ءۇندىستاننىڭ وڭتۇستىگىندە گازدان ۋلانعان جۇزدەگەن ادام اۋرۋحاناعا جەتكىزىلىپ، كەم دەگەندە 13 ادام قايتىس بولعان. بۇل تۋرالى قامشى ءتىلشىسى BBC-گە سىلتەمە جاساپ حابارلايدى.

اندرا پرادەش پروۆينسياسىنىڭ ۆيساكحاپاتنام قالاسىندا LG Polymers زاۋىتىنان گاز اعىپ، ادامدار ۋلانعان. دارىگەرلەر «جۇزدەگەن ادام» اۋرۋحاناعا جەتكىزىلگەنىن ايتادى. كوبىسى كوزدەرىنىڭ كورۋ سەزىمى مەن تىنىس الۋلارىنىڭ قيىنداعانىن ايتىپ شاعىمدانعان. BBC قازىرگە دەيىن كەم دەگەندە 13 ادامنىڭ قازا تاپقانىن مالىمدەدى.

جەرگىلىكتى ۋاقىت بويىنشا تۇنگى 03:00 شاماسىندا ورىن العان وقيعا "ابايسىزدىقتان بولۋى مۇمكىن" دەيدى شەنەۋنىكتەر.

24 ناۋرىزدان باستاپ ءۇندىستان كوروناۆيرۋستىڭ تارالۋىن توقتاتۋ ءۇشىن كارانتين جاريالاعان. گازدىڭ اعىپ كەتۋى زاۋىت قايتادان اشىلعان كەزدە ورىن العان.

مەملەكەتتىك يندۋستريا ءمينيسترى گوۋتام رەددي BBC-گە "زاۋىت قايتا اشىلعان كەزدە ءتيىستى پروسەدۋرالار مەن نۇسقاۋلار ساقتالماعان ءتارىزدى" دەگەن.