شىعىس قازاقستاندىقتار كارانتين باستالعالى بەرى حقو-نىڭ ءبىرىڭعاي تەرەزەسىنەن 13 مىڭنان استام دايىن قۇجاتىن الىپ كەتكەن. بۇل قۇجاتتاردىڭ باسىم بولىگى كارانتين بارىسىندا ونلاين راسىمدەلگەن، قالعان بولىگى – حقو جابىلعانعا دەيىن.

ەستەرىڭىزگە سالايىق، 26 ناۋرىزدان باستاپ بارلىق حالىققا قىزمەت كورسەتۋ ورتالىقتارىنىڭ جۇمىسى توقتاتىلعان بولاتىن. «ازاماتتارعا ارنالعان ۇكىمەت» مەملەكەتتىك كورپوراسياسى قازاقستاندىقتار ءۇشىن بۇدان بۇرىن ءوتىنىش بەرىلگەن، سونداي-اق ەلەكتروندى فورماتتا تاپسىرىس بەرىلگەن قىزمەتتەر بويىنشا دايىن قۇجاتتاردى الىپ كەتۋگە بولاتىن ءبىرىڭعاي تەرەزەنى ىسكە قوستى. بۇل ءۇشىن ءار قالا مەن اۋدانداردا ءبىر-بىر حقو بەلگىلەنگەن بولاتىن.

دايىن قۇجاتتاردى كوبىنە شىعىس قازاقستان، تۇركىستان،الماتى وبلىستارىنىڭ تۇرعىندارى العان.

ءبىرىڭعاي تەرەزەدە بەرىلگەن قۇجاتتاردىڭ دەنى – احات قۇجاتتارى، جۇرگىزۋشى كۋالىكتەرى، كولىكتىڭ تەحنيكالىق پاسپورتى مەن تىركەۋ نومىرلەرى، جىلجىمايتىن مۇلىك پەن جەر ۋچاسكەلەرىنىڭ قۇجاتتارى، سونداي-اق جەكە كۋالىك پەن پاسپورت.

بۇل رەتتە، تج باستالعالى بەرى قازاقستاندىقتار egov.kz ەلەكتروندى ۇكىمەت پورتالى مەن eGovKzBot2.0 تەلەگرام-بوتى جانە eGovMobile قوسىمشاسى ارقىلى 10،5 ملن جۋىق قىزمەتتى ونلاين تۇردە العان.

دايىن قۇجاتتاردى بەرۋ تەرەزەلەرىنىڭ جۇمىس كەستەسى: دۇيسەنبى-جۇما 9.00-دەن 17.00-گە دەيىن. سەنبى – ساعات 9.00-14.00 ارالىعى.

دايىن قۇجاتتاردى بەرۋگە ارنالعان قالالىق جانە اۋداندىق بولىمدەردىڭ ءتىزىمىن مىنا جەردەن كورۋگە بولادى: gov4c.kz