پرەزيدەنت توقايەۆ كوروناۆيرۋستىڭ تارالۋى ەكونوميكالىق ماسەلەلەردى قاتتى ۋشىقتىرعانىن ءمالىم ەتتى.

– كوروناۆيرۋس پاندەمياسى الەمدىك رەسەسسيانىڭ باستالۋىنا سەبەپ بولدى. ءتىپتى ۇزاققا سوزىلاتىن ەكونوميكالىق داعدارىسقا دا الىپ كەلۋى ابدەن مۇمكىن. جەر-جەردە پروتەكسيونيزمنىڭ كۇشەيۋى بەلەڭ الۋدا. ەكونوميكانىڭ تۇتاس سالالارى توقىراۋعا ۇشىراپ جاتىر. 400 ميلليوننان استام كاسىپورىن بانكروت بولۋدىڭ الدىندا تۇر. الەمدەگى ەڭبەككە جارامدى حالىقتىڭ جارتىسىنا جۋىعىنىڭ تابىسى ازايدى. ساراپشىلار جاھان ەكونوميكاسى سوڭعى ءجۇز جىل ىشىندە بولماعان دەڭگەيگە تۇسەتىنىن بولجاپ وتىر. وسىنداي جاعدايعا قاراماستان، ەلىمىز ءبىرقاتار باسىمدىققا يە بولىپ وتىرعانىن  ايتقىم كەلەدى. بىزدە قارجى رەزەرۆى جەتكىلىكتى جانە مەملەكەت قارىزىنىڭ كولەمى مۇمكىندىگىمىزگە ورايلاس. ەڭ باستىسى، ءبىز جاڭا احۋال جاعدايىندا جۇمىسپەن قامتاماسىز ەتۋ جانە ەكونوميكالىق تيىمدىلىكتى ارتتىرۋ ءۇشىن رەسۋرستاردى قايدا جۇمساۋ كەرەكتىگىن بىلەمىز، – دەدى توقايەۆ توتەنشە جاعداي رەجيمىن قامتاماسىز ەتۋ جونىندەگى مەملەكەتتىك كوميسسيانىڭ قورىتىندى وتىرىسىندا.

پرەزيدەنت داعدارىس كەزىندەگى جانە ودان كەيىنگى دامۋدىڭ باسىمدىقتارى رەتىندە بارشا ازاماتتاردىڭ ءومىرى مەن دەنساۋلىعىن ساقتاۋ، ازاماتتاردىڭ تابىسىن ارتتىرۋ، بيزنەستى قولداۋ جانە ونى دامىتۋ، ءبىلىم جانە عىلىم جۇيەسىن جەتىلدىرۋ ماسەلەلەرىنە ءمان بەرۋ كەرەكتىگىنە نازار اۋداردى.