18 مامىردان باستاپ قازاقستانداعى بارلىق مەشىتتەر سانيتارلىق تالاپتاردى ساقتاي وتىرىپ اشىلادى. بۇل تۋرالى باس ءمۇفتي حابارلادى.
"قۇرمەتتى باۋىرلار! قاسيەتتى كىتابىمىز قۇراندا: «راسىندا، قيىندىقپەن بىرگە جەڭىلدىك بار. اللا سەندەرگە جەڭىلدىك قالايدى» دەلىنگەن.
مىنە، اللاعا شۇكىر، ەلىمىزدە توتەنشە جاعداي مەرزىمى اياقتالىپ، حالقىمىز قالىپتى ءومىر تىرشىلىگىنە اۋىسا باستادى.
الايدا كارانتين رەجيمىنىڭ تالاپتارىن قاتاڭ ساقتاپ، ساقتىق شارالارىنا اسا ءمان بەرۋىمىز قاجەت.
قۋانىشتى حابار 2020 جىلدىڭ 18 مامىرىنان باستاپ ەلىمىزدەگى بارلىق مەشىتتەرىمىز ارنايى سانيتارلىق تالاپتاردى ساقتاي وتىرىپ اشىلادى.
وسى ۋاقىتتان باستاپ مۇسىلمان قاۋىمىنىڭ جەكە قۇلشىلىق جاساۋىنا، قۇران وقىتىپ، نەكە قيدىرۋىنا بولادى.
ال جاماعاتپەن وقىلاتىن نامازداردىڭ مەرزىمىن الداعى ۋاقىتتا قوسىمشا حابارلايتىن بولامىز.
جەكە قۇلشىلىق كەزىندە، قۇران وقىتۋ، نەكە قيدىرۋ ءراسىمى بارىسىندا كارانتين تالاپتارىن قاتاڭ ەسكەرۋلەرىڭىزدى سۇرايمىز. وزىمىزگە قامقورلىق – وزگەلەرگە قامقورلىق ەكەنىن ەستەن شىعارمايىق" دەلىنگەن باس ءمۇفتيدىڭ ۇندەۋىندە.
مەشىتتەردە جەكە ناماز وقۋعا قويىلاتىن تالاپتار:
- تەك جەكەلەگەن تۇردە ناماز وقۋعا رۇقسات ەتىلەدى. مەشىتتەردە جاماعاتپەن (بەس ۋاقىت ناماز، جۇما نامازى، تاراۋىق نامازى) نامازدار وقىلمايدى؛
- مەشىتكە جەكە قۇلشىلىققا كەلگەن ەرلەر مەن ايەلدەر ۇزاق ۋاقىت مەشىتتە بولماۋى ءتيىس. مەشىتتە بولۋ ۋاقىت ۇزاقتىعى – 15 مينۋت؛
- ناماز وقۋشىلاردىڭ اراقاشىقتىعى 1،5 مەتر بولۋى كەرەك جانە ارنايى بەلگىلەنگەن ورىنداردا ناماز وقىپ، ناماز وقىپ بولعان سوڭ مەشىتتەن بىردەن شىعىپ كەتۋى ءتيىس؛
- مەشىتكە كەلەتىن ادام سانىن ءدىني عيماراتتىڭ جالپى پايدالى اۋدانىنىڭ 30 پايىزىنان ارتىق تولتىرماۋى كەرەك؛
- مەشىتتە قول الىسپاۋ كەرەك؛
- مەشىتتەردە اۋا الماسۋ جۇيەسى جاقسى ءجۇرۋ ءۇشىن بارلىق ەسىكتەردى اشىپ قويۋ قاجەت؛
- ءار 3 ساعات سايىن ناماز وقيتىن زالداردى زالالسىزداندىرۋ جۇمىستارىن جۇرگىزۋ قاجەت؛
- ناماز وقيتىن زالداردا يمامدار جانە ناماز وقيتىن ادامدار مىندەتتى تۇردە بەتپەردە جانە مەديسينالىق قولعاپپەن ءجۇرۋى كەرەك؛
- جاسى ۇلكەن كىسىلەر، دەنساۋلىعى ناشار ادامدار (ەر جانە ايەل) جانە جاس بالالار نامازدارىن ۇيلەرىندە وقىعانى ابزال؛
- مەشىت دارەتحانالارىن قولدانۋ بارىسىندا اراقاشىقتىقتى جانە سانتيتارلىق تالاپتاردى ساقتاۋى ءتيىس؛
- مەشىتتىڭ كىرەبەرىسىندە تۇرعان انتيسەپتيكالىق قۇرالداردى پايدالانۋ قاجەت؛
- مەشىتكە كىرۋ بولەك ەسىكتەن جانە شىعۋ بولەك ەسىكتەر ارقىلى بولۋى ءتيىس.
- قۇران وقىتۋ بولمەسىنە 10 ادامنان ارتىق كىرگىزبەۋ؛
- قۇران وقىتۋعا كەلۋشىلەردىڭ ارالارىندا 1،5 مەتر قاشىقتىقتىڭ ساقتالۋى جانە كەلۋشىلەردىڭ ارنايى بەلگىلەنگەن ورىندارعا وتىرۋى؛
- قۇران وقيتىن بولمەلەردە يمامدار جانە كەلۋشىلەردىڭ مىندەتتى تۇردە بەتپەردەمەن وتىرۋى؛
- گيگيەنالىق تالاپتارعا سايكەس باتا جاساۋ (بەت سيپاۋ جانە ت.ب.)؛
- ءار 3 ساعات سايىن قۇران وقيتىن بولمەنى جەلدەتىپ وتىرۋى؛
- قۇران وقيتىن بولمەگە كىرمەس بۇرىن انتيسەپتيكالىق قۇرالداردى پايدالانۋى؛
- قۇران وقيتىن بولمەگە كىرۋ بولەك ەسىكتەن جانە شىعۋ بولەك ەسىكتەر ارقىلى بولۋى ءتيىس.
- نەكە قيۋعا شاريعات تالاپتارىنا سايكەس، نەكە بولمەسىندە كۋاگەرلەردەن باسقا ادامدار بولماۋى ءتيىس؛
- نەكە قيۋشىلاردىڭ ارالارى 1،5 مەتر قاشىقتىقتى ساقتاۋ جانە ارنايى بەلگىلەنگەن ورىندارعا وتىرۋ؛
- نەكە زالدارىندا يمامداردىڭ جانە كەلۋشىلەردىڭ بەتپەردە جانە مەديسينالىق قولعاپپەن بولۋ كەرەك؛
- نەكە قيىپ بولعان سوڭ بىردەن مەشىتتەن شىعۋى كەرەك؛
- نەكە قيۋ بولمەسىنە كىرۋدەن الدىن انتيسەپتيكالىق قۇرالداردى پايدالانۋ قاجەت؛
- ءار 3 ساعات سايىن نەكە زالدارىن زالالسىزداندىرۋ قاجەت.
پىكىر قالدىرۋ