دەنساۋلىق ساقتاۋ مينيسترلىگى ەلدە تاعى 112 ادامنىڭ كوروناۆيرۋس جۇقتىرعانىن، 1 ادامنىڭ قايتىس بولعانىن حابارلادى.

كوروناۆيرۋستىڭ قازاقستاندا انىقتالعان جالپى دەرەگى 4690 جەتتى. ونىڭ ىشىندە 1518 ادام اۋرۋدان ايىعىپ شىقسا، 31 ادام قايتىس بولعان.

ۆيرۋس جۇقتىرعاننىڭ سالدارىنان كوز جۇمعان سوڭعى ناۋقاس 1963 جىلى پاۆلودار وبلىسىندا دۇنيەگە كەلگەن. پاۆلودار قالاسىنىڭ 57 جاستاعى تۇرعىنىنان COVID-19 ءساۋىر ايىنىڭ 23ء-ى كۇنى تابىلعان.

ول برونحيتپەن اۋىرىپ، 2ء-تيپتى قانت ديابەتىمەن ەسەپتە تۇرعان. 26 ساۋىردە جاعدايىنىڭ ناشارلاۋىنا بايلانىستى ەر ادام جۇقپالى گوسپيتالدىڭ رەانيماسيالىق بولىمىنە اۋىستىرىلدى. 29 ساۋىردە ەر ادامدا تىنىس الۋ جەتىسپەۋشىلىگى ۇدەي ءتۇسىپ، ارنايى اپپاراتقا قوسىلدى.

2 مامىردا ناۋقاستىڭ جاعدايى كۇرت ناشارلاپ، 6 مامىر كۇنى قايتىس بولدى.