اقتاۋ اۋەجايىنىڭ جۇمىسى 16 مامىردان باستاپ قايتا جاندانادى. بۇل تۋرالى بۇگىن ماڭعىستاۋ وبلىسىنىڭ قوعامدىق كوممۋنيكاسيا ورتالىعىندا وتكەن بريفينگتە اقتاۋ حالىقارالىق اۋەجايىنىڭ ديرەكتورى ەرعازى جولداسوۆ مالىمدەدى.

مەملەكەتتىك كوميسسيانىڭ شەشىمى بويىنشا اقتاۋ اۋەجايى 16 مامىردان باستاپ ىشكى اۋە رەيستەردى قابىلدايدى.
«Air Astana» اۋە كومپانياسى بۇرىنعى ۇشۋ كەستەسى بويىنشا «اقتاۋ-نۇرسۇلتان» جانە «اقتاۋ-الماتى» باعىتى بويىنشا كۇنىنە ءبىر رەت جولاۋشىلاردى تاسىمالدايدى. ال، «Sckat» اۋە كومپانياسى «اقتاۋ-الماتى» باعىتى بويىنشا كۇن سايىن ءبىر رەت، ال «اقتاۋ-شىمكەنت» باعىتى بويىنشا اپتاسىنا ەكى رەت جولاۋشىلاردى تاسىمالدايتىن بولدى. ەلىمىزدىڭ بارلىق قالالارىنا ۇشاتىن رەيستەر ىسكە قوسىلادى.
تەك قانا اتىراۋداعى پاندەميالىق جاعدايعا بايلانىستى «اقتاۋ-اتىراۋ» رەيستەرى ازىرگە ۇشپايدى. سونىمەن قاتار شەت مەملەكەتتەرگە باعىتتالعان اۋە رەيستەرىنىڭ قاشان ىسكە قوسىلاتىنى دا ازىرگە بەلگىسىز.
رەيستەر اۋەجاي الگوريتمىنە، كۇشەيتىلگەن سانيتارلىق نورمالارعا، سونداي-اق بورتتاعى قاۋىپسىزدىك ەرەجەلەرىنە سايكەس ورىندالادى.

قاۋىپسىزدىك ەرەجەلەرى:
1. اراقاشىقتىق ساقتاۋ. تىركەۋ، تەكسەرۋ، وتىرۋ مەن ءتۇسۋ كەزىندە جولاۋشىلاردىڭ (1 مەتر) اراقاشىقتىق ساقتاۋى قاجەت.
2. تەرمومەترمەن ولشەۋ. تەرمينالعا كىرگەندە جولاۋشىلاردىڭ دەنە قىزۋى تەكسەرىلەدى.
3. جەكە قورعانىش قۇرالدارىن پايدالانۋ. ۇشاققا وتىرعانعا دەيىن جانە ۇشۋ كەزىندە جولاۋشىلاردىڭ بەتپەردەسى بولۋى ءتيىس.
4. جولاۋشىلار ۇشۋدان 2 ساعات بۇرىن اۋەجايدا بولۋى قاجەت.
5. شىعارىپ سالۋشىلار جانە كۇتىپ الۋشى ادامدار تەرمينال عيماراتىنا كىرە المايدى.

اۋە رەيستەرى تۋرالى تولىق اقپاراتتى اۋە كومپانيالارىنا حابارلاسىپ بىلە الاسىزدار.