شىعىس قازاقستانعا يندۋستريا جانە ينفراقۇرىلىمدىق دامۋ ءمينيسترى بەيبىت اتامقۇلوۆ جۇمىس ساپارىمەن كەلدى. ءىس ساپار بارىسىندا مينيستر شقو اكىمى دانيال احمەتوۆپەن بىرگە وسكەمەن-تالدىقورعان، قالباتاۋ-مايقاپشاعاي دالىزدەرىن سالۋ جوباسىنىڭ ىسكە اسىرىلۋ بارىسىمەن تانىستى.

جوبا اياسىندا 763 شاقىرىم جول جوندەلەدى. ناتيجەسىندە شقو، اياگوز اۋدانىنداعى شىڭقوجا جانە ۇشبيىك، سونداي-اق الماتى وبلىسىنداعى قويلىققا دەيىنگى ارالىقتاعى جول جوندەلمەك.

اۆتوجولداردى قايتا جوندەۋ جۇمىستارىنا «CITIC Cinstruction Co.Ltd» ج ش س، «ك-دورستروي» مەن «Todini Central Asia» ج ش س مەردىگەر كومپانيالارى تارتىلعان.

«ك-دورستروي» ءجشس-نىڭ باسشىسى ۆالەريي جۇماعازىنوۆتىڭ ايتۋىنشا، جول جوندەۋ بارىسىندا شىعىس قازاقستاننىڭ كليماتى ەسكەرىلىپ وتىر. سونداي-اق جوندەۋ جۇمىستارىنا جاڭا تەحنيكالار قولدانىلۋدا.

– 2017 جىلدان باستاپ بۇل جوبا جۇزەگە اسىرىلۋدا. ەڭ الدىمەن جوبالاۋ-ىزدەستىرۋ جۇمىستارىن جۇرگىزدىك. وتكەن جىلى قۇرىلىس-مونتاجداۋمەن اينالىستىق. ال بيىل نەگىزگى شارۋاعا كوشتىك. جولدىڭ بەتكى قاباتىن جاۋىپ جاتىرمىز. ەندى بۇل جولعا كەم دەگەندە 8-10 جىل جوندەۋ جۇمىستارىن جۇرگىزبەۋگە بولادى، – دەدى جوبا جەتەكشىسى.

كوروناۆيرۋسقا بايلانىستى ەلىمىزدە جاريالانعان توتەنشە جاعدايعا قاراماستان مۇندا جۇمىس ءبىر مەزەتتە توقتاعان جوق.

جوسپارعا سايكەس 2020 جىلى بۇل اۋماقتاعى بارلىق جۇمىس اياقتالادى.

– قارجىنىڭ نەگىزگى بولىگى جولداردى جوندەۋگە ءبولىندى. اعىمداعى جىلى قازاقستاندا 4 مىڭ شاقىرىم، 2021 جىلى 2،6 مىڭ شاقىرىم جەرگىلىكتى جول جوندەلەدى. وسى ورايدا، شىعىس قازاقستان جولداردى قايتا قالپىنا كەلتىرۋ بويىنشا كوش باستاپ تۇرعانىن اتاپ وتكەن ورىندى. ەڭ باستىسى، جول قۇرىلىسى جۇمىس ورىندارىن كوبەيتۋگە مۇمكىندىك بەرەدى، – دەدى يندۋستريا جانە ينفراقۇرىلىمدىق دامۋ ءمينيسترى بەيبىت اتامقۇلوۆ.

وسكەمەن-تالدىقورعان اۆتوجولىنىڭ قۇرىلىسى 2021 جىلى اياقتالادى دەپ كۇتىلۋدە.

قالباتاۋ-مايقاپشاعاي اۆتوجولىنىڭ جوندەۋ جۇمىستارىمەن «سپ «كازگەرستروي» ج ش س مەن «سينسين» قىتايلىق كومپانياسىنىڭ قازاقستانداعى فيليالى اينالىسۋدا. جولدىڭ جالپى اۋماعى 415 شاقىرىمدى قۇرايدى. جاڭا جول جولاۋشىلاردىڭ ۋاقىتىن ۇنەمدەۋگە سەپتىگىن تيگىزەدى. مۇنداعى قۇرىلىس جۇمىستارى 2022 جىلى اياقتالادى.