الماتى قالاسىنىڭ اكىمى باقىتجان ساعىنتايەۆتىڭ تاپسىرماسىن ورىنداۋ اياسىندا، سونداي-اق، دەنساۋلىق ساقتاۋ ءمينيسترى ەلجان ءبىرتانوۆ بەلگىلەگەن مەديسينالىق قاۋىمداستىقپەن ءوزارا ارەكەتتەستىك جۇيەسىن قۇرۋ جونىندەگى نۇسقاۋىنا سايكەس شاھار باسشىسىنىڭ ورىنباسارى ەرجان باباقۇماروۆتىڭ باسشىلىعىمەن الماتى قالاسىنىڭ قوعامدىق مەديسينالىق كەڭەسى قۇرىلدى (اقمك).

كەڭەستىڭ قۇرامىنا مەديسينالىق قاۋىمداستىقتاردىڭ شامامەن 140 جەتەكشى ءپروفيلدى ساراپشىلارى مەن وكىلدەرى ەندى. ولاردىڭ قاتارىندا ازاماتتىق بەلسەندى، «اگجپعو» اق تاۋەلسىز ديرەكتورى ايدا ءالجانوۆا، تريز-فاسيليتاتور، حالىقارالىق اككرەديتاسيالانعان مەدياتور يرينا ۆيگوۆسكايا، «الماتى كلينيكالارى قاۋىمداستىعى» جكجزتب اتقارۋشى ديرەكتورى راسۋل دۇيسەنوۆ، قازاقستاندىق رەپرودكۋتيۆتى مەديسينا قاۋىمداستىعىنىڭ پرەزيدەنتى، جوعارى ساناتتى اكۋشەر-گينەكولوگ دارىگەر ۆياچەسلاۆ لوكشين، ا.ن.سىزعانوۆ اتىنداعى «ۇلتتىق عىلىمي حيرۋرگيا ورتالىعى» اق باسقارماسىنىڭ ءتوراعاسى بولاتبەك بايماحانوۆ، سونىمەن بىرگە، رەسپۋبليكالىق مەديسينالىق ورتالىقتاردىڭ، مەملەكەتتىك جانە جەكەمەنشىك ۇيىمداردىڭ، مەديسينالىق ۋنيۆەرسيتەتتەردىڭ، قالالىق دەنساۋلىق ساقتاۋ باسقارماسى مەن تاۋارلار مەن قىزمەتتەردىڭ ساپاسىن باقىلاۋ دەپارتامەنتىنىڭ وكىلدەرى بار.

كەڭەستىڭ مىندەتى – اعىمداعى جاعدايعا تالداۋ جاساي وتىرىپ، الماتى قالاسىنىڭ دەنساۋلىق ساقتاۋ جۇيەسىن دامىتۋ بويىنشا شارالاردى جاساپ شىعارۋ. كەڭەس قۇرىلىمىندا كەلەسىدەي باعىتتار بويىنشا ءۇش جۇمىس توبى قۇرىلعان: دارىگەرلەردىڭ ۆيرۋستى جۇقتىرۋىن بولدىرماۋ، قازىرگى شىنايى جاعدايداعى مەديسينا ۇيىمدارىنىڭ جۇمىسى، الماتى قالاسىندا دەنساۋلىق ساقتاۋ جۇيەسىنىڭ پوستكريزيستىك دامۋ ستراتەگياسى.

«مەملەكەت باسشىسى اتاپ وتكەندەي، الداعى (بولاشاقتاعى) داعدارىسقا دايىندىقتى قامتاماسىز ەتۋدە دەنساۋلىق ساقتاۋ جۇيەسىن جاڭعىرتىپ، قويىلعان مىندەتتەردىڭ باسىمدىعىن قايتا قاراۋ ءۇشىن جاڭا باستامالاردى قولعا الۋىمىز كەرەك. قوعامدىق مەديسينالىق كەڭەستىڭ ماقساتى – الماتى قالاسى دەنساۋلىق ساقتاۋ جۇيەىسىنىڭ پوستكريزيستىك دامۋى ءۇشىن قاجەتتى شارالار پاكەتىن جاساپ شىعارۋ. جاڭا تاسىلدەر مەديسينالىق قىزمەت كورسەتۋدىڭ جوعارى ساپاسىن قامتاماسىز ەتۋگە، قالالىق مەديسينالىق قوعامداستىقتىڭ ازاماتتاردىڭ دەنساۋلىعىنا قاتىستى جاعدايلاردا تەز ارەكەت ەتۋگە،سونىمەن بىرگە، الدەقايدا كەڭ تارايتىن اۋرۋ تۇرلەرىنە قاراي باعىتتالاتىن بولادى»، - دەپ اتاپ ءوتتى ە.باباقۇماروۆ.

كەزدەسۋ بارىسىندا مەديسينا قىزمەتكەرلەرىنىڭ ەڭبەك قاۋىپسىزدىگىن قامتاماسىز ەتۋ جانە ولاردىڭ كوروناۆيرۋس ينفەكسياسىن جۇقتىرۋ قاۋپىنەن قورعاۋ تاسىلدەرى قاراستىرىلدى. جەكەلەي العاندا، مەديسينا قىزمەتكەرلەرىنىڭ جەكە قورعانىش قۇرالدارى ساپالى تەستتەرمەن قامتىلۋىن جانە كوروناۆيرۋستى تەكسەرۋدە زەرتحانالىق زەرتتەۋلەردى جاقسارتۋ جايى دا ءسوز بولدى. كەڭەس مۇشەلەرى تاراپىنان مەملەكەتتىك جانە جەكەمەنشىك مەديسينالىق ۇيىمداردىڭ جۇمىس تيىمدىلىگىن ارتتىرۋ، جۇمىس بارىسىن جەتىلدىرۋ، مەديسينالىق قىزمەتتەرگە قولجەتىمدىلىكتى ارتتىرۋ، حالىقپەن جانە قالانىڭ ىشكى مەديسينالىق قوعامداستىقتارىمەن بايلانىستى جاقسارتۋ، سونداي-اق، وتاندىق مەديسيناعا دەگەن حالىقتىڭ سەنىمىن ارتتىرۋ جونىندە ءبىرقاتار ۇسىنىستار ايتىلدى. 

«بۇگىنگى تاڭدا مەديسينالىق قىزمەتكەرلەرى سترەستى جاعدايدا جانە ولارعا ارتىلعان جۇك اۋىر بولىپ وتىر. سول سەبەپتى مەديسينا مەكەمەلەرىنىڭ بارلىق قىزمەتكەرلەرىنە ارناپ قاشىقتىقتان سترەسكە قارسى باعدارلاما جاساۋ ۇسىنىسى بار. بۇل سالادا بىزدە ايتۋى ماماندارىمىز دا بار»، - دەدى تريز-فاسيليتاتور، حالىقارالىق اككرەديتاسيالانعان مەدياتور يرينا ۆيگوۆسكايا. 

«الماتى كلينيكالارى قاۋىمداستىعى» جكجزتب اتقارۋشى ديرەكتورى راسۋل دۇيسەنوۆ مەديسينا قىزمەتكەرلەرىنىڭ ۆيرۋس جۇقتىرۋ جاعدايىن تالداۋعا ءجىتى نازار اۋداردى. بۇل ەڭبەك قاۋىپسىزدىگىن قامتاماسىز ەتۋ جونىندە جاڭا ادىستەردى جاساۋدا، سونىمەن بىرگە دارىگەرلەر اراسىندا جاڭادان جۇقتىرۋ جاعدايىن بولدىرماۋ ءۇشىن كەرەك.

ءوز كەزەگىندە ازاماتتىق بەلسەندى ايدا ءالجانوۆا بۇل باستامانىڭ كەڭەس قۇرامىنداعى ءاربىر مۇشەنىڭ وسى ىسكە بەلسەندى قاتىسۋىن قاجەت ەتەتىن، دۇرىس ۇجىمدىق شەشىم قابىلداۋعا ۇيىتقى بولاتىن فاسيليتاسيا تەحنولوگياسىن قولدانا وتىرىپ جاسالاتىن جاڭا جۇمىس فورماتى ەكەندىگىن اتاپ ءوتتى.

بارلىق ۇسىنىستار جۇيەگە كەلتىرىلىپ، ەگجەي-تەگجەيلى تۇردە تەكسەرىلەدى. ولاردىڭ نەگىزىندە قالانىڭ مەديسينالىق ۇيىمدارىنا ارناپ داعدارىس كەزىندە جانە ودان كەيىنگى كەزەڭ ءۇشىن ستراتەگيا قۇرىلماق.

وتىرىس قورىتىندىسى بويىنشا الماتى قالاسى اكىمىنىڭ ورىنباسارى ەرجان باباقۇماروۆ كەڭەستىڭ ينستيتۋتتاندىرىلاتىنىن جانە ونىڭ تەك كوروناۆيرۋس ينفەكسياسىمەن كۇرەسۋ شارالارىن جۇرگىزۋمەن عانا ەمەس، كارانتين اياقتالعاننان كەيىن دە جۇمىسىن جالعاستىراتىنىن اتاپ ءوتتى.

«قوعامدىق كەڭەس مەديسينالىق قوعامداستىقپەن ديالوگ قۇرۋدىڭ ىقپالدى تەتىگىنە اينالادى. كەڭەستىڭ قاتىسۋىمەن تاجىريبەدە جۇزەگە اسىرۋعا ۇسىنىلاتىن قورىتىندى قۇجاتتار جاسالادى»، - دەپ اتاپ ءوتتى ە.باباقۇماروۆ.