قازاقستاندا پرەزيدەنتتىك ينستيتۋتتىڭ ەنگىزىلگەنىنە 30 جىل تولۋىنا وراي ونلاين رەجيمدە حالىقارالىق عىلىمي-تاجىريبەلىك كونفەرەنسيا ءوتىپ جاتىر، دەپ حابارلايدى قازاقپارات.

«پرەزيدەنتتىك باسقارۋ نىسانى. كونستيتۋسيالىق نەگىز جانە ساياسي تاجىريبە» اتتى حالىقارالىق ونلاين كونفەرەنسيادا العاشقىلاردىڭ ءبىرى بولىپ قازاقستاننىڭ تۇڭعىش پرەزيدەنتى – ەلباسى قورىنىڭ اتقارۋشى ديرەكتورى قانات جۇمابايەۆ ءسوز سويلەدى.

– ەلىمىزدىڭ تاريحىندا پرەزيدەنتتىك ينستيتۋتتىڭ ماڭىزى زور. مىقتى پرەزيدەنتتىك باسقارۋ ينستيتۋتى ەلىمىزدى ساياسي، ەكونوميكالىق جانە الەۋمەتتىك مودەرنيزاسيانى ءساتتى ىسكە اسىرۋعا جاعداي جاساپ، ەل ىشىندەگى تۇراقتىلىق پەن بىرلىكتى قامتاماسىز ەتتى. بۇگىن دە جاھاندىق كوروناۆيرۋس پاندەمياسى الەمدەگى ساياسي ينستيتۋتتار ءۇشىن ۇلكەن سىناققا اينالدى. قازىرگى تاڭدا جاھاندىق دەڭگەيدەگى ساياسي قۇرىلىم مودەلدەرى تالقىلانىپ جاتىر. وسى رەتتە قازاقستانداعى پرەزيدەنتتىك ينستيتۋتتىڭ وزەكتى باعاسىن بەرۋ – وتە ماڭىزدى، – دەيدى ەلباسى قورىنىڭ اتقارۋشى ديرەكتورى ونلاين كونفەرەنسيا بارىسىندا.

قانات جۇمابايەۆتىڭ ايتۋىنشا، نۇرسۇلتان نازاربايەۆ نارىق ەكونوميكاسىنا كوشۋ، دەموكراتيالىق قوعام قۇرۋ، ۇلتتىق ءوزىن-وزى دامۋدى قالىپتاستىرۋ – توقسانىنشى جىلدارى مەملەكەتىمىزدىڭ نەگىزگى ماقسات-مىندەتتەرىنە اينالعان.

– تاۋەلسىزدىك العان جىلدارى ەلباسىنىڭ قاتىسۋىمەن كوپتەگەن ماڭىزدى شەشىم قابىلداندى. كونستيتۋسيا قابىلدانىپ، ۇلتتىق ۆاليۋتا ەنگىزىلدى، قارۋلى كۇشتەر جاساقتالىپ، ۇلتتىق قور جاسالدى. ۇلتتىق قور – بولاشاق ۇرپاق ءۇشىن قاۋىپسىزدىك كەپىلى. كورىپ وتىرعانىمىزداي بۇل وتە دانا شەشىم. تۇڭعىش پرەزيدەنت ەل باسقارعان جىلدارى قازاقستان وتە جاۋاپتى ءارى قۇرمەتتى حالىقارالىق قاۋىمداستىق مۇشەسىنە اينالدى. تۇركى كەڭەسىنىڭ نەگىزىن قالاۋشى اتاندى. سول سەبەپتى پرەزيدەنتتىك باسقارۋ فورماسى – قازاقستاننىڭ مەملەكەتتىگى تاريحىندا وتە ماڭىزدى ەكەنىن اتاپ ءوتۋ كەرەك، – دەدى ول.