فرانسيا كوروناۆيرۋستان كەيىن الەمدەگى ەڭ كوپ ساياحاتشى كەلەتىن ەل مارتەبەسىن ساقتاۋ ءۇشىن 18 ميلليارد ەۋرولىق «تۋريزمگە ارنالعان مارشالل جوسپارىن» جاريالادى. بۇل تۋرالى قامشى ءتىلشىسى The Daily Telegraph باسىلىمىنا سىلتەمە جاساپ حابارلايدى.

يتاليا ۇيدە وتىرعاندار ءۇشىن قارجىلىق ىنتالاندىرۋعا جانە ەلدىڭ تۋريستىك يندۋسترياسىنا 4 ميلليارد ەۋرو كولەمىندە قولداۋ جوسپارىن ۇسىنعاننان كەيىن كوپ وتپەي فرانسيا بيلىگى دە وسىنداي شەشىمىن مالىمدەگەن. 

فرانسيا وتكەن جىلى 90 ميلليونعا جۋىق شەتەلدىك تۋريستەردى قابىلداعان، ءبىراق بيىل باستالعان ىندەتتىڭ الدىن الۋ ءۇشىن ەلدەگى مەيمانحانالاردىڭ 95 پايىزى ناۋرىز ايىنىڭ ورتاسىنان باستاپ جابىلۋعا ءماجبۇر بولعان.

فرانسيا پرەمەر-مينيسترىنىڭ مالىمدەمەسى بويىنشا تۋريزمدى قۇتقارۋ جونىندەگى شارالار قارجىسى «جاپپاي جانە بۇرىن-سوڭدى بولماعان» 18 ميلليارد ەۋرونى قۇرايدى، وعان مەملەكەتتىك بانكتەر ءۇشىن بيزنەسكە تىكەلەي قولما-قول اقشا سالۋعا ارنالعان 1،3 ميلليارد ەۋرو ينۆەستيسيالىق جوسپارى كىردى.

جوسپار بويىنشا تۋريزم، قوناق ءۇي جانە مەيرامحانا سەكتورى ءۇشىن 20-عا دەيىن قىزمەتكەرى بار جانە جىلدىق كىرىسى 2 ميلليون ەۋرونى قۇرايتىن كاسىپورىندار جىل سوڭىنا دەيىن ىنتىماقتاسۋ قورىنىڭ كومەگىمەن 10 000 ەۋروعا دەيىنگى گرانتتار الا الادى.