ماڭعىستاۋ وبلىسىندا 5-مامىر كۇنى ونلاين رەجيمدە ۇلى جەڭىستىڭ 75 جىلدىق مەرەكەسىنە وراي جيناقتالىپ شىعارىلعان «تاعزىم-5» كىتابىنىڭ تانىستىرىلۋى ۇيىمداستىرىلدى. ونلاين شاراعا وبلىستاعى زيالى قاۋىم وكىلدەرى، ارداگەرلەر مەن تىل ارداگەرلەرىنىڭ ۇرپاقتارى قاتىستى. شارانى ماڭعىستاۋ وبلىسى اكىمىنىڭ ورىنباسارى قانىبەك جۇماشيەۆ اشتى.

بۇل كىتاپ ماڭعىستاۋ وبلىسىنىڭ مادەنيەت، تىلدەردى دامىتۋ جانە ارحيۆ ءىسى باسقارماسىنىڭ قولداۋىمەن شىعارىلعان. بۇدان بۇرىنعى جەڭىستىڭ 50، 60، 65، 70 جىلدىقتارىنا ارنالعان «بوزداقتار»، «تاعزىم» كىتاپتارىنىڭ جالعاسى بولىپ تابىلادى.

كىتاپتىڭ قۇراستىرۋشىسى - الدىڭعى كىتاپتاردى قۇراستىرۋعا ات سالىسقان ماڭعىستاۋ وبلىسىنىڭ قۇرمەتتى ازاماتى قويلىباي قاراجانوۆ.

جيناق - ەلى ءۇشىن قۇربان بولعان جاۋىنگەرلەر رۋحىنا تاعزىم ەتۋگە، جاس ۇرپاقتى تاربيەلەۋگە، ەل باسىنا كۇن تۋعاندا اجالمەن بەتپە-بەت تۇرعان بابالارىنىڭ ەرلىگىن ۇلگى ەتە وتىرىپ پاتريوتتىق سەزىمدى قالىپتاستىرۋعا شاقىرادى. 

بۇل كىتاپ – وتان سوعىسىنىڭ وتتى جىلدارىندا ورتاق جاۋمەن الىسىپ، جانىن شۇبەرەككە تۇيگەن مايدانگەرلەر مەن تىل ارداگەرلەرىنە، ەرلىكپەن قازا بولىپ، تۋعان جەردىڭ توپىراعى بۇيىرماعان اتالارعا تاعزىم ەتۋ ءۇشىن جيناقتالعان ەڭبەك. 

«تاعزىم» كىتابىنا ەنگەن بارلىق مايدانگەرلەر مەن تىل ارداگەرلەرىنىڭ ۇرپاقتارىنا، وبلىستاعى كىتاپحانالار مەن ءبىلىم بەرۋ ۇيىمدارىنا، مەملەكەتتىك مەكەمەلەرگە كىتاپ تەگىن تاراتىلىپ بەرىلەدى.

ماڭعىستاۋ وڭىرىنەن ۇلى وتان سوعىسىنا 6186 ادام قاتىستى، ونىڭ 4942ء-ى سوعىس وپەراسيالارىنا قاتىسسا، 1244ء-ى جۇمىسشى باتالونىنا اتتاندى. وسى ازاماتتاردىڭ ۇشتەن ەكىسى تۋعان جەرگە ورالمادى. مايداننان امان - ەسەن ەلگە ورالىپ، ەڭبەك كورىگىن قىزدىرا تۇسكەن مايدان جانە ەڭبەك ارداگەرلەرىنە مىڭ دا ءبىر تاعزىم. ولاردىڭ  ەرلىك شەجىرەسى بارلىق اقپارات قۇرالدارى بەتتەرىندە، مايدانگەرلەر ەستەلىكتەرىندە جازىلىپ كەلەدى، جازىلا دا بەرمەكشى.