جاۋىن-شاشىننىڭ مول جاۋۋى سالدارىنان تۇرعىن ۇيلەردى، اۋلا اۋماقتارىن سۋ باسقان جانە اۆتوموبيل كوپىرلەرىن سۋ شايعان تۇركىستان وبلىسىنىڭ ەلدى مەكەندەرىنەن سۋ سورىپ شىعارىلدى. جاعداي تۇراقتاندى. ەۆاكۋاسيالانعان ادامدار ءوز ۇيلەرىنە ورالۋدا. بۇل تۋرالى ق ر توتەنشە جاعدايلار كوميتەتىنىڭ باسپا ءسوز قىزمەتى حابارلادى.

قازىرگى ۋاقىتتا لەڭگىر اۋدانىندا اۆاريالىق-قۇتقارۋ جۇمىستارى جۇرگىزىلۋدە. قۇتقارۋشىلار مەن جەرگىلىكتى اتقارۋشى ورگاندار سۋدى سورىپ شىعارۋ جانە ارىقتاردى، كوشەلەردى تازالاۋ جۇمىستارىن جۇرگىزۋدە. ماتەريالدىق زالالدى باعالاۋ ءۇشىن اۋلالاردى ارالاۋ جۇمىستارى جۇرگىزىلۋدە. توتەنشە جاعدايدىڭ سالدارىن جويۋعا توتەنشە جاعدايلار دەپارتامەنتىنىڭ جەكە قۇرامىنان 52 ادام، 27 موتوپومپا جانە 15 بىرلىك تەحنيكا مەن جەرگىلىكتى اتقارۋشى ورگانداردىڭ قۇرامىنان 241 ادام مەن 33 بىرلىك تەحنيكا جۇمىلدىرىلدى.

ماقتاارال اۋدانىندا نۇرلىجول، فەردوۋسي، ورگەباس، دوستىق جانە جەڭىس ەلدى مەكەندەرىندە 1030 ءۇي سۋ استىندا قالدى. قورعاۋ بوگەتتەرىن تۇرعىزۋ، سۋ باسقان اۋماقتاردان سۋدى سورىپ شىعارۋ جانە حالىقتىڭ مۇلكىن ەۆاكۋاسيالاۋ جۇمىستارى جالعاسۋدا. بۇگىنگى كۇنى 6،2 ملن. استام تەكشە مەتر سۋ سورىلدى. جالپى ۇزىندىعى 22 شاقىرىم ۋاقىتشا بوگەتتەر سالىندى، 87 000-نان استام قاپ توسەلدى جانە سۋ بۇرۋ ءۇشىن 3 كوللەكتور ورناتىلدى.

"ورگەباس اۋىلىندا جۇرگىزىلگەن جۇمىستاردىڭ ناتيجەسىندە اۆتوكولىك قوزعالىسى ءۇشىن ىشكى اۆتوجولدار اشىلدى. سونداي-اق وڭىردە سۋ تاسقىنىنان زارداپ شەككەن حالىققا مەديسينالىق جانە پسيحولوگيالىق كومەك كورسەتۋ جۇمىستارىن جۇرگىزۋدە. تاۋلىك بويى ءىىم، قورعانىس مينيسترىگى، توتەنشە جاعدايلار قىزمەتىنىڭ 1626 قىزمەتكەرى مەن 324 بىرلىك تەحنيكا، 17 ءجۇزۋ قۇرالى، 217 موتوپومپا جۇمىسىن جالعاستىرۋدا"، دەلىنگەن حابارلامادا.