ق ر پرەمەر-مينيسترىنىڭ ءبىرىنشى ورىنباسارى ەرالى توعجانوۆ ويىن-ساۋىق ورتالىقتارىنىڭ قاشان اشىلاتىنىن ءتۇسىندىردى، دەپ حابارلايدى قازاقپارات.
– بۇگىن پرەزيدەنت قاسىم-جومارت توقايەۆ 2 مىڭ شارشى مەترگە دەيىنگى ازىق-تۇلىكتەن بولەك دۇكەندەردىڭ، سۇلۋلىق سالوندارىنىڭ جانە بالالاردى دامىتۋ ورتالىقتارىنىڭ اشىلاتىنىن مالىمدەدى. تۇرعىنداردىڭ ساياباقتار مەن سكۆەرلەردە سەرۋەندەۋىنە رۇقسات بەرىلەدى. پارك جانىنداعى كوڭىل كوتەرۋ جۇمىستارىنا شەكتەۋ قويىلادى، – دەپ ءتۇسىندىردى ە. توعجانوۆ بريفينگتە.
سونىمەن بىرگە، ە. توعجانوۆ ويىن-ساۋىق ورتالىقتارىنىڭ جۇمىسىن جانداندىرۋ بويىنشا كوپ سۇراق كەلىپ تۇسكەنىن ايتتى.
– بۇل كەزەڭدە ويىن-ساۋىق ورتالىقتارىنىڭ، مەيرامحانالار مەن قوناق ۇيلەردىڭ جۇمىسى ىسكە قوسىلمايتىنىن مالىمدەيمىن. بۇل ماسەلە ءسال كەيىنىرەك وڭىرلەردەگى سانيتارلىق-ەپيدەميولوگيالىق جاعدايدى ەسكەرە وتىرىپ، قاراستىرىلادى، – دەدى ە. توعجانوۆ.
ونىڭ ايتۋىنشا، ەلدەگى كۆي جۇقتىرعاندار ۇلەسىن 2 پايىزعا دەيىن ازايتقاندا عانا، ويىن-ساۋىق ورتالىقتارىن اشۋعا مۇمكىندىك بار.
سونداي-اق ول قازاقستاندا تەمىرجول كولىگىنىڭ قوزعالىسى ءالى اشىلمايتىنىن، توتەنشە جاعداي رەجيمىنىڭ توقتاعانىنا قاراماستان بلوكپوستتار ءالى دە ساقتالاتىنىن ايتتى.
پىكىر قالدىرۋ