شىعىس قازاقستان گۋمانيتارلىق كوللەدجىنىڭ بارلىق ستۋدەنتى كانۆاسس پلاتفورماسى بويىنشا قاشىقتىقتان ءبىلىم الۋدا. بۇل ءبىلىم جانە عىلىم مينيسترلىگىنىڭ 108 جانە كەيىنگى شىققان 123 بۇيرىعىنا سايكەس جۇزەگە اسىرىلۋدا.

كوللەدج ديرەكتورى فارحاد قۇرمانوۆتىڭ ايتۋىنشا، ىشتەي بولىمدە 1138 ستۋدەنت وقيدى.

- قاشىقتىقتان وقىتۋ جۇيەسىنە كوشۋ بارىسىندا ءبىرقاتار قيىندىق تۋىندادى. الايدا مۇنىڭ ءبارى ۋاقىت وتە كەلە شەشىمىن تاپتى، - دەدى فارحاد قۇرمانوۆ.

ايتا كەتەيىك، شىعىس قازاقستان گۋمانيتارلىق كوللەدجى 15 ستۋدەنتكە ءبىر جىلدىق ابونەمەنتى بار روۋتەرلەردى تەگىن تاراتتى. ولاردىڭ دەنى الەۋمەتتىك جاعىنان از قامتىلعان جانە كوپبالالى، سونداي-اق جەتىم بالالار ەكەنىن اتاپ وتكەن ورىندى. بۇدان بولەك ينتەرنەت جەلىسى ناشار جەردە تۇراتىن كوللەدجدىڭ 19 ستۋدەنتىنە فلەشكامەن اقپاراتتار جىبەرىلەدى.

- ۇستازدار قاۋىمى قاشىقتىقتان وقىتۋ جۇيەسىنە كوشۋ بارىسىندا 100-گە جۋىق ۆيدەو ساباق دايىندادى. ونى ءبىزدىڭ كوللەدجدىڭ يۋتۋب كانالىنان كورۋگە بولادى. سونىمەن قاتار كوللەدجدىڭ رەسمي سايتىندا كانۆاسس پلاتفورماسىنا ەنگىزىلمەگەن ەلەكتروندى كىتاپتار قويىلعان. بۇل ءوز كەزەگىندە ستۋدەنتتەردىڭ ساپالى ءبىلىم الۋى ءۇشىن جاسالۋدا، - دەدى فارحاد قۇرمانوۆ.

بۇگىندە اتالمىش كوللەدجدىڭ 2-3 كۋرس ستۋدەنتتەرى ىس-تاجىريبەدەن ونلاين رەجيمدە ءوتىپ جاتقانىن ايتا كەتكەن ورىندى.