كارانتين رەجيمى كەزىندە سپيرتتىك انتيسەپتيكتەردى قولدانۋعا بولا ما، ۇيدەن شىقپاستان ءپىتىر-ساداقانى قالاي تولەۋ كەرەك سياقتى ورازا ۇستاۋدىڭ ەرەجەلەرى تۋرالى الماتىداعى "الي-مۇحاممەد" مەشىتىنىڭ باس يمامى، ءيسلامتانۋشى-دىنتانۋشى ءقاناتالي تاكيروۆ "ۆەرەچنيي الماتى" باسىلىمىنا ايتىپ بەردى.

قازاقستان مۇسىلماندارى ءدىني باسقارماسى (قمدب) ەلدەگى ىرگەلى زەرتتەۋ ورتالىقتارىنىڭ ءبىرى – ۆ.گ.فەسەنكوۆ اتىنداعى "ۇلتتىق عارىشتىق زەرتتەۋلەر مەن تەحنولوگيالار ورتالىعىنىڭ عىلىمي دەرەكتەرىن نەگىزگە الىپ، سونداي-اق كورشىلەس وزبەكستان مەن قىرعىزستاننىڭ مۇسىلماندار ءدىني باسقارماسىمەن كەڭەسە كەلە "رامازان ايى 24 ساۋىردە باستالادى" دەپ بەلگىلەدى.

سونىمەن قاتار ورازا كەستەسى دە شاريعات نەگىزدەرى مەن عىلىمي زەرتتەۋلەرگە سۇيەنە وتىرىپ جاسالدى. وسىعان بايلانىستى ءدىني باسقارما رامازان تۋرالى اقپاراتتى قمدب-نىڭ رەسمي www.muftyat.kz سايتىنان الۋعا شاقىرادى.

ۆيرۋستى تاراتپاۋ ءۇشىن جۇما ناماز، تاراۋىق ناماز جانە وزگە دە بەس ۋاقىت قوسىمشا ناماز مەشىتتەردە ۋاقىتشا وقىلمايدى. جۇما نامازدىڭ ورنىنا بارلىعى ءوز ۇيىندە بەسىن نامازىن وقيدى. ويتكەنى جاماعاتپەن ءارى مەشىتتە وقىلماعان ناماز شاريعات تالاپتارى بويىنشا جۇما نامازى بولىپ ەسەپتەلمەيدى.

سونداي-اق مەشىت جانىنداعى اسحانالار مەن قوعامدىق ورىنداردا اۋىزاشار وتكىزۋ توقتاتىلدى. قمدب قازاقستاندىقتاردى رامازاندا تاراۋىق نامازىن ۇيدە، وتباسى مۇشەلەرىمەن وقۋعا كەڭەس بەرەدى.

ءپىتىر-ساداقا سوماسى تۋرالى

قمدب پرەزيديۋمى شەشىمىمەن بيىل ءپىتىر-ساداقا مولشەرى جان باسىنا 370 تەڭگە بولىپ بەلگىلەندى. بۇل – نارىق باعاسى بويىنشا ورتاشا ەكى كيلوگرامم ۇننىڭ قۇنىمەن پارا-پار. ماتەريالدىق ءال-اۋقاتى جاقسى ادامدار ءپىتىر-ساداقانى مەيىز نەمەسە قۇرما باعاسى بويىنشا بەرگەنى ءجون.

رامازان كەزىندە ەڭ باستى قاجەتتىلىكتەرىن وتەگەننەن كەيىن قالعان مالى مەن قارجىسىنىڭ قۇنى كۇمىس نيسابىنا ياعني 127 مىڭ تەڭگەگە تەڭ بولعاندار ءوزى جانە وتباسى مۇشەلەرى ءۇشىن ءپىتىر-ساداقا تولەۋگە مىندەتتى.

ءپىتىر-ساداقا ورازا كەزىندە كەتكەن قاتەلىكتەردى جۋىپ-شايۋ ءۇشىن جانە مۇقتاج جاندارعا ماتەريالدىق كومەك جاساۋ ءۇشىن بەرىلەدى.

ونلاين-قايىرىمدىلىق تۋرالى

توتەنشە جاعدايعا بايلانىستى رامازان ايى كەزىندە ەلدە ءپىتىر-ساداقا مەن زەكەتتى  kaspi.kz موبيلدىك قوسىمشاسى ارقىلى تولەۋگە بولادى.

مۇنداي شەشىم باس ءمۇفتي ناۋرىزباي قاجى تاعان ۇلىنىڭ جەتەكشىلىگىمەن وتكەن قمدب پرەزيديۋمىنىڭ ونلاين-وتىرىسىندا قابىلدانعان بولاتىن.

قمدب مەن بانك باسشىلىعى اراسىنداعى كەلىسىم بويىنشا، بىرلەسكەن ونلاين-جوبا قاسيەتتى رامازان ايىندا جۇزەگە اسىرىلماق.

موبيلدىك قوسىمشاعا رەسپۋبليكالىق جانە وبلىستىق ماڭىزى بار قالالارداعى بارلىق ورتالىق مەشىتتىڭ شوتى ەنگىزىلەدى. ءار ازامات ءوز ايماعىنداعى مەشىتتىڭ شوتىنا ءپىتىر-ساداقا مەن زەكەتتى ۇيىنەن شىقپاستان اۋدارا الادى.

كارانتين تاريحى تۋرالى

مۇحاممەد پايعامبار (وعان اللانىڭ يگىلىگى مەن سالەمى بولسىن) ىندەت تارالعان كەزدە ادامداردى اۋرۋدان امان الىپ قالۋ ءۇشىن كارانتين جاريالاعانىن كوبى بىلە بەرمەيدى. اللا ەلشىسى سەرىكتەرىنە "ەگەر سەندەر ءبىر جەردە وبا جايىلعانىن ەستىسەڭدەر، ول جەرگە بارماڭدار. ەگەر وبا سەندەر تۇرعان جەرگە جايىلسا، وندا ودان قاشامىن دەپ ەشقايدا كەتپەڭدەر" دەگەن. سوندىقتان يسلام ۇسىناتىن العاشقى امال – كارانتين.

جاقسى ىستەر ۋاقىتى

پايعامبارىمىز مۇحاممەد (وعان اللاھتىڭ يگىلىگى مەن سالەمى بولسىن): "اللا تاعالا ونىڭ جەڭىلدىكتەرىن قولدانعانداردى جاقسى كورەدى جانە كۇنا جاساعانداردى جەك كورەدى" دەگەن. دەنساۋلىق جاعدايىنا بايلانىستى ورازا ۇستاي الماعاندار 60 مۇقتاج ادامدى تاماقتاندىرۋى قاجەت.

قمدب ازاماتتاردى ورازا ۇستايتىن تۋىستارى مەن تانىستارىنا تاماقتى ۇيلەرىنە دەيىن جەتكىزىپ بەرۋگە، از قامتىلعان جانە مۇقتاج وتباسىلارعا قاجەتتى ازىق-تۇلىك تاراتۋعا شاقىردى.

اۋىزاشار شىعىندارىن اقشالاي كومەك تۇرىندە مۇقتاج ادامدارعا ءبولىپ بەرۋلەرىنە دە بولادى

سپيرتتىك انتيسەپتيكتەر تۋرالى

شاريعات زاڭدىلىقتارى ادامداردىڭ توتەنشە جاعدايى مەن قاجەتتىلىگىن ەسكەرەدى. وسى جاعدايلاردى ەسكەرەتىن زاڭدار بار، ويتكەنى شاريعاتتىڭ باستى ماقساتى – جەڭىلدىك جاساۋ. اللا تاعالا قۇراندا: "اللا سەندەرگە جەڭىلدىك تىلەيدى جانە قيىنشىلىقتى قالامايدى" دەيدى.

شاريعاتتىڭ زاڭى بويىنشا ءبىز قۇزىرەتتى ادامداردىڭ ايتقاندارىن ورىنداۋىمىز كەرەك، بۇل جاعدايدا دارىگەرلەر مەن سانيتارلىق ەپيدەميولوگتار پروفيلاكتيكالىق شارا رەتىندە قولعا ارنالعان سپيرتتىك انتيسەپتيكتەردى قولدانۋدى قاتاڭ ۇسىنعان. قۇراندا دا "ىسكە كەلگەندە ولارمەن دە اقىلداس" دەپ بەكەر ايتىلماعان.

قۇرامىندا سپيرت بار قۇرالداردى قولدانۋعا بولادى، الايدا ونىڭ قۇرامىندا ءجۇزىم مەن قۇرما بولماۋى قاجەت. سونداي-اق شاريعاتقا سايكەس مەديسينالىق سپيرت ءتىپتى اراقتى انتيسەپتيك رەتىندە قولدانۋعا رۇقسات ەتىلگەن، ءبىراق ناماز الدىندا ونى مىندەتتى تۇردە جۋىپ تاستاۋ قاجەت.

سايدا احمەدوۆا