الماتىدا كوروناۆيرۋستىق ينفەكسيانى جۇقتىرۋدىڭ جاڭا 27 جاعدايى تىركەلدى. ولاردىڭ بارلىعى – مەديسينا قىزمەتكەرلەرى. بۇل تۋرالى قالا اكىمدىگىنىڭ باسپا ءسوز قىزمەتى حابارلادى.

جالپى قالا بويىنشا COVID-19 ينفەكسياسىنا شالدىققان 172 ناۋقاس بار.

بۇل تۋرالى الماتى قالاسى قوعامدىق دەنساۋلىق ساقتاۋ باسقارماسىنىڭ باسشىسى تىلەۋحان ابىلدايەۆ ونلاين رەجيمدە وتكەن بريفينگتە مالىمدەدى.

بۇگىن انىقتالعان 27 ناۋقاستىڭ التاۋى ەر ادام بولسا، 21ء-ى ايەل ادام. ەسكەرتە كەتەيىك، ارالارىندا ءبىر جۇكتى ايەل بار.

– مەديسينا قىزمەتكەرلەرىنىڭ جاي-كۇيىنە توقتالسام: ەكى ادامنىڭ جاعدايى پوليسەگمەنتتى پنيەۆمونيالارىنا بايلانىستى – اۋىر بولسا، قالعان ادامداردىڭ بارلىعىندا – قاناعاتتانارلىق، – دەدى سپيكەر.

كوروناۆيرۋس انىقتالعان 20 قىزمەتكەر شۇعىل مەديسينالىق كومەك كورسەتۋدى جالعاستىرعان قالالىق ورتالىق كلينيكالىق اۋرۋحانا قىزمەتكەرلەرى. ال قالعان 7 ادام بولسا، بۇلار 4 ساۋىردەگى العاش رەت تاپسىرعان تەستىلەرى تەرىس ناتيجە كورسەتكەن بالالار جۇقپالى اۋرۋلار اۋرۋحاناسىنىڭ دارىگەرلەرى. ادەتتە، بۇلار ءارتۇرلى پاتولوگياسى بار ناۋقاستار بولعاندىقتان، ولاردىڭ اراسىندا اۋرۋ بەلگىلەرى كورىنبەگەندەرى دە بولۋى مۇمكىن، سايكەسىنشە، بۇل دارىگەرلەردىڭ ۆيرۋس جۇقتىرۋىنا سەبەپ بولۋى مۇمكىن. اتالعان فاكتى بويىنشا ءقازىر ەپيدەميولوگيالىق تەكسەرۋلەر جۇرگىزىلۋدە.

ءقازىر مەديسينا قىزمەتكەرلەرىن تەكسەرىپ-قاراۋ بويىنشا بارلىق شارالار قولدانىلۋدا دەدى باسقارما باسشىسى. بۇدان باسقا، بارلىق قالالىق كلينيكالاردىڭ ىشىندە قىزمەتكەرلەردى كوروناۆيرۋسقا مىندەتتى تۇردە تەكسەرىپ-قاراۋمەن ەپيدەمياعا قارسى ءىس-شارالار كۇشەيتىلدى دەدى.

ايتا كەتەيىك، قازىرگى ۋاقىتتا ينفەكسيالىق ستاسيوناردا جالپى 122 ادام ەمدەلۋدە. ولاردىڭ ىشىندە 89 ناۋقاستىڭ جاي-كۇيى – قاناعاتتانارلىق بولسا، 8 ادامنىڭ جاعدايى – اۋىر، 25 ەرەسەك ادامدا (1 وبلىستىق) – اۋىرلىقتىڭ ورتاشا دارەجەسى دەپ باعالانعان. ەم الۋشىلار اراسىندا 3 جۇكتى ايەل بار.

47 ەرەسەك ادام جانە 2 بالا ساۋىعىپ شىقسا، ەكى ادام ينفەكسيادان قايتىس بولدى.

پروۆيزورلىق ورتالىقتاردا 186 ادام بار، ونىڭ ىشىندە 10-ى بالا. كارانتيندىك وقشاۋلاۋدا – 426 ادام، ال ءۇي كارانتينىندە – 6199 ادام وتىر.