م. اۋەزوۆ اتىنداعى ادەبيەت جانە ونەر ينستيتۋتىنىڭ ديرەكتورى كەنجەحان ءىسلامجان ۇلى پرەزيدەنت قاسىم-جومارت توقايەۆتىڭ توتەنشە جاعدايعا بايلانىستى جاساعان مالىمدەمەسىنە پىكىر ءبىلدىردى. 

– كارانتين رەجيمىنىڭ سوزىلۋى قازىرگى احۋالدى كورسەتىپ وتىر. ەلدە كوروناۆيرۋستىڭ بەتى تولىق قايتقان جوق. سوندىقتان دا كارانتين مەرزىمىن 11-مامىرعا دەيىن سوزعانى دۇرىس بولدى. پرەزيدەنت مالىمدەمەسىندە قازىرگى جاعدايدىڭ احۋالىن تالداي وتىرىپ، ونى ساۋىقتىرۋدىڭ دا جولدارىن تولىق قاراستىرعان. اسىرەسە ۇيدە وتىرعان ادامداردىڭ پسيحولوگيالىق احۋالىن ساۋىقتىرۋ ماسەلەسى ءسوز بولدى. وسىعان بايلانىستى دەنساۋلىق ساقتاۋ مينيسترلىگىنىڭ جۇمىسىن قايتا قاراۋ جونىندەگى ماسەلەسىنىڭ ءمانى بار دەپ ويلايمىن، – دەدى ك. ءىسلامجان ۇلى. 

سونىمەن قاتار ونەر ينستيتۋتىنىڭ ديرەكتورى كاسىپورىنداردى ىسكە قوسۋ ماسەلەسىن جانە ولاردىڭ قاۋىپسىزدىگىن تولىقتاي قامتاماسىز ەتۋدى ايتتى. 

– ءقازىر شارۋاشىلىقتىڭ توقتاپ قالۋى، كاسىپورىنداردىڭ تۇرىپ قالۋى جۇرتشىلىقتى الاڭداتىپ وتىرعان ۇلكەن ماسەلە. بۇل ءبىزدىڭ ەلىمىزدە ەمەس الەمدەگى ماسەلە بولايىن دەپ تۇر. سوندىقتان وبلىس، اۋدان، ايماقتارداعى كاسىپورىنداردى بىرتە-بىرتە ىسكە قوسۋ قاجەت. ونىڭ كەستەسىن جاساۋدى جەرگىلىكتى اتقارۋ ورگاندارىنا تاپسىرعان دۇرىس. ءبىراق كاسىپورىنداردى اشىپ قانا قويماي، ەڭ الدىمەن جۇمىسشىلاردىڭ سانيتارلىق جاعدايىن، ولاردىڭ قاۋىپسىزدىگىن تولىقتاي قامتاماسىز ەتۋ قاجەت. ويتكەنى ءقاۋىپتى ىندەتتىڭ بەتى ءالى دە قايتقان جوق. ەڭ باستى ماسەلە – حالىقتىڭ اماندىعى مەن ساۋلىعىن قامتاماسىز ەتۋ، – دەدى ك. ءىسلامجان ۇلى. 

كەنجەحان ءىسلامجان ۇلى ءوز سوزىندە 4 ملن-نان استام ادامعا 42 500 تەڭگەلىك كومەك كورسەتىلىپ جاتقانىن جانە الەۋمەتتىك تولەمنىڭ مامىر ايىندا دا بەرىلەتىنىن اتاپ ءوتتى. 

– 42 500 تەڭگەلىك الەۋمەتتىك تولەم ەكىنشى قايتارا بەرىلەتىن بولدى. بۇل – حالىققا بەرىلگەن ۇلكەن كومەك. ءبىراق اتالعان كومەكتىڭ پارمەندىلىگىن ءالى دە ارتتىرۋ كەرەك. ارينە، بۇل كومەكپەن ۇلكەن ماسەلە شەشىلمەيدى. ەندىگى كەزەكتە ورتا جانە شاعىن بيزنەستەردىڭ، جەكە كاسىپكەرلىكپەن اينالىساتىن، وزدەرىن تولىقتاي قامتاماسىز ەتىپ وتىرعان ادامدارعا مۇمكىندىگىنشە جاعداي جاساۋ قاجەت، – دەپ پىكىرىن ءبىلدىردى. 

ونەر ينستيتۋتىنىڭ ديرەكتورى ءسوز سوڭىندا قازاقستاندىقتاردى سابىرعا شاقىرىپ، حالقىمىزدىڭ مەيىرىمدىلىگى مەن قايىرىمدىلىعى وسىنداي قيىن شاقتا كورىنەتىنىن جانە كەز كەلگەن دۇنيەگە سالقىندىق تانىتىپ، اقىلمەن قاراۋ قاجەتتىگىن اتاپ ايتتى.