نۇرسۇلتان نازاربايەۆتىڭ تاپسىرماسىمەن دۇيسەنبىدە، ياعني 27 ساۋىردەن باستاپ «Birgemiz» قورىنان مۇقتاجدارعا كومەك كورسەتۋدىڭ ەكىنشى كەزەڭى باستالماق. بۇل جولى وسىعان دەيىن مۇنداي كومەك الماعان 210 مىڭنان استام مۇقتاج وتباسى قامتىلىپ، ولارعا 50 مىڭ تەڭگەدەن اۋدارىلادى. بۇل تۋرالى Nur Otan پارتياسى ءتوراعاسىنىڭ ءبىرىنشى ورىنباسارى باۋىرجان بايبەك facebook جەلىسىندەگى پاراقشاسىندا كۇللى مۇسىلمان قاۋىمىن قاسيەتتى رامازان ايىمەن قۇتتىقتاعان جازباسىندا ايتتى.

«بۇل رەتتە ەلباسىنىڭ تاپسىرماسىمەن «Nur Otan» پارتياسى دا العاشقى كۇننەن باستاپ ءوزىنىڭ بۇكىل الەۋەتىن پرەزيدەنت جاريالاعان كوروناۆيرۋسپەن كۇرەس شارالارىن قولداۋعا، مۇقتاجدارعا كومەك ۇيىمداستىرۋعا جۇمىلدىردى. «Birgemiz» قورى اياسىندا 152 مىڭ وتباسى 50 مىڭ تەڭگەدەن ءبىرجولعى كومەك الدى. 76 مىڭ وتباسى ءبىرىنشى كەزەكتە قاجەتتى تاۋارلارمەن قامتاماسىز ەتىلدى. الەۋمەتتىك جاعىنان ءالسىز تۇرعىندارعا 5 ميلليون ماسكا تەگىن تاراتىلدى. پارتيامىزدىڭ ليدەرى نۇرسۇلتان نازاربايەۆتىڭ پارمەنىمەن دۇيسەنبىدە، ياعني 27 ساۋىردەن باستاپ مۇقتاجدارعا كومەك كورسەتۋدىڭ ەكىنشى كەزەڭى باستالماق. بۇل رەتتە الدىندا مۇنداي كومەك الماعان 210 مىڭنان استام مۇقتاج وتباسى قامتىلىپ، ولارعا 50 مىڭ تەڭگەدەن اۋدارىلاتىن بولادى» دەپ اتاپ ءوتتى باۋىرجان بايبەك.

ونىڭ ايتۋىنشا، سونىمەن بىرگە ازىق-تۇلىك سەبەتى مەن جەكە قورعانىس قۇرالدارى تۇرىندەگى اتاۋلى كومەك كورسەتۋ دە ءوز جالعاسىن تابادى.

«قاسيەتتى ايدا وسى باعىتتاعى يگىلىكتى ىستەردى ءارى قاراي ءىلىپ اكەتىپ، قينالعانعا دەمەۋ، جابىققانعا جەبەۋ بولاتىن قايىرىمدى جاندار قاتارى ارتا تۇسەتىنىنە سەنىمدىمىن. بيىلعى رامازان ايى بارشا الەم حالقى قاتەرلى ىندەتپەن كۇرەسىپ جاتقان قىسىلتاياڭ شاقپەن تۇسپا-تۇس كەلىپ وتىر. مەملەكەتىمىزدىڭ دەر كەزىندە قولعا العان ساقتىق شارالارى مەن حالقىمىزدىڭ اۋىزبىرشىلىگىنىڭ ارقاسىندا بۇل قاتەرلى ىندەتتىڭ كەڭ تارالۋىنا جول بەرىلمەي، قيىندىقتاردى بىرتىندەپ ەڭسەرىپ كەلەمىز. ەل پرەزيدەنتى قاسىم-جومارت توقايەۆ ءوز قۇتتىقتاۋىندا اتاپ كورسەتكەندەي، «رامازان ايىندا ءاردايىم ىرىس پەن ىنتىماق، ىزگىلىك پەن مەيىرىم سالتانات قۇرادى. وتىز كۇن ورازادا مۇقتاج جانداردى قولداپ، قايىرىمدىلىق كورسەتۋ يگى داستۇرگە اينالدى» دەدى ول.