ۇكىمەتتىڭ سەلەكتورلىق وتىرىسىندا تۇركىستان وبلىسىنىڭ اكىمى ءومىرزاق شوكەيەۆ وبلىستا ءالى دە 7 ەلدىمەكەندە سۋ باسۋ ءقاۋپى جوعارى ەكەنىن ايتتى، دەپ حابارلادى تۇركىستان وبلىسى اكىمىنىڭ باسپا ءسوز قىزمەتى.

مالىمدەمەگە سايكەس، بۇگىنگى تاڭدا، جالپى 31 606 تۇرعىن 14 ەلدى مەكەننەن ەۆاكۋاسيالاندى. ونىڭ ىشىندە: 6 127 تۇرعىنى بار 5 ەلدىمەكەندى سۋ باسقان (جەڭىس، جاڭاتۇرمىس، فەرداۋسي، ورگەباس جانە دوستىق)، 7 ەلدىمەكەندە سۋ باسۋ ءقاۋپى ءالى دە جوعارى، ال 2 ەلدى (مىرزاكەنت، اقجول) مەكەندەردىڭ تۇرعىندارى ءوز ءۇي-جايلارىنا قايتا ورالىپ، جايعاسۋدا.

اۆاريالىق-قۇتقارۋ جۇمىستارىن جۇرگىزۋ ءۇشىن 986 ادام، 10 دانا ءجۇزۋ قۇرىلعىسى، 180 دانا تەحنيكا جۇمىلدىرىلدى.

سونىمەن قاتار، قىزىلوردا، جامبىل وبلىستارى مەن شىمكەنت قالاسىنان 30 ونىمدىلىگى جوعارى سۋ جيناعىش سوراپ كەلۋدە.

بۇدان بولەك، قازاقستان رەسپۋبليكاسى ۇلتتىق ۇلانىنىڭ اسكەري بولىمىنەن 413 اسكەري قىزمەتكەر مەن 37 دانا تەحنيكا تارتىلدى. قوسىمشا الماتى قالاسىنان ق ر ۇلتتىق ۇلانىنىڭ قۇتقارۋ باتالونىنان 320 اسكەري قىزمەتكەر مەن 26 دانا تەحنيكا كەلۋدە.

اتاكەنت كەنتى مەن ماقتارال، جامبىل اۋىلدىق وكرۋگتەرىندە اشىلعان 19 قابىلداۋ-ەۆاكۋاسيالاۋ پۋنكتىنە 3200 ادام ورنالاستىرىلعان. مىرزاكەنت جانە اقجول ەلدىمەكەنىنىڭ تۇرعىندارى ۇيلەرىنە ورالۋىنا بايلانىستى ەۆاكۋاسيالىق پۋنكتتەر سانى 24-تەن 19-عا قىسقاردى.

– قابىلداۋ ەۆاكۋاسيالىق پۋنكتەرى قاجەتتى قۇرال-جابدىقتار مەن ازىق-تۇلىكپەن قامتاماسىز ەتىلگەن. 120 مەديسينا قىزمەتكەرى مەديسينالىق كومەك كورسەتۋدە. جەتىساي قالاسىندا دا 3 ەۆاكۋاسيالىق-قابىلداۋ پۋنكتى ازىرلەنگەن. قاجەت بولسا ەۆاكۋاسيالانعان تۇرعىنداردى قابىلداۋعا دايىنبىز، – دەدى ءو. شوكەيەۆ.

توتەنشە جاعداي سالدارىنان بۇگىنگى تاڭعا، الدىن الا ەسەپتەۋلەر بويىنشا جالپى 845 تۇرعىن ءۇيدى، 3 مەكتەپتى، 5 بالا-باقشانى،4 مەديسينا نىساندارى مەن 1 مادەنيەت ءۇيىن، 10 دۇكەندى سۋ باستى، جەڭىس اۋىلىنداعى كوپىردى (ۇزىندىعى 10 مەتر، ەنى 6 مەتر) جانە رەسپۋبليكالىق، وبلىستىق، اۋداندىق ماڭىزى بار 54،7 شاقىرىم اۆتوجولداردى سۋ شايدى.