ق ر ۇلتتىق ەكونوميكا ءمينيسترى رۋسلان دالەنوۆ ءماجىلىستىڭ جالپى وتىرىسىندا جۇرگىزۋشى كۋالىگىنىڭ جارامدىلىق مەرزىمى ءوتىپ كەتكەن ازاماتتارعا قانداي قۇقىق بەرىلەتىنىن ايتتى، دەپ حابارلايدى Qamshy.kz اقپارات اگەنتتىگى قازاقپارات دەرەگىن نەگىزگە الىپ.

– قۇجاتىنىڭ جارامدىلىق مەرزىمى وتكەن ازاماتتارعا توتەنشە جاعداي رەجيمى كەزىندە ونى جاڭارتۋ مۇمكىن ەمەستىگىنە بايلانىستى مۇنداي قۇجاتتى پايدالانۋ قۇقىعىن بەرۋ قاجەت دەپ سانايمىن. قازىرگى ۋاقىتتا ىشكى ىستەر مينيسترلىگى ءوز قۇزىرەتى اياسىندا بۇل ماسەلەنى شەشۋ ءۇشىن قاۋلى جوباسىن ازىرلەپ جاتىر. وسىلايشا، توتەنشە جاعداي رەجيمى كەزىندە جارامدىلىق مەرزىمى وتكەن قۇجاتتاردى ازاماتتارىمىزعا پايدالانۋ قۇقىعى بەرىلمەك، – دەدى ول.

ال ىشكى ىستەر ءمينيسترىنىڭ ورىنباسارى يۋريي يلين ءمينيستردىڭ بۇيرىعىمەن كولىك جۇرگىزۋگە رۇقسات بەرەتىن قۇجاتىنىڭ جارامدىلىق مەرزىمى ءوتىپ كەتكەن ازاماتتاردى اكىمشىلىك جاۋاپكەرشىلىككە تارتپاۋ تۋرالى تاپسىرما بەرىلگەنىن ايتادى.

– جەكە كۋالىككە قاتىستى ايتار بولساق، ءقازىر مەملەكەت باسشىسىنىڭ اتىنا ۇسىنىس ازىرلەندى. بۇل توتەنشە جاعداي رەجيمىنىڭ قولدانىس كەزەڭىندە اتالعان نورمانى پرەزيدەنت جارلىعىمەن ۇزارتۋ ءۇشىن قاجەت. ونداي قۇجاتتار ءتىزىمى وتە كوپ، – دەدى مينيستر ورىنباسارى.

وسى ورايدا ءماجىلىس ءتوراعاسى نۇرلان نىعماتۋلين توتەنشە جاعداي كەزىندە 99،5 مىڭ جەكە كۋالىكتىڭ، 68 مىڭ جۇرگىزۋشى كۋالىگىنىڭ جارامدىلىق مەرزىمىنىڭ ءوتىپ كەتكەنىن ايتتى.

– بۇعان قوسا مامىردا 90 مىڭ جەكە كۋالىكتىڭ جارامدىلىق مەرزىمى اياقتالادى ەكەن. مۇنىڭ بارلىعى توتەنشە جاعداي كەزەڭىندە ورىن الىپ وتىر ما؟، – دەپ سۇرادى ول يۋريي يليننەن.

ىشكى ىستەر مينيسترىنەن ناقتىلانعان جاۋاپ العاننان كەيىن ءماجىلىس ءتوراعاسى ەلىمىزدە توتەنشە جاعداي رەجيمى ەنگىزىلگەن جاعدايدا ادامدار مەرزىمى وتكەن قۇجاتتارىمەن نە ىستەۋ كەرەگىن ءتۇسىنۋى ءۇشىن مۇنداي نورمانىڭ قاجەت ەكەنىن باسا ايتتى.