قازاقستان مۇناي ءوندىرۋدى تاۋلىگىنە 390 مىڭ باررەلگە قىسقارتادى. بۇل تۋرالى قالا اكىمدىگىنىڭ باسپا ءسوز قىزمەتى حابارلادى.

12 ساۋىردە وپەك+ كەلىسىمىنە قاتىسۋشى ەلدەردىڭ مينيسترلىكتەرىنىڭ ۆەبينارى بارىسىندا وپەك+ ەلدەرىنىڭ، سونداي-اق وپەك+ قۇرامىنا كىرمەيتىن ەلدەردىڭ مۇناي ءوندىرۋى تاۋلىگىنە 9،7 ملن باررەلگە ۇجىمدىق قىسقارتۋ تۋرالى كەلىسىمدە كونسەنسۋسقا قول جەتكىزىلدى.

بۇل الەمدىك مۇناي يندۋسترياسى تاريحىندا مۇناي ءوندىرىسىن ەڭ ۇلكەن ۇجىمدىق قىسقارتۋدىڭ ءبىرى. قازاقستان ءوز كەزەگىندە كەلىسىمدەگى كونسەنسۋسقا قولداۋ كورسەتىپ، تاۋلىگىنە 390 مىڭ باررەلگە ءوندىرۋدى قىسقارتۋ مىندەتىن ءوز موينىنا الدى.

مۇنداي شەشىم ءبىرىنشى كەزەكتە مۇناي نارىعىندا عانا ەمەس، بۇكىل الەمدە قالىپتاسقان كۇردەلى جاعدايدان تۋىندايدى.

كوروناۆيرۋس پاندەمياسىنا بايلانىستى بارلىق ەلدەردە مۇنايعا دەگەن سۇرانىس كۇرت تومەندەدى، سوندىقتان وپەك حاتشىلىعىنىڭ ءوندىرۋدى ۇجىمدىق قىسقارتۋ تۋرالى ۇسىنىسى ورىندى جانە ۋاقتىلى شەشىم بولىپ سانالادى.

ەگەر وپەك+ مامىلەسى جاسالماسا، مۇناي ءوندىرۋشى ەلدەر كەز-كەلگەن جاعدايدا ءوندىرىستى قىسقارتاتىن ەدى، ويتكەنى نارىقتىڭ بارلىق ويىنشىلارىنىڭ الدىندا تۇرعان پروبلەما ساقتاۋ قويمالارىنىڭ تولىپ كەتۋى، سونداي-اق بۇگىنگى تاڭدا الەمدە مۇناي كوپ بولعاندىقتان، سۇرانىستىڭ بولماۋى.

وپەك+ مامىلەسىنىڭ ارقاسىندا ءوندىرىستىڭ قىسقارۋى ۇجىمدىق، باقىلاناتىن بولادى جانە نارىققا وڭ سەرپىن بەرەدى، بۇل ساراپشىلاردىڭ پىكىرىنشە، مۇناي باعاسىنىڭ وسۋىنە وڭ اسەر ەتەدى، سونداي-اق ساقتاۋ قويمالارىنداعى مۇنايدىڭ تولىپ كەتۋى ماسەلەسىن شەشەدى.

ەنەرگەتيكا مينيسترلىگى قازىرگى ۋاقىتتا مۇناي ءوندىرىسىن قىسقارتۋ سەنارييىن ازىرلەۋدە.