تارازدا 97 جاستاعى ۇلى وتان سوعىسىنىڭ ارداگەرى سوعىستان تاۋىپ العان بالاسىن ىزدەيدى. بۇل تۋرالى almaty.tv حابارلادى.
100-گە جاقىنداعان شاعىندا، قاريا ۇرىس الاڭىندا قۇتقارعان ءسابيدى ءبىر كورسەم دەگەن ارمانى بارىن ايتقان. ءبىر قىزىعى سولدات بەيتانىس سابيگە، ءوز تەگىن بەرىپ اتىن قويعان ەكەن. جالپى جامبىلدا بيىل ساناۋلى قالعان باتىرلارعا قانداي قۇرمەت كورسەتىلىپ جاتىر؟
سوعىس الاڭىندا جاس ءسابيدى قۇتقارعان جاۋىنگەردىڭ ەسىمى – ماحمۇت بيسىمبايەۆ. ۇلى وتان سوعىسىنىڭ ارداگەرى 1941 جىلى جاۋ اسكەرى ستالينگراد ءتۇبىن بومبالاعان كەزدە، بەيكۇنا بالانى تاۋىپ العانىن ايتادى. اناسى قازا بولعان بالانى باۋىرىنا باسىپ قۇتقارعان قاريا، كەيىن سانيتارلىق باتالونعا تاپسىرعان.
– 8-9 ايعا كەلىپ قالعان بالا، ءبارى قان. قاسىنا بارىپ قاراسام، اناسى جاتىر ەكەن.... (ءۇنسىز قولىمەن باسىنىڭ ورتادان ءبولىنىپ كەتكەنىن كورسەتەدى) ءسويتىپ بالانى شومىلدىردىم، شومىلدىرىپ كيىمىن كيگىزدىم. قالاي تاستايمىن؟ الىپ شىقتىم كوتەرىپ. تۇگەل سولداتتىڭ ءبارى جينالىپ قالىپتى. ءبارى كۇلىپ جاتىر، تىعىلام دەپ وتىرىپ بالا تاۋىپ الدى دەپ! ءسويتىپ تاپسىردىم، بيسىمبايەۆ باقىت دەپ ات قويىپ كەتتىم...، – دەدى ۇلى وتان سوعىسىنىڭ ارداگەرى ماحمۇت بيسىمبايەۆ.
1941 جىلدان باستاپ 53-جىلعا دەيىن، سوعىسقا، ودان سوڭ سوعىس سالدارىن جويۋعا قاتىسقان جاۋىنگەر، 12 جىل دەگەندە وتانعا ورالعان. ءبىراق سۇراستىرعان بالادان حابار وشار جوق. ەندىگى ەل تىنىشتىعىن تىلەگەن قاريانىڭ ءبىر تىلەگى سول سابيمەن كوز تىرىسىندە كورىسۋ.
تاراز جاستارى بۇل جىلى ارداگەرلەردى ەرەكشە قۇتتىقتاۋعا تىرىستى. ۇيىمداستىرۋشىلار، ۇلى جەڭىستىڭ 75 جىلدىعى قارساڭىندا كوپقاباتتى ۇيدە تۇراتىن باتىرلاردى كوتەرمە كران ارقىلى قۋانتتى. الاڭدا ارنايى وركەستر وينالدى، گۇل شوقتارى توبەگە كوتەرىلە تابىستالدى.
ارداگەرلەردى قۇتتىقتاۋ شاراسى مۇنىمەن بىتپەيدى. بۇگىندە وڭىردە تۇراتىن 57 ۇلى وتان سوعىسى ارداگەرىنىڭ ءار قايسىسىنا 1 ميلليون تەڭگەدەن الەۋمەتتىك كومەك كورسەتىلدى.
سونداي-اق، ولارعا مەملەكەت باسشىسىنىڭ اتىنان مەدالدار، العىس حاتتار مەن ازىق-تۇلىك سەبەتتەرى بەرىلدى. ونى وبلىس اكىمى مەن جەرگىلىكتى بيلىك ۇلەستىردى. جالپى، جەڭىستى تۋىن كوتەرگەن باتىرلارىمىزعا كورسەتىلگەن كەز كەلگەن قۇرمەت ەشقاشان ارتىق ەتپەيدى.
پىكىر قالدىرۋ