قولجەتىمدى تۇرعىن ءۇي قۇرىلىسى ەكونوميكانى دامىتىپ، جۇمىسپەن قامتۋ دەڭگەيىن كوتەرۋگە جانە الەۋمەتتىك قولداۋ فاكتورىنا اينالادى. بۇل تۋرالى پرەزيدەنت ق.توقايەۆ توتەنشە جاعداي رەجيمىن قامتاماسىز ەتۋ جونىندەگى مەملەكەتتىك كوميسسيانىڭ قورىتىندى وتىرىسىندا ايتتى.

– ەلباسى باستاماسىمەن جۇزەگە اسقان 7-20-25 باعدارلاماسى يپوتەكا بويىنشا نەسيەلەۋ مەن تۇرعىن ءۇي قۇرىلىسىنا ۇلكەن سەرپىن بەردى. ءۇي كەزەگىندە تۇرعانداردىڭ ماسەلەسىن شەشۋ ءۇشىن جاڭا جوبا – 5-10-20 باعدارلاماسىن ىسكە قوسۋدى تاپسىرامىن. بۇل ماقسات ءۇشىن 390 ملرد تەڭگە بولەمىز. بيىل قۇرىلىس كولىمىن رەكوردتىق دەڭگەيگە جەتكىزۋ جوسپارلانعان. 15 ملن شارشى مەتر نەمەسە 150 مىڭ پاتەر مەن ءۇي تۇرعىزىلادى، – دەدى پرەزيدەنت.

توقايەۆ تۇرعىنداردىڭ باسپانا ماسەلەسىن شەشۋدىڭ ماڭىزدى ەكەنىن اتاپ ءوتىپ، ينستيتۋسيونالدىق قۇرىلىمدى جاڭارتۋ قاجەتتىگىنە نازار اۋداردى.

سونداي-اق پرەزيدەنت ۇكىمەتكە جىل سوڭىنا دەيىن ءتۇرعىنۇي قۇرىلىس جيناق بانكىنىڭ نەگىزىندە "وتباسى بانك" دەپ اتالاتىن دامۋ مەن قولداۋدىڭ تولىققاندى ينستيتۋتىن قۇرۋدى تاپسىردى. ۇيىم ەسەپ جۇرگىزۋ، تاعايىنداۋ، باپانانى ۇلەستىرۋمەن اينالىسادى.