قازاقستاندا توتەنشە جاعداي كەزىندە 1،6 ميلليوننان استام نەسيە الۋشى قارىزدارىنىڭ مەرزىمىن كەيىنگە شەگەرگەن. بۇل تۋرالى ق ر قارجى نارىعىن رەتتەۋ جانە دامىتۋ اگەنتتىگى حابارلادى.

"ق ر قارجى نارىعىن رەتتەۋ جانە دامىتۋ اگەنتتىگى حالىق پەن بيزنەستى قولداۋ جونىندەگى شارالاردىڭ ورىندالۋ مونيتورينگىن جالعاستىرۋدا. 2020 جىلعى 28 ساۋىردەگى جاعداي بويىنشا ەكىنشى دەڭگەيدەگى بانكتەرگە جانە وزگە دە كرەديتتىك ۇيىمدارعا قارىزدار مەن ميكروكرەديتتەر بويىنشا تولەمدەردى توقتاتا تۇرۋعا 1 844 599 ءوتىنىم كەلىپ ءتۇستى. ونىڭ ىشىندە 1 831 489 جەكە تۇلعا بانكتىك قارىز تولەمدەرى بويىنشا مەرزىمىن كەيىنگە قالدىرۋعا ءوتىنىم بەردى، 13 110 شاعىن جانە ورتا كاسىپكەرلىك سۋبەكتىسى توتەنشە جاعداي كەزەڭىندە كرەديتتەر بويىنشا مەرزىمدى كەيىنگە شەگەرۋگە ءوتىنىم بەرۋ ءۇشىن كرەديتتىك ۇيىمدارعا جۇگىندى" دەلىنگەن حابارلامادا.

وسى ورايدا 1 661 232 جەكە تۇلعانىڭ 237،4 ملرد تەڭگەسى نەمەسە قارىز الۋشىلاردىڭ 31،3 پايىزى بويىنشا تولەمدى توقتاتا تۇرۋ ماقۇلداندى. ونىڭ ىشىندە 299 363ء-ى حالىقتىڭ الەۋمەتتىك جاعىنان وسال توبىنىڭ وكىلى.

"سونىمەن بىرگە، 11 561 شاعىن جانە ورتا كاسىپكەرلىك سۋبەكتىسى 138،8 ملرد تەڭگە سوماعا نەمەسە كاسىپكەرلەردىڭ جالپى سانىنان 44،1 پايىزى نەسيە مەرزىمىن كەيىنگە شەگەردى. قالعان وتىنىمدەر قارالىپ جاتىر، 10 جۇمىس كۇنى ىشىندە ولار بويىنشا ءتيىستى شەشىم قابىلدانادى" دەپ اتالىپ وتكەن حابارلامادا.

بۇگىنگى كۇنى شامامەن 5،3 ملن ازاماتتىڭ 4،4 ترلن تەڭگە سوماعا، سونداي-اق 26،2 مىڭعا جۋىق شاعىن جانە ورتا كاسىپكەرلىك سۋبەكتىسىنىڭ 3،9 ترلن تەڭگە سوماعا بانكتىك قارىزدار مەن ميكروكرەديتتەر بويىنشا بەرەشەگى بار.

توتەنشە جاعداي ەنگىزىلگەننەن بەرى «قازاقستاننىڭ حالىق بانكى» اق قاشىقتان 564 615، Kaspi Bank – 358 884، Forte Bank اق – 26 745، «بانك سەنتر كرەديت» اق - 25 258 تولەم كارتوچكاسىن اشقان.

«قازپوچتا» اق 88 397 تولەم كارتوچكاسىن ۇيگە جەتكىزىپ بەرگەن.