الماتى قالاسى اكىمى باقىتجان ساعىنتايەۆتىڭ تاپسىرماسىمەن ونىڭ ورىنباسارى ەرجان باباقۇماروۆ ۆيدەو-كونفەرەنسيا-بايلانىس رەجيمىندە ورتالىق قالالىق كلينيكالىق اۋرۋحانانىڭ اكىمشىلىگى جانە قىزمەتكەرلەرىمەن كەزدەسۋ وتكىزدى. كەزدەسۋگە قوعامدىق دەنساۋلىق باسقارماسىنىڭ باسشىسى تىلەۋحان ابىلدايەۆ، ورتالىق قالالىق كلينيكالىق اۋرۋحانانىڭ ۋاقىتشا باس دارىگەرى مىندەتىن اتقارۋشى گۇلنار قۇلقايەۆا، قوعامدىق مەديسينالىق كەڭەستىڭ مۇشەسى، ازاماتتىق بەلسەندى ايدا ءالجانوۆا، سونىمەن بىرگە وقكا-نىڭ دارىگەرلەرى مەن مەديسينا قىزمەتكەرلەرى قاتىستى.

جيىن كەزىندە كوروناۆيرۋس ينفەكسياسىمەن كۇرەسكە جۇمىلدىرىلعان اۋرۋحانانىڭ دارىگەرلەرى مەن مەديسينا قىزمەتكەرلەرىنە ۇستەماقى تولەۋدى جۇزەگە اسىرۋ بويىنشا ق ر پرەزيدەنتى تاپسىرماسىنىڭ ورىندالۋ بارىسى پىسىقتالدى.

سونىمەن بىرگە، دەنساۋلىق ساقتاۋ ۇيىمدارىنىڭ قىزمەتكەرلەرى كوروناۆيرۋس ينفەكسياسىن جۇقتىرعان جاعدايدا ولارعا 2 ميلليون تەڭگە كولەمىندە ءبىر جولعى الەۋمەتتىك تولەماقى تاعايىنداۋ ماسەلەلەرى دە تالقىلاندى. اتاپ وتەتىن جايت، جاردەماقى تولەۋ ماسەلەسى تەك ورتالىق قالالىق كلينيكالىق اۋرۋحانا قىزمەتكەرلەرىنە عانا قاتىستى ەمەس، سونداي-اق، كوروناۆيرۋس ينفەكسياسىن جۇقتىرعان قالاداعى باسقا دا مەديسينالىق ۇيىمداردىڭ قىزمەتكەرلەرىنە جاردەماقى تولەۋ ماسەلەسى دە قارالاتىن بولادى.

الماتىدا كوروناۆيرۋسپەن كۇرەستە ەپيدەمياعا قارسى شارالارعا 19 دەنساۋلىق ساقتاۋ ۇيىمى جۇمىلدىرىلعان. بۇگىنگى تاڭدا 16 ۇيىمنىڭ 3 418 قىزمەتكەرىنە جالپى سوماسى 1،1 ملرد. تەڭگە بولاتىن ۇستەماقى تولەمدەرى تولەنگەن. سونىڭ ىشىندە، ءبىرىنشى ءقاۋىپتى توپتاعى (وتە ءقاۋىپتى) 375 قىزمەتكەرگە، ەكىنشى توپتاعى (جوعارى) – 1943 قىزمەتكەرگە، قاۋىپتىلىكتىڭ ءۇشىنشى توبىنداعى 1100 قىزمەتكەرگە تولەنگەن.

كوميسسيا جۇمىسى جالعاسۋدا، مەديسينالىق ۇيىمدار قاجەتتى قۇجاتتاردى تاپسىرۋدى اياقتاپ قالدى.

الماتى قالاسى اكىمىنىڭ ورىنباسارى ەرجان باباقۇماروۆ بارلىق ءتيىستى تولەمدەردى جەدەل تۇردە جۇزەگە اسىرۋدىڭ ماڭىزدىلىعىن اتاپ ءوتتى. ول ءۇشىن ورتالىق قالالىق كلينيكالىق اۋرۋحانا باسشىلىعىنا، سونىمەن بىرگە، قالالىق بالالار كلينيكالىق ينفەكسيالىق اۋرۋحاناسىنا وسى ىسكە جۇمىلدىرىلعان مەديسينا قىزمەتكەرلەرىنىڭ ءتىزىمىن بەرۋ بويىنشا ۇيىمداستىرۋ جۇمىستارىن جەدەل تۇردە اياقتاۋ تاپسىرىلدى.

«قارجى قاراجاتى كەيىنگە ساقتالدى (زارەزەرۆيروۆان). پرەزيدەنتتىڭ تاپسىرماسى ورىندالادى – وسى ىسكە جۇمىلدىرىلعان بارلىق مەديسينا قىزمەتكەرلەرى ءتيىستى جاردەماقىلارىن الادى. ەپيدەمياعا قارسى شارالارعا جۇمىلدىرىلعان مەديسينا قىزمەتكەرلەرىنە اي سايىنعى جالاقىعا ۇستەمە اقى تولەۋدى ىسكە اسىرۋ بويىنشا جاقىن ارادا مالىمەتتەر تاپسىرۋدى اياقتاۋلارىڭىزدى سۇرايمىن.

كوروناۆيرۋس ينفەكسياسىن جۇقتىرعان مەديسينا قىزمەتكەرلەرىنىڭ ءتىزىمىن جاساپ، ولارعا مەملەكەتتىك الەۋمەتتىك ساقتاندىرۋ قورىنان ءبىر جولعى الەۋمەتتىك تولەمدى قامتاماسىز ەتۋ بويىنشا جەكە كوميسسيا قۇرىلعان. ونىڭ قۇرامىنا دەنساۋلىق ساقتاۋ مينيسترىلىگىنىڭ ۇسىنىسمەن قوعام وكىلدەرى مەن ساراپشىلار ەنەدى»، – دەپ اتاپ ءوتتى ە. باباقۇماروۆ.