مەملەكەت باسشىسى ق.توقايەۆ تۇركىستان وبلىسىنداعى سۋ باسقان اۋىل تۇرعىندارىنا كومەك كورسەتۋدى تاپسىردى.

"وزبەكستانداعى سۋ قويماسى بوگەتىنىڭ بۇزىلۋ سالدارىنان تۇركىستان وبل. جەڭىس جانە جاڭا تۇرمىس اۋىلدارىن سۋ باستى. بۇگىن پم ا.مامين مەن وبلىس اكىمى ءو.شوكەيەۆ اۋىل تۇرعىندارىن ەۆاكۋاسيالاۋ بويىنشا قابىلدانعان شارالار تۋرالى باياندادى. زارداپ شەككەن وتباسىلارعا كومەك كورسەتۋدى تاپسىردىم، دەلىنگەن پرەزيدەنتتىڭ twitter-دەگى جازباسىندا.

كەشە، 1 مامىردا وزبەكستانداعى ساردوبا سۋ قويماسىنىڭ بوگەتى نوسەر جاڭبىر مەن قاتتى جەل سالدارىنان جارىلىپ، تۇركىستان وبلىسى ماقتاارال اۋدانىنىڭ جاڭا تۇرمىس، جەڭىس، نۇرلى جول اۋىلدارىن سۋ باسقان.

ەلدىمەكەندەردىڭ 5400 تۇرعىنى اۋدان ورتالىعى مىرزاكەنتتە ورنالاسقان مىرزاكەنت مەكتەپ-گيمنازياسىنا، س.راحىموۆ اتىنداعى جالپى ورتا مەكتەبىنە، پۋشكين، ابىلايحان ورتا مەكتەپتەرىنە ەۆاكۋاسيالانعان.

ەلدىمەكەندەردەن تۇرعىنداردى كوشىرۋگە 450 پوليسەي جۇمىلدىرىلدى. حالىقتى ەۆاكۋاسيالاۋ ءۇشىن ماقتاارال، جەتىساي جانە سارىاعاش اپب جەكە قۇرامى مەن ۇلتتىق ۇلاننان 250 اسكەري اتسالىستى.

اپاتتىق-قۇتقارۋ جۇمىستارىنا توتەنشە جاعدايلار دەپارتامەنتىنىڭ جەكە قۇرامىنان 138 ادام، 8 تەحنيكا تارتىلعان. ۇلتتىق گۆارديانىڭ 6506 بولىمشەسىنەن 300 ادام، 300 ورىندىق 6 اۆتوبۋس، 120 ورىندىق 4 كاماز، اۋداندىق پوليسيا بولىمىنەن 7 تەحنيكا جانە 70 قىزمەتكەر كومەككە كەلگەن. ال جەرگىلىكتى اتقارۋشى ورگاننان 40 قىزمەتكەر، 5 تەحنيكا تارتىلدى.