كوروناۆيرۋس ىندەتىنەن كوز جۇمعان ناۋقاستاردىڭ ولىمىنە سوزىلمالى سىرقاتتارى دا سەبەپكەر بولۋدا. بۇل تۋرالى الماتى قالاسىنىڭ مەملەكەتتىك باس سانيتارلىق دارىگەرى جانداربەك بەكشين ونلاين-بريفينگتە ايتتى.

– 24 ساۋىردەگى جاعداي بويىنشا ينفەكسيادان 8 ادام كوز جۇمعان. جاسى 56-89 جاس ارالىعىنداعى 4 ەر جانە 4 ايەل. ورتاشا جاستارى – 66. ولاردا قانت ديابەتى، سەمىزدىك، جۇرەكتىڭ يشەميالىق اۋرۋى، ارتەريالىق گيپەرتەنزيا، باۋىر سيرروزى سياقتى سوزىلمالى كەسەلدەرى بولعان. ءولىم-جىتىم جاعدايىن زەردەلەۋ ماقساتىندا قالادا ارنايى كوميسسيا قۇرىلعان. كوميسسيا مۇشەلەرى تاراپىنان تالداۋلار جۇرگىزىلىپ، ءولىمنىڭ نەگىزگى سەبەبى انىقتالادى. قايتىس بولعان 5 ناۋقاستىڭ ولىمىنە سوزىلمالى اۋرۋلارى سەبەپكەر بولعان.  ينفەكسيادان ساۋىعىپ شىققانداردىڭ اراسىندا ەكى جاقتى پنيەۆمونيامەن اۋىراتىندار بولدى، ول ناۋقاستاردى ەمدەۋ كۋرسى 14 كۇننەن اسىپ جىعىلدى.  سوزىلمالى اۋرۋلارى بار ناۋقاستاردىڭ اراسىندا قاتەرلى ينفەكسيادان ەمدەلىپ شىققاندار قازىرگى تاڭدا ولار امبۋلاتوريالىق-ەمحانالىق قىزمەت وكىلەرىنىڭ ءجىتى باقىلاۋىندا، – دەدى ج.بەكشين.

سونداي-اق، سپيكەر ىندەت وشاعى بولىپ سانالاتىن ورتالىق قالالىق كلينيكالىق اۋرۋحاناسىندا اتقارىلىپ جاتقان ساۋىقتىرۋ شارالارىنا توقتالىپ ءوتتى.

– ورتالىق قالالىق كلينيكالىق اۋرۋحاناسى جابىلعان كۇننەن باستاپ ءبىز وندا ساۋىقتىرۋ ءىس-شارالارىن جۇرگىزىپ جاتىرمىز. ءبىرىنشى كەزەكتە زالالسىزداندىرۋ جۇمىستارىنا ءمان بەرىلەدى. كەشە دەزينفەكسيالاۋ جۇمىستىرانىڭ ءبىرىنشى كەزەڭى اياقتالدى. ۇساق ديسپەرستى بۇركۋ ادىستەرىمەن بارلىق پالاتا، ەمدەۋ-ەمشارا جاساۋ بولمەلەرى، جالپى عيمارات تۇگەل دەزينفەكسيالاندى. بۇگىن ەكىنشى كەزەڭى باستالدى. سونداي-اق، جەلدەتۋ جۇيەلەرى زالالسىزداندىرىلدى. عيمارات كەزەڭ-كەزەڭىمەن، تولىعىمەن دەزينفەكيالانىپ بىتكەن سوڭ، مۇندا تەك ينفەكسيا جۇقتىرعان ناۋقاستار عانا قابىلداناتىن بولادى. ەگەر قازىرگىدەي توتەنشە جاعداي ماجبۇرلەپ جاتسا، بۇل نىسان پروۆيزورلىق ورتالىق رەتىندە دە پايدالانىلۋى مۇمكىن، – دەدى ج.بەكشين.