الماتىدا «سەرگەك» جۇيەسى مەن ونىڭ بەرگەن مالىمەتتەرىن قولدانا وتىرىپ، كوشەلەردەگى كولىك كەپتەلىسىنىڭ قورىتىندىسىمەن بىرگە الماتىلىقتاردىڭ ءوزىن-وزى وقشاۋلاۋ دەڭگەيى انىقتالۋدا. بۇل تۋرالى قالا اكىمدىگىنىڭ باسپا ءسوز قىزمەتى حابارلادى.

2020 جىلدىڭ 11 ناۋرىزىنان باستاپ الماتى جولدارىنداعى كولىكتەر سانى 80 پايىزعا دەيىن ازايعان بولاتىن. ول «سەرگەك» جۇيەسىندەگى كارانتينگە دەيىنگى قالىپتى جۇمىس كۇنى مەن توتەنشە جاعداي ەنگىزىلىپ، كارانتين باستالعانداعى قالالىق ترافيكتىڭ دەرەكتەرىن سالىستىرۋ ارقىلى انىقتالعان.

تۇراقتاندىرىلعان «5» دەگەن باعا – قالادا مۇلدەم ماشينا جوق دەگەندى بىلدىرەدى. قالىپتى جۇمىس كۇنى بالل «0،5» -كە تەڭ. «0» دەگەن باعا – كولىك كەپتەلىسىن بىلدىرەدى. كارانتين كەزىندە قالالىق قىزمەتتىك، پوليسيا، جەدەل جاردەم، ازىق-تۇلىك جەتكىزۋ جانە ت.ب. قىزمەتتىك كولىك قوزعالىسىن ەسەپكە الساق، ەڭ جوعارى بال «4،8»- گە جەتۋى مۇمكىن. كەشەندى شارالار مەن الماتىلىقتاردىڭ جاۋاپكەرشىلىگىنىڭ ارقاسىندا قالاداعى بەلسەندىلىكتى تومەندەتۋگە جانە ازاماتتاردىڭ ءوز-وزىن وقشاۋلاۋىن 4،4 باللعا دەيىن ارتتىرۋ مۇمكىن بولدى.

ءوزىن-وزى وقشاۋلاۋ دەڭگەيى – بۇل «سەرگەك» جانە «ياندەكس» قىزمەتتەرىنىڭ دەرەكتەرى بويىنشا ەسەپتەلگەن كورسەتكىش.