ق ر كاسىپكەرلەر قۇقىعىن قورعاۋ بويىنشا وكىلى رۇستەم ءجۇرسىنوۆ ءىرى بيزنەس سۋبەكتىلەرى نەسيە، سالىق جانە جالاقى مىندەتتەمەلەرى بويىنشا تۇسكەن قارجىلىق قىسىمعا بايلانىستى الاڭداۋشىلىق ءبىلدىرىپ، مەملەكەتتەن كومەك سۇراپ وتىرعانىن ءمالىم ەتتى.

كارانتين شەڭبەرىندە قابىلدانعان شەكتەۋلەردەن العاش شاعىن جانە ورتا كاسىپكەرلىك سۋبەكتىلەرى زارداپ شەككەندىكتەن بۇعان دەيىن بارلىق قولداۋ شارالارى سولارعا باعىتتالعانىن ايتقان ول ەندى ءىرى كاسىپكەرلىكتىڭ دە ەلەۋلى قيىندىقتارعا تاپ بولىپ وتىرعانىن ايتتى.

– ءىرى بيزنەستىڭ باسىم بولىگى ەكسپورتقا باعىتتالعان. جانە ءقازىر ول الەمدىك باعا مەن تۇتىنۋدىڭ تومەندەۋى سياقتى جاھاندىق ەكونوميكالىق ترەندتەردىڭ قىسىمىنا ءتۇستى. ەكسپورتقا باعدارلانعان كاسىپورىندار ءۇشىن ققس اسىپ كەتكەن سوماسىن قايتارۋ پروبلەماسى ەكسپورتتىق الەۋەتتى دامىتۋعا ەلەۋلى كەدەرگى بولىپ وتىر. قازىرگى قالىپتاسقان جاعدايدا ءىرى بيزنەستى قولداۋ كاسىپورىنداردى ساقتاپ قانا قويماي، داعدارىس كەزەڭى اياقتالعاننان كەيىن ەكونوميكانى قالپىنا كەلتىرۋگە مۇمكىندىك بەرەدى. ءبىز ۇكىمەتكە ۇلكەن جۇيە قۇراۋشى كاسىپورىنداردى قولداۋ شارالارىن باستاۋ كەرەك دەگەن باستامانى جەتكىزدىك. ءىرى بيزنەستىڭ بارلىق سۋبەكتىلەرىنە ققس اسىپ كەتۋىن وڭايلاتىلعان تارتىپپەن قايتارۋ بويىنشا سالىق كودەكسىنىڭ نورمالارىن تاراتۋ بولىگىندە سالىق نورمالارىن قايتا قاراۋ، سونداي-اق قايتارۋ شەگىن 90%-عا دەيىن ارتتىرۋ مۇمكىندىگىن ۇسىندىق، – دەدى ق ر كاسىپكەرلەر قۇقىعىن قورعاۋ بويىنشا وكىلى facebook پاراقشاسىندا.

سونداي-اق كاسىپكەرلەر قۇقىعىن قورعاۋ وكىلى ءىرى بيزنەستى قولداۋ ءۇشىن شەكتەۋ شارالارىن (ققس اسىپ كەتۋىن قايتارۋ بويىنشا تەكسەرۋلەردى قوسپاعاندا) جانە ترانسفەرتتىك باعا بەلگىلەۋ بويىنشا تەكسەرۋلەردى جۇرگىزۋدى توقتاتۋ، سونداي-اق مەملەكەتتىك كىرىستەر ورگاندارى جۇرگىزەتىن ترانسفەرتتىك باعا بەلگىلەۋ بويىنشا ەسەپتىلىكتى تاپسىرۋ مەرزىمدەرىن اۋىستىرۋ بويىنشا شارالار قاراستىرۋ ۇسىنىلعان.

ۇيىم تابىس مولشەرىنىڭ تومەندەۋىنە جانە ققس بويىنشا اينالىم كولەمىنىڭ تومەندەۋىنە بايلانىستى ەڭبەكاقى تولەۋ قورى بويىنشا سالىق جۇكتەمەسىن تومەندەتۋ دە ورىندى بولار ەدى دەپ سانايدى. مىسالى، 30% - 50% - 80% گراداسياسىنداعى ققس اينالىم كولەمى تومەندەۋىنىڭ ءوزارا بايلانىستىلىعى.

بۇدان باسقا، كاسىپكەرلەرگە تۇسەتىن اكىمشىلىك جۇكتەمەنى تومەندەتۋ ءۇشىن بيزنەستى قولداۋدىڭ كەلەسى شارالارىن قاراستىرۋ ۇسىنىلعان:

- قوسارلانعان سالىق سالۋدىڭ حالىقارالىق كونۆەنسيالارىن زاڭدى قولدانۋ ءۇشىن رەزيدەنت ەمەستەردىڭ 2019 جىلعى سالىق كەزەڭىنە بەرىلگەن رەزيدەنتتىك كۋالىكتەرىن سالىق اگەنتتەرىنە جانە سايكەسىنشە سالىق اگەنتتەرىن سالىق ورگاندارىنا ۇسىنۋ مەرزىمدەرىن 2020 جىلدىڭ 31 جەلتوقسانىنا دەيىن كەيىنگە قالدىرۋ؛

- جىل سوڭىنا دەيىن رەنتابەلدىلىگى تومەن كەن ورىندارى ءۇشىن پايدالى قازبالاردى وندىرۋگە سالىناتىن سالىق ستاۆكالارىن تومەندەتۋ ءتارتىبىن دەربەس اۆتوماتتى تۇردە قولدانۋ ءتارتىبىن ەنگىزۋ؛

- تاۋارلارعا ىلەسپە جۇكقۇجاتتاردى جاپپاي ەنگىزۋ مەرزىمىن 2020 جىلدىڭ 1 شىلدەسىنەن 2022 جىلدىڭ 1 قاڭتارىنا دەيىن اۋىستىرۋ؛

- بانك كەپىلدىگىن الۋدىڭ كۇردەلىلىگىنە بايلانىستى سالىقتاردى تولەۋ بويىنشا مەرزىمىن كەيىنگە قالدىرۋ جانە مەرزىمىن ۇزارتۋدى بانك كەپىلدىگىن تالاپ ەتپەستەن ۇسىنۋ.