قىزىلوردا وبلىسىندا 30 جاستاعى ناۋقاس كوروناۆيرۋس ىندەتىنەن ەمدەلىپ شىقتى. ول اۋرۋدان ايىققان 1000-ناۋقاس بولىپ وتىر. بۇل تۋرالى ق ر دەنساۋلىق ساقتاۋ ءمينيسترى ەلجان ءبىرتانوۆ پاراقشاسىندا جازدى.
– دوستار، جاقسى جاڭالىقپەن بولىسكىم كەلەدى! بۇگىن ستاسيوناردان COVID -19 دەرتىنە شالدىققان 1000-شى ناۋقاس ەمدەلىپ شىقتى. ول قىزىلوردا وبلىسىندا ەمدەلىپ جاتقان 30 جاستاعى ادام. ول قىزىلوردا وبلىستىق جۇقپالى اۋرۋلار اۋرۋحاناسىنا 16 ساۋىردە كوروناۆيرۋس ينفەكسياسىن جۇقتىرعان اداممەن بايلانىستا بولعاندىقتان تۇسكەن. ونىڭ جاعدايى ورتاشا اۋىر بولعان. دەنە قىزۋى 38 گرادۋسقا دەيىن كوتەرىلىپ، قۇرعاق جوتەل جانە السىزدىك ءبىلىندى. ونىڭ وكپەسىن رەنتگەنگە تۇسىرگەن كەزدە سول جاق وكپەسىنىڭ ينتەرستيسيالدى قابىنۋى بولعانى انىقتالدى، – دەيدى ەلجان ءبىرتانوۆ.
وعان «COVID-19 كوروناۆيرۋس ينفەكسياسى، سول جاق وكپەنىڭ قابىنۋى، ورتاشا اۋىر دەڭگەي» دياگنوزى قويىلعان.
– ەمدەۋ COVID-19-دى ەمدەۋ جانە دياگنوستيكالاۋ پروتوكولىنا سايكەس جۇرگىزىلدى. ەمدەلگەننەن كەيىن اراعا 24 ساعات سالىپ ەكى رەت كوروناۆيرۋسقا زەرتحانا تەكسەرۋ جۇمىسى جۇرگىزىلدى. تەست ناتيجەسىندە كوروناۆيرۋستان ەمدەلگەنى انىقتالدى. ستاسيوناردان شىعار كەزدە ەشقانداي شاعىمى بولعان جوق. دارىگەرلەر ونى 21 كۇن ۇيدە كارانتيندە وتىرۋ ۇسىنىمىمەن شىعاردى. مەن الدىڭعى شەپتە جۇرگەن دارىگەرلەرگە العىس ايتقىم كەلەدى. جارايسىزدار! راحمەت، – دەيدى مينيستر.
پىكىر قالدىرۋ