تۇركىستان وبلىسىنىڭ پوليسەيلەرى سۋ ورتاسىندا قالىپ قويعان ەكى تۇرعىندى قۇتقارىپ الدى. بۇل تۋرالى Polisia.kz حابارلادى.

ماقتاارال اۋدانىندا سۋ باسقان اۋىلداردا ءوز قىزمەتتەرىن اتقارىپ جۇرگەن پوليسەيلەرگە، فيردوۋسي اۋىلىنداعى فەرما اۋماعىندا قالىپ كەتكەن ادامدار كومەك سۇراپ حابارلاسقان.

حابار كەلىسىمەن وسى ايماققا بەكىتىلگەن ۋچاسكەلىك پوليسيا ينسپەكتورى، جانىنا ەرىكتىلەردى الىپ، سۋ باسقان فيردوۋسي اۋىلىنا قايىقپەن شۇعىل جەتەدى. جان-جاقتى مۇقيات قاراپ شىعىپ، قالىپ كەتكەن تۇرعىندارعا ىزدەۋ جۇمىستارىن جۇرگىزەدى. ناتيجەسىندە سۋدىڭ ورتاسىندا تۇرعان ەكى تۇرعىندى تاپتى. تەز ارادا قايىقتىڭ باعىتىن سول جاققا بۇرىپ، 2 ادامنىڭ جانىنا كەلىپ، ولاردى قايىققا وتىرعىزىپ، باسقا ادامداردىڭ جوقتىعىنا كوز جەتكىزىپ، 2 جاس جىگىتتى ءقاۋىپسىز ايماققا شىعاردى.

تۇرعىندارمەن تىلدەسىپ، سۇراستىرۋ بارىسىندا ولاردىڭ جىلقىلارىن ىزدەپ شىعىپ، اۋىلدى تۇگەل سۋ شايىپ كەتكەننەن كەيىن، كەرى قايتا الماي قالعانى بەلگىلى بولدى. جاس جىگىتتەر قۇتقارۋشى پوليسەي مەن ەرىكتىلەرگە العىسىن ءبىلدىرىپ، جۇمىستارىنا تابىس تىلەدى.

– دۇنيە-مۇلىكتەرىڭىز ءۇشىن وسىنداي كوزسىز باتىرلىققا بارۋدىڭ قاجەتى جوق. ەڭ باستىسى – ءوز ومىرلەرىڭىز. سۋ باسقان ۇيلەرىڭىزگە، قورا-جايلارىڭىزعا كىرەمىز دەپ، ءوز باستارىڭىزدى قاتەرگە تىكپەڭىزدەر. بۇل اۋىلدارعا مۇلدەم كىرۋگە بولمايدى، – دەپ پوليسيا قىزمەتكەرلەرى تۇرعىنداردى سابىرلىققا شاقىرىپ، تۇسىندىرمە جۇمىستارىن جۇرگىزدى.