قازاقستان رەسپۋبليكاسى مەن قازاقستان ۇلتتىق بانكى Bank of New York Mellon (بۇدان ءارى – BNYM) لوندوندىق فيليالىندا ورنالاسقان جارتى ميلليارد دوللاردان استام ۇلتتىق بانكتىڭ اقشالاي قاراجاتىنا تىيىم سالۋ ءۇشىن ارەكەتتەر جاساعان ەكى مولداۆالىق بيزنەسمەندەر – اناتول جانە گابريەل ءستاتيدى تاعى دا ءبىر جەڭىلىسكە ۇشىراتتى، –  دەپ حابارلايدى ادىلەت مينيسترلىگىنىڭ رەسمي سايتى.

"2017 جىلدىڭ قازان ايىندا ستاتي تارابى بەلگيالىق سوتتاردان BNYM-گە جولدانعان اتقارۋ بۇيرىعىن الدى. سونىڭ نەگىزىندە BNYM 22 ملرد اقش دوللارىن قۇرايتىن ۇلتتىق بانك شوتتارىنا تىيىم سالدى. ادىلەت مينيسترلىگى مەن ۇلتتىق بانك تىيىم سالىنعان قاراجات سوماسىن 530 ملن اقش دوللارىنا دەيىن تومەندەتتى. 2018 جىلدىڭ 25 مامىرىندا بەلگيالىق سوت داۋدى شەشۋ ءۇشىن انگليانىڭ سوتىنا سىلتەمە جاسادى. اعىلشىن سوتى بۇل ماسەلەنى تورتكۇندىك سوت پروسەسىندە قاراپ، 2020 جىلعى 22 ساۋىردە شەشىم شىعاردى" دەلىنگەن اقپاراتتىق حابارلامادا.

ستاتي زاڭگەرلەرى اعىلشىن سوتىنا 530 ملن اقش دوللارى مولشەرىندەگى قاراجات قازاقستان رەسپۋبليكاسى الدىنداعى BNYM بەرەشەگىن قۇراپ، بەلگيالىق تىيىم سالۋدى قولدانۋدىڭ اياسىنا كىرەدى دەپ حابارلاعان.

سۋديا تير ولاردىڭ دالەلدەرىن قابىلداماي، مىناداي شەشىم قابىلداعان:

"(i) قازاقستان رەسپۋبليكاسى BNYM مەن ۇلتتىق بانك اراسىنداعى جاھاندىق دەپوزيتارلىق كەلىسىمنىڭ تارابى بولىپ تابىلمايدى، (ii) جاھاندىق دەپوزيتارلىق كەلىسىم بويىنشا BNYM مىندەتتەمەلەرى تەك قانا ۇلتتىق بانككە تيەسىلى (قازاقستان رەسپۋبليكاسىنا ەمەس)، (iii) جاھاندىق دەپوزيتارلىق كەلىسىمگە سايكەس BNYMء-نىڭ قازاقستان رەسپۋبليكاسىنا اقشالاي قاراجاتتى تولەۋ بويىنشا مىندەتتەمەلەرى جوق، (iv) قازاقستان رەسپۋبليكاسىنىڭ جاھاندىق دەپوزيتارلىق كەلىسىمگە سايكەس BNYM دەپوزيتتەرىندەگى اقشا قاراجاتىنا قاتىستى BNYM-گە قانداي دا ءبىر تالاپ قويۋ قۇقىعى جوق".

قازاقستان رەسپۋبليكاسىنىڭ ادىلەت ءمينيسترى مارات بەكەتايەۆتىڭ سوزىنشە، ءۇش جىل بۇرىن بۇل سوت تورەلىك شەشىم ستاتي تاراپىنان الاياقتىق جولمەن الىندى دەپ ويلاۋعا جەتكىلىكتى دالەل بار ەكەنىن انىقتاعان.

– ءقازىر سوت ولار بوگدە زاڭدى تۇلعانىڭ اكتيۆتەرىنە تىيىم سالدى دەپ قاۋلى ەتتى. ءبىز بۇرىنعىداي ستاتي الاياقتىعىنا قارسى كۇرەس ءۇشىن بارلىق قاجەتتى شارالاردى ولار تاڭداعان ءاربىر يۋريسديكسيادا قابىلداۋعا دايىنبىز، – دەدى مينيستر.