كوروناۆيرۋستىڭ تارالۋى جاعدايىندا جاھاندىق احۋالدى باقىلاۋعا شامامەن بەس جىل ۋاقىت كەتەدى. مۇنداي بولجامدى Financial Times ۇيىمداستىرعان كونفەرەنسيادا دۇنيەجۇزىلىك دەنساۋلىق ساقتاۋ ۇيىمى باس ديرەكتورىنىڭ ورىنباسارى سۋميا سۆاميناتان جاسادى، دەپ جازادى BBC news.
"الداعى 4-5 جىلدا بىزدە پەرسپەكتيۆالىق باقىلاۋ بولادى دەپ ايتار ەدىم"، دەيدى سۋميا سۆاميناتان.
مۇنىڭ قانشا ۋاقىتقا سوزىلاتىنى بەلگىسىز. سەبەبى كوروناۆيرۋستىڭ ءالى دە تارالۋىنا ءارتۇرلى فاكتورلار اسەر ەتەدى. ءتيىمدى ۆاكسينا جاسالعان كەزدە ۆيرۋستىڭ جويىلۋ-جويىلماۋى دا بەلگىسىز.
سۆاميناتاننىڭ ايتۋىنشا، بار ءۇمىت ۆاكسينادا بولعانىمەن، ۆاكسينانىڭ كەرى اسەرىن دە ەسكەرگەن ءجون.
ددۇ توتەنشە جاعداي باعدارلاماسىنىڭ جەتەكشىسى مايك رايان كوروناۆيرۋس ەشقاشان جويىلماۋى مۇمكىن ەكەنىن ايتتى.
– ۆيچ جوعالىپ كەتكەن جوق. بۇل اۋرۋ ءالى دە بار. ءبىز ونى ەمدەۋدىڭ جانە الدىن-الۋدىڭ جولدارىن تاپتىق. سونداي-اق ادامدار بۇرىنعىداي قورىقپايدى. ۆيچ جۇقتىرعان ادامداردىڭ كوپشىلىگى ۇزاق جانە ساۋ ءومىر سۇرەدى، – دەدى مايك رايان.
