جوعارعى سوت جەرگىلىكتى سوتتارعا تج رەجيمىنەن كەيىنگى جۇمىستى ۇيىمداستىرۋ تۋرالى حات جولدادى.

وندا اعىمداعى جىلعى 10 مامىردا باس مەملەكەتتىك سانيتارلىق دارىگەردىڭ COVID-19 اۋرۋىنىڭ الدىن الۋ شارالارىن ودان ءارى كۇشەيتۋ تۋرالى №36 قاۋلىسى، ينفەكسيانىڭ جاپپاي تارالۋ ءقاۋپىنىڭ ءالى دە ساقتالىپ وتىرعانى جانە تج كەزەڭىندە شەكتەۋ شارالارىنىڭ جالعاساتىنى ايتىلعان.

COVID-19-دى سوت عيماراتتارىندا جۇقتىرۋ ءقاۋپىن بولدىرماۋ جانە كەلۋشىلەرگە، سۋديالار مەن قىزمەتكەرلەرگە ءقاۋىپسىز جاعداي جاساۋ ماقساتىندا جەرگىلىكتى سوتتار قاۋلىنى مۇلتىكسىز ورىنداعانى ءجون.

سانيتارلىق-زارارسىزداندىرۋ رەجيمىن كۇشەيتۋ، دەنە تەمپەراتۋراسىن ولشەۋدى جالعاستىرۋ، COVID-19 بەلگىلەرى بايقالعان ازاماتتاردى سوت عيماراتىنا كىرگىزبەۋ ۇسىنىلدى.

سوت ءىسىن جۇرگىزۋگە جانە سوت جۇمىسىنا قاتىسى جوق بوگدە ادامداردىڭ سوت عيماراتىنا كىرۋىنە سالىنعان تىيىم ءالى دە جالعاساتىن بولادى. سەبەبى ازاماتتاردىڭ سوت پروسەسىنە تىكەلەي قاتىسۋى COVID-19-دىڭ تارالۋ ءقاۋپىن ەسەلەپ ارتتىرادى.

توتەنشە جاعداي جونىندەگى مەملەكەتتىك كوميسسيا وتىرىسىندا (10.05.20 ج.) پرەزيدەنت قاشىقتان جۇمىس ىستەۋ فورماتىنىڭ ءساتتى ىسكە اسۋى ماڭىزدى مەملەكەتتىك شەشىمدەردى قابىلداۋ كەزىندە IT-تەحنولوگيالاردى قولدانۋدىڭ تيىمدىلىگىن اتاپ وتكەن بولاتىن.

جيناقتالعان وڭ تاجىريبەنى ەسكەرە وتىرىپ، سوت جۇمىسى ونلاين رەجيمدە جالعاساتىن بولادى.

قىلمىستىق ىستەر بويىنشا سوت وتىرىستارىن تاراپتاردىڭ قاتىسۋىمەن سوت عيماراتىندا وتكىزۋگە ايرىقشا جاعدايلاردا عانا جول بەرىلەدى.

پروسەسكە قاتىسۋشىلاردىڭ ماتەريالداردى (ىستەردى) سوتقا ەلەكتروندى تۇردە ۇسىنۋىن باعىتتاۋ ماقساتىندا حات مۇددەلى مەملەكەتتىك ورگاندارعا دا جولداندى.

شاعىمدار، ءوتىنىشحاتتار مەن وزگە دە قۇجاتتار «سوت كابينەتى» سەرۆيسى ارقىلى، ال اكىمشىلىك قۇقىق بۇزۋشىلىقتار تۋرالى حاتتامالار مەن قاعاز ماتەريالدار سكانەرلەنىپ، ەلەكتروندى فورماتتا جولدانۋى قاجەت.