كارانتين كەزىندە مەشىتتەردىڭ ەسىگى جابىلعانىمەن، ساۋاپتى ىسكە ءاردايىم جول اشىق. مۇسىلماندار ءۇشىن ەڭ قاسيەتتى ءارى ون ەكى ايدىڭ سۇلتانى سانالاتىن ورازانىڭ باستالۋىنا ساناۋلى ساعاتتار قالدى، دەپ حابارلايدى Almaty.tv ءتىلشىسى.

ەلدەگى توتەنشە جاعدايعا بايلانىستى اۋىز بەكىتۋگە نيەتتەنگەندەردىڭ تولعاندىرعان ءبىرقاتار سۇراقتارىنا قمبد تولىقتاي جاۋاپ بەردى. كارانتين كەزىندە ورازانىڭ پارىزدارى قالاي ورىندالماق؟ ءپىتىر ساداقانى قالاي تولەيمىز؟

ورازا ادام بالاسىن سابىرلىققا تاربيەلەپ، باردىڭ دا، جوقتىڭ دا ءقادىرىن تۇسىنۋگە شاقىراتىن اي. بۇل اي جاقسى ىستەردىڭ باسىندا بولىپ، جاماننان تىيىلۋعا تاپتىرماس مۇمكىندىك دەيدى ءدىن وكىلدەرى. اۋىز بەكىتكەن جان تەك ءىشىپ جەۋدەن عانا تىيىلماي، جاقسى امالدار جاساپ، اينالاسىن مەيىرىم مەن يماندىلىققا  شاقىرۋى ءتيىس. بيىل ەلدە جاريالانعان توتەنشە جاعدايعا بايلانىستى مەشىتتەردىڭ ەسىگى جابىلعانىمەن، قايىرىمدىلىق جاساۋعا جول اشىق.

«ءقادىرلى حالايىق! رامازان تاۋبە مەن تاربيە، تاقۋالىق پەن قاناعات، شۇكىر مەن سابىر، مەيىرىم مەن قايىرىمدىلىق، بەرەكە مەن بىرلىك ايى. ورازا ساۋاپ جيناپ، رۋحاني كەمەلدەنۋ ايى. تۇيىندەپ ايتقاندا رامازان راببىمىزدىڭ مەيىرىم ماحابباتىنا بولەنەتىن اي»، – دەدى قمدب ءتوراعاسى، باس ءمۇفتي ناۋرىزباي قاجى تاعان ۇلى.

ءدىني باسقارما وكىلدەرىنىڭ سوزىنشە بىرەۋدىڭ ومىرىنە جاۋاپتى قىزمەتكەرلەرگە ورازا ۇستاۋدى كەيىنگە قالدىرۋىنا بولادى. ولار دارىگەرلەر، ۇشقىشتار، ەل تىنىشتىعىن كۇزەتىپ جۇرگەن اسكەريلەر مەن اۋىر جۇمىستا ىستەيتىندەر.

«سونىمەن قاتار، ەلدىڭ قارۋلى كۇشتەرى، بەيبىت جاعدايدان سوعىس جاعدايىنا كوشىرىلگەن جاعدايدا ورازا تۇتۋ اسكەردىڭ قىراعىلى مەنەن جاۋىنگەرلىك دايارلىعىن السىرەتۋگە الىپ بارسا ورازانى توقتاتۋعا رۇقسات ەتىلەدى. ونىڭ ورنىنا باسقا كۇندەرى ورازا ۇستايدى»، – دەدى قمدب ءتوراعاسىنىڭ ورىنباسارى، نايب ءمۇفتي ەرشات وڭعاروۆ.

اۋىز بەكىتكەندەرگە انتيسەپتيكالىق قۇرالدار مەن ءسپيرتتى تازالىق ماقساتىندا قولدانۋعا بولادى. ول ورازانى بۇزبايدى. سەبەبى ءقازىر توتەنشە جاعدايدامىز، سوندىقتان ۆيرۋس كەزىندە دەنساۋلىعىنا زيان كەلتىرمەي، قايتا ونى قورعايتىن دۇنيەلەردى قولدانۋ قاجەت، مۇنى شاريعاتىمىز قولدايدى، – دەدى باس ءمۇفتي. ال «مۇسىلماننىڭ قارۋى – دۇعا جاساۋ». سوندىقتاندا ەلىمىزدىڭ ءدىن عۇلامالارى دا سىندارلى ساتتە بىر-بىرىمىزگە جاقسى ءسوز ايتىپ، كومەككە مۇقتاج وتباسىلارعا قايىرىمدىلىق جاساپ، مول سا¬ۋاپ جيناۋعا ۇگىتتەيدى.

«الەمدى جايلاپ بارا جاتقان ىندەتتەن قۇتىلۋدى امان ساقتاۋدى تىلەپ،  جاراتۋشى يەمىزگە دۇعا جاساپ، تىلەك تىلەيىك. وسىنى ۇمىتپايىق. اللا تاعالا ءبىر اۋىرتپالىقتان سوڭ ءبىر جەڭىلدىك بەرەمىن دەيدى. ولاي بولسا سول جەڭىلدىگىن تەزىرەك بەرسىن. سونى سۇرايىق. ەلىمىز امان بولسىن، حالقىمىز امان بولسىن!» – دەدى ر. سۇلەيمەنوۆ اتىنداعى شىعىستانۋ ينستيتۋتىنىڭ ديرەكتورى ءابساتتار قاجى دەربىسالى.

«يسلام قاعيداتتارىنا سايكەس قيىندىقتاردان كەيىن كوپ جەڭىلدىكتەر كەلەدى. جانە قيىندىعى كوبەيگەن ىس-ارەكەتتىڭ ساۋابى دا كوپ بولاتىندىعى ءسوزسىز. سوندىقتان بۇل قيىندىقتاردان كەيىن دە ەلىمىزگە بەرەكەلى، مەرەكەلى كەزەڭدەر كەلەدى دەپ سەنەمىز. قازاقستان مۇسىلماندارى ءدىني باسقارماسىنىڭ مالىمدەمەلەرىنە جۇگىنە وتىرىپ، ءبىز وسى قاسيەتتى ايدا ۇيدە وتىرىپ تا كوپتەگەن عيبادات، قۇلشىلىعىمىزدى، قايىرلى، ىزگى امالدارىمىزدى جۇزەگە اسىرۋعا مۇمكىندىگىمىز كوپ»، – دەدى نۇر-مۇباراك ەگيپەت يسلام مادەنيەتى ۋنيۆەرسيتەتىنىڭ پرورەكتورى قايرات قۇرمانبايەۆ.

ءوز قاجەتتىلىگىن قوسپاعاندا 127 مىڭ تەڭگەسى بار ادام رامازان ايىندا ءوزى جانە جانۇياسى ءۇشىن ءپىتىر ساداقاسىن بەرۋى – مىندەت. ءپىتىر ساداقاسى پەندەنىڭ ورازا كەزىندە جىبەرىپ العان قاتە-كەمشىلىكتەرىنىڭ ورىنىن تولتىرۋعا كومەكتەسپەك. ال ودان جينالعان قارجى مۇقتاج جانداردى ماتەريالدىق قولداۋ ماقساتىندا جۇمسالاتىن بولادى.

مەشىتتەردە ازىرگە ناماز وقۋ ۋاقىتشا توقتاتىلعانىمەن، قۇلشىلىق جاساۋعا ەشنارسە كەدەرگى ەمەس. ەندى ءپىتىر ساداقانى بەرۋ ءۇشىن مىناداي جاشىك ىزدەپ مەشىتكە سابىلۋدىڭ ەش قاجەتى جوق. قالتا تەلەفونىڭىزدان كاسپي قوسىمشاسى ارقىلى اقشا اۋدارۋىڭىزعا بولادى. ونىڭ نۇسقاۋلىعىن مۋفتياتتىڭ رەسمي پاراقشاسىنان تابا الاسىز. بيىل جان باسىنا بەلگىلەنگەن ءپىتىر ساداقانىڭ مولشەرى 370 تەڭگە.