ەلباسى، پارتيامىزدىڭ ليدەرى نۇرسۇلتان نازاربايەۆتىڭ تاپسىرماسى بويىنشا «Nur Otan» پارتياسى ءتوراعاسىنىڭ ءبىرىنشى ورىنباسارى باۋىرجان بايبەك تۇركىستان وبلىسىنىڭ ماقتاارال اۋدانىنا ارنايى كەلىپ، اپات اۋقىمىن ءوز كوزىمەن كورىپ شىقتى.

ساپار بارىسىندا ول كورشىلەس وزبەكستانداعى سۋ بوگەتىنىڭ جارىلۋى سالدارىنان سۋ استىندا قالعان دوستىق، جەڭىس، فيردوۋسي، جاڭاتۇرمىس جانە ورگەباس اۋىلدارىنىڭ تۇرعىندارىمەن كەزدەستى. مۇندا توتەنشە جاعدايدىڭ كەسىرىنەن مىڭنان استام ءۇي بۇزىلىپ، 8 مىڭ گەكتار ەگىس القابىن سۋ باسقان.

«اپات ايتىپ كەلمەيدى» دەيدى حالقىمىز. ماقتارال جۇرتىنىڭ باسىنا تۇسكەن قيىندىق ەلگە ورتاق. ەڭ باستىسى، باس امان بولسىن. ءقازىر مەملەكەت تاراپىنان بارلىق قاجەتتى كومەك كورسەتىلىپ، سۋ تاسقىنى سالدارىن جويۋ جۇمىستارى جۇرگىزىلۋدە. ەل پرەزيدەنتى قاسىم-جومارت توقايەۆ اتاپ كورسەتكەندەي، سۋ تاسقىنىنان زارداپ شەككەن تۇرعىندار تولىقتاي قايتا جوندەۋدەن وتكەن نەمەسە جاڭا سالىنعان ۇيلەرمەن قامتاماسىز ەتىلەدى. سۋ باسقان ايماقتاعى ءاربىر ادام رەسپۋبليكا بيۋدجەتىنەن 100 مىڭ تەڭگەدەن اقشا الادى. الەۋمەتتىك نىسانداردى، ينجەنەرلىك جەلىلەر مەن جولداردى قالپىنا كەلتىرۋگە 14 ميلليارد تەڭگەدەن اسا قاراجات ءبولىندى.

مەملەكەت باسشىسىنىڭ ۇندەۋىنە قولداۋ بىلدىرگەن قازاقستاندىق كاسىپكەرلەر دە 5 ملرد. تەڭگەدەن استام قاراجات اۋداردى. بۇل ورتاق ىسكە «Nur Otan» پارتياسى دا قىزۋ اتسالىسۋدا. نۇروتاندىقتار ماقتاارالداعى حالىققا ءقازىردىڭ وزىندە 920 توننادان استام گۋمانيتارلىق كومەك جىبەردى، ونىڭ ىشىندە ازىق-تۇلىك، گيگيەنالىق قۇرالدار، كيىم-كەشەك، توسەك-ورىن مەن قۇرىلىس جابدىقتارى بار» – دەپ اتاپ ءوتتى باۋىرجان بايبەك.

ونىڭ ايتۋىنشا، ەلباسىنىڭ باستاماسى بويىنشا تۇڭعىش پرەزيدەنت قورى مەن «Nur Otan» پارتياسى قۇرعان «Birgemiz» قورى دا قوسىمشا كومەك كورسەتەدى.

«قوردىڭ قامقورشىلىق كەڭەسى مىرزاكەنت ەلدى مەكەنىنە 20 ءۇي تۇرعىزۋ ءۇشىن 340 ملن. تەڭگە ءبولۋ تۋرالى شەشىم قابىلدادى. وسىلايشا دوستىق اۋىلى تۇرعىندارىنىڭ باسپانا ماسەلەسى تولىقتاي شەشىلەتىن بولادى. وبلىس اكىمى ءو.شوكەيەۆپەن بىرگە بولىنگەن جەردى قاراپ، تۇرعىندارمەن جانە قۇرىلىسشىلارمەن كەزدەستىم. بۇل جەردە سامان ۇيلەردىڭ ورنىنا گازوبلوكتان 100 شارشى مەتردى قۇرايتىن 4 بولمەلى ۇيلەر سالىنادى. جۇمىس ساپاسى اۆتورلىق جانە تەحنيكالىق باقىلاۋ سالاسىنداعى مامانداردىڭ قاتىسۋىمەن، ەرەكشە پارتيالىق باقىلاۋدا بولادى»، – دەپ جازدى ول Facebook جەلىسىندەگى پاراقشاسىندا.

سونىمەن قاتار، جەتەكشى پارتيا ءتوراعاسىنىڭ ءبىرىنشى ورىنباسارى اتاكەنت اۋىلىندا ۆولونتەرلارمەن كەزدەسىپ، جاستارعا وسىنداي قيىن كەزەڭدە ەلمەن بىرگە بولىپ، ءوز ەرىكتەرىمەن جانكەشتى ەڭبەك ەتىپ جۇرگەندەرى ءۇشىن العىسىن ءبىلدىردى.

«وتكەن جىلى 700-دەن استام جاسوتاندىق بىرنەشە اي بويى ارىس قالاسىن قالپىنا كەلتىرۋ جۇمىستارىنا بەلسەنە اتسالىسقان بولاتىن. بۇگىن دە «Nur Otan» پارتياسى جاستار قاناتىنىڭ مۇشەلەرى مەن بەلسەندىلەرى ماقتاارالدىقتارعا كومەكتەسىپ جاتىر. ولار وزدەرىنىڭ ناقتى ىستەرىمەن وتانشىلدىقتىڭ، ۇيىمشىلدىق پەن ادامگەرشىلىكتىڭ ۇلگىسىن كورسەتىپ ءجۇر. مىنە، ءدال وسىنداي جاۋاپكەرشىلىگى مول جاڭا بۋىننىڭ وكىلدەرى الداعى ءماجىلىس پەن بارلىق دەڭگەيدەگى ءماسليحات سايلاۋلارىندا «Nur Otan» پارتياسىنىڭ تىزىمىندە بولۋى كەرەك.  ەلىمىزدىڭ بولاشاعى – وسىنداي جاستار!»، – دەدى ول.

ماقتاارال اۋدانىنا ساپار بارىسىندا باۋىرجان بايبەك تۇركىستان وبلىسىنىڭ اكىمىمەن بىرگە جەدەل شتاب وتىرىسىن وتكىزدى. مۇندا ءبىرقاتار وزەكتى ماسەلەلەردى، ونىڭ ىشىندە ينفراقۇرىلىمداردى ساپالى تۇردە قالپىنا كەلتىرۋ، اۋىل شارۋاشىلىعى ەڭبەككەرلەرىنە قولداۋ كورسەتۋ جانە تاعى دا باسقا ماسەلەلەر تالقىلاندى.

«Nur Otan» پارتياسىنىڭ باسپا ءسوز قىزمەتى