الماتىدا «ەڭبەك» باعدارلاماسى اياسىندا ۋاقىتشا جۇمىس ىستەيتىن جۇمىسسىزدارعا قولداۋ كورسەتىلەدى، دەپ قازاقپارات حابارلادى.

الماتى قالاسى حالىقتى جۇمىسپەن قامتۋ ورتالىعىنىڭ ديرەكتورى ديليارا يمانقۇلوۆانىڭ ايتۋىنشا، بۇگىنگى كۇنگە دەيىن قوعامدىق جۇمىستارعا تارتىلعاندارعا ەڭ تومەنگى جالاقى (ايىنا 63،350 تەڭگە) تولەنەتىن.

– توتەنشە جاعدايعا بايلانىستى جەكە ۇيىمداردىڭ قىزمەتى توقتاپ تۇر. سايكەسىنشە، جۇمىسسىزدار سانى كوبەيۋدە. الەۋمەتتىك قولداۋ جانە حالىقتى قوعامدىق جۇمىستارعا تارتۋ ماقساتىندا باسقارما باسشىسىنىڭ بۇيرىعىمەن قوعامدىق جۇمىستارعا قاتىسۋشىنىڭ جالاقىسى كوتەرىلدى. ايىنا 85 مىڭ تەڭگە مولشەرىندە بەكىتىلدى، – دەدى ديليارا يمانقۇلوۆا.

جالپى قوعامدىق جۇمىسقا 12 مىڭ ادامدى جىبەرۋ جوسپارلانعان. قازىرگى ۋاقىتتا 2290 جۇمىسشى تارتىلدى.

– بۇل تەك كوشەلەردى، ساياباقتاردى، الاڭداردى تازارتۋ عانا ەمەس، مۇندا ەرىكتىلەر قىزمەتى دە قاراستىرىلعان. ياعني، قارتتار مەن مۇگەدەكتەرگە قاراۋ سياقتى باسقا دا جۇمىس تۇرلەرى بار، – دەدى ول.