پرەزيدەنت ۇسىنعان دامۋ ستراتەگياسىن زاڭنامالىق تۇرعىدا ساپالى ءارى ۋاقىتىلى قامتاماسىز ەتۋىمىز كەرەك. بۇل تۋرالى بۇگىن ق ر پارلامەنتى سەناتىنىڭ ءتوراعاسى ماۋلەن اشىمبايەۆ ايتتى.

– وزدەرىڭىزگە بەلگىلى، وسى اپتادا ەلىمىزدە توتەنشە جاعداي رەجيمى اياقتالدى. سوعان بايلانىستى مەملەكەت باسشىسى داعدارىستان كەيىنگى دامۋدىڭ باسىم باعىتتارىن انىقتاپ بەردى. جالپى، ەلىمىزدە ىندەتپەن كۇرەس جۇمىستارى جۇيەلى جۇرگىزىلدى. پرەزيدەنتىمىزدىڭ تاپسىرماسى مەن دەر كەزىندە قاجەتتى شەشىمدەر قابىلدانىپ، ناقتى شارالار جۇزەگە اسىرىلدى. ورتالىق جانە جەرگىلىكتى مەملەكەتتىك ورگاندار ءوز مىندەتتەرىن ءتيىستى دەڭگەيدە ورىندادى. سونىڭ ارقاسىندا ەلىمىزدە ۆيرۋستىڭ جاپپاي تارالۋىنا جول بەرىلمەدى. ازاماتتاردىڭ قابىلدانعان شەكتەۋلەرگە تۇسىنىستىكپەن قاراۋى دا پرەزيدەنت شەشىمدەرىنىڭ ناتيجەلى بولۋىنا وڭ اسەرىن تيگىزدى. ءقازىر جاعداي ايتارلىقتاي تۇراقتاندى. دەگەنمەن، دەرتتەن ءالى دە بولسا تولىق ارىلعان جوقپىز. سوندىقتان ءبىرقاتار شەكتەۋلەر قالا بەرەدى. سوعان وراي ساقتىق شارالارىن ۇستانۋىمىز كەرەك، – دەدى ماۋلەن اشىمبايەۆ.

سەنات سپيكەرى كوروناۆيرۋس ىندەتى كوپتەگەن سالاعا ايتارلىقتاي زاردابىن تيگىزگەنىن، سوعان بايلانىستى ەلىمىزدە مەملەكەت باسشىسىنىڭ باستاماسىمەن داعدارىسقا قارسى شارالار جۇزەگە اسىرىلىپ جاتقاندىعىن باسا ايتتى. حالىققا جانە بيزنەسكە ايتارلىقتاي قولداۋ كورسەتىلىپ جاتقانىن ەسكە سالدى.

– پرەزيدەنت بۇل باعىتتاعى جۇمىستارىن ارى قاراي جالعاستىرا بەرەتىندىگىن ايتتى. اسىرەسە ازاماتتاردىڭ دەنساۋلىعىن ساقتاۋعا، ولاردىڭ تابىسىن ارتتىرۋعا، بيزنەستى قولداۋعا، ءبىلىم جانە عىلىم جۇيەسىن جەتىلدىرۋگە باسا ءمان بەرىلدى. توتەنشە جاعداي جونىندەگى مەملەكەتتىك كوميسسيا ەكونوميكالىق ءوسىمدى قالپىنا كەلتىرۋ جونىندەگى مەملەكەتتىك كوميسسيا بولىپ قايتا قۇرىلىپ، كەشەندى جوسپار دايىندالادى. سەنات وسىنىڭ ءبارىن ەسكەرىپ، ءوز جۇمىسىن ءتيىمدى ۇيىمداستىرۋى ءتيىس. ءبىز ەلباسى ساياساتىنىڭ ساباقتاستىعىن ساقتاي وتىرىپ، پرەزيدەنت ۇسىنعان دامۋ ستراتەگياسىن زاڭنامالىق تۇرعىدا ساپالى ءارى ۋاقىتىلى قامتاماسىز ەتۋىمىز كەرەك. مەملەكەت باسشىسى 4 مامىردا سەناتتا سويلەگەن سوزىندە پالاتانىڭ ەڭ باستى مىندەتى - ساپالى زاڭدار قابىلداۋ ەكەنىن اتاپ ءوتتى. وسى باعىتتا بىرلەسىپ ناتيجەلى جۇمى ىستەيمىز دەپ سەنەمىن، – دەدى سەنات ءتوراعاسى.