي ماڭىندا قوزعالىس كوپ بولدى. ءبىر ماشينالار ۇزدىكسىز كەلدى-كەتتى، بىردەڭە جاسادى. جاي نارسە ەمەس ەكەنى انىق، الدە مەن بۇرىن بايقاماعام با مۇنى؟
نە بولعانىن بىلمەيمىن، قىزمەتكەرلەر راسيالارىمەن ارى-بەرى جۇگىرىپ، ۇيالى تەلەفونمەن بىرنارسە تالقىلاپ، قوسىمشا كۇش الدىرتتى (قوسىمشا 4 ماشينا كەلدى). كەيىن 12-گە تامان بارلىعى سايابىرسىدى. كەزەك اۋىسىمى بولىپ، باستىقتارى تەكسەرىپ كەتكەن بولار.
ءقازىر تۇننەن بەرى 5 ماشينا كەزەكشىلىكتە. ۇيگە قارسى بەتتەگى تاۋدا بىرەۋلەر ءجۇر. بىرنەشە رەت ولاردىڭ لينزالارى جارق-جۇرق ەتتى. شاماسى ولار ءۇيىمدى ۇستىنەن باقىلاپ وتىرعان بولار (سنايپەرلەر بولا قويماس دەپ ۇمىتتەنەمىن).
مىنە، قازىرگى جاي وسىنداي. كەشە النۇر يلياشيەۆتىڭ ۇيىنە قالاي باسىپ كىرگەندەرى تۋرالى وقىدىم. بارلىعىن قاتال تۇردە جەرگە جاتقىزعان. ءتىنتۋ بارىسىندا بارلىعى قاساقانا لاقتىرىلعان. تاعى باسقا دا ارەكەتتەر جاسالعان. وسىعان وراي، شاعىن ءوتىنىش جاساعىم كەلەدى.
قۇرمەتتى قىزمەتكەرلەر، سىزدەر مەنى وقىپ وتىرسىزدار، بىلەمىن، ويتكەنى، كەزەكشىلىكتەگى ماشيناداعىلاردىڭ بارلىعى سمارتفوندارىندا وتىر. ەگەر (اللا بەتىن ارمەن قىلسىن) سىزدەرگە بۇيرىق تۇسسە، بارلىعىن تىنىش كۇيدە جاساڭىزدارشى. ۇيدە ەكى كىشكەنتاي قىزىم بار. بالالاردى قورقىتۋدىڭ قاجەتى جوق. سىزدەرگە ەشكىم قارسىلىق كورسەتپەيدى. تىنىش كىرىپ، وزدەرىڭىزدىڭ پروسەسسۋالدىق ىستەرىڭىزدى جۇرگىزسەڭىزدەر بولادى. ۋايىمداماڭىزدار، مەن ەشقايدا قاشىپ كەتپەيمىن" دەپ جازدى مارعۇلان سەيسەمباي.
سونداي-اق مارعۇلان سەيسەمباي حالىقارالىق ۇيىمدارعا جاعدايىن بايانداپ، حات جازعانىن ەسكەرتتى.
"مەنى ەش ارەكەتسىز قاراپ وتىر دەپ ويلاپ قالماڭىزدار. مەن دە وسى جاعدايدى شەشۋ ءۇشىن قولىمنان كەلگەن ناقتى زاڭعا سايكەس ارەكەتتەردى جاساپ جاتىرمىن. ءبىراق مەنى ماسەلەنى «كەلىسىپ شەشىپ الماقشى» دەپ ويلاپ قالماڭىزدار. بۇگىن كەلەسى مەكەمەلەرگە حات جازدىم:
- اقش ەلشىلىگى،
- فرانسيا ەلشىلىگى،
- ۇلىبريتانيا ەلشىلىگى،
- ادام قۇقىعىن قورعاۋ بويىنشا ەۋروپالىق كوميسسيا،
- بۇۇ ادام قۇقىقتارى بويىنشا باسقارماسى،
- قازاقستانداعى ادام قۇقىقتارى بويىنشا بيۋرو.
ءوز حاتتارىمدا بولىپ جاتقان جاعدايعا نازار اۋدارىپ، باقىلاۋعا الۋدى سۇرادىم. ەگەر دە مەنى تۇتقىنعا الاتىن بولسا، بۇل تۋرالى بارلىق حالىقارالىق ۇيىمداردىڭ ءبىلۋىن ماقسات ەتىپ وتىرمىن.
مۇنداي جاعدايدا قولىڭنان كەلەتىن وزىڭە تاۋەلدى 99%-ىن جاسايسىڭ، ال باستى 1%-ى اللانىڭ قولىندا ەكەنىن جاقسى بىلەسىزدەر! ءارى قاراي نە بولارىن تەك ءبىر اللا بىلەدى.
جانە ءبىر ماڭىزدىسى – بۇل مەن ءۇشىن كۇرەس ەمەس، بۇل ورىن الۋى مۇمكىن شەكتەن شىعۋشىلىققا قارسى كۇرەس" دەپ جازدى مارعۇلان سەيسەمباي ءوزىنىڭ facebook پاراقشاسىندا.
پىكىر قالدىرۋ